Apozelɨyara 22

1“A'mweihi, nya'mweihɨlyɨ nɨmaamaangeihɨlyɨ, yadɨnyainyɨrebwi yɨhɨthɨde' kadɨka dɨnyu'nyɨla!” 2Yɨvɨruyagaalya' wɨdakevɨ kadɨka wɨ'neva kadɨka nayaa wɨ'nabala'na yɨna yadaapɨjɨ pɨnɨjɨ wɨda'

3“A'mweinyɨ Juyainyɨ. Kwaaka Sɨlɨzɨya Anga Taazazɨ mudanga nyɨnaange' nyɨmaarake' kɨrɨ' Jeruzaalemɨ davanna yɨlaabena gɨryadaaveinyɨra. Dava a'mwe sɨdu'nakei Gamelɨyalɨ wo'nɨkei nyɨjɨwaaka'. Nyɨjɨwaakada nemɨre Ne sɨnnawɨnyaraavɨre kɨwɨnya dɨragɨnna wɨjɨwaakɨna. Wɨjɨwaakɨna kanya' dahaa' dava mwaaihasaihi Gotɨyare yagaalya' nayaa lɨmwadɨvɨtabaaibɨ' sahwainyɨ lɨmwanna ye. 4Sareinyɨ a'mwera sabwi mɨdɨdɨvɨsaraavɨ kayaa'na yɨna ye. Kayaa'na yɨna kye pwara balɨna ye'. Pwaraavɨjɨ pɨnɨngɨjɨ ata pwɨyɨna yena kalavuzangevɨ yarai wɨmarɨmwangɨna ye. 5Nebulya'na yɨhɨthɨvanɨge. Gotɨyarɨna Mubɨthɨka Yɨra'de Naangelyɨ Kaajolɨya yuyarajɨ yɨhɨthɨvanɨge' nyɨjalɨkurakyɨpɨnera. Nɨmɨ saraavɨ kude naangera nyɨgaimwagesara Juya neya'mweraavɨ Damaazɨkazɨ mwaalyaraavɨna paazɨya' yavɨkarina yeva nyɨjaave'. Sara yeva nɨmɨ yebwi yɨhɨthɨpɨ'desɨra. Paazɨya' kanyɨjaave' ‘Sawɨnna a'mwe dara sabwi lɨmwaga'dɨvɨsaraavɨ senɨyabarajɨ pwɨya'mujɨ “Daanga naanga wɨvɨnana!” da'mujɨ Jeruzaalemɨ ayɨna makabɨdeinyɨ,’ dena sawɨnna wɨna ye.”

Polɨ Kɨraazɨtɨyarei yɨma'nake'nesɨ.

(Apozelɨyara 9:3-19; 26:12-18)

6Polɨ wɨda' “Kuna wodɨnyagaa' sɨrɨgwajahaa' Anga Damaazɨkazɨ aya kɨbanna badaazɨ sɨgunyavɨdaasɨ baaka naange' yarai mwadɨna nya'. 7Yarai mwadɨna kanya' kwaakevakɨna wala'na kye maanguraaya' nya' ‘Solɨgɨ, Solɨgɨ, kayaa'na be'na nyɨvanɨgɨna?’

8‘Naangeigɨ, aaihwaigɨnaka?’ ‘Jizaazainyɨ Naazaretɨ mwaalyainyɨ kayaa'na nyɨvanɨgɨnyainyɨ,’ nyɨda'. 9A'mwera nɨmɨjɨ wawesara baaka naange' tɨnna wanganeva maanguraaya' nyakevɨ myu'nyesarera. 10Nɨmɨ yɨwaara'na ye, “Naangeigɨ, berɨ' yɨjɨwana?” Sara yɨwaara'na kye Naangei nyɨda' ‘Daava'gɨzɨ Damaazɨkazɨna dɨwona! Saba pwai Gotɨyai gɨmɨnyɨna gyawɨ'mwake' yuya' gɨthathera.’ 11Kanyɨda' baaka naange'na tɨbaryainyɨ pwarajɨ wawora nɨmɨre asɨrɨ nyɨmaareva Damaazɨkazɨna yɨbwaramakuna nye'.

12Saba a'mwei Ananaayazai wo'nɨkei mwaala'. Sai nemɨ Juyainaavɨre Kɨwɨnya mɨdɨdelyɨra. Juyara Damaazɨkazɨ mwaalya yuyara sarɨna jalɨkurakɨdɨvɨkɨ ‘A'mwe tewaanaangelyɨra.’ 13Mwaalakei nɨmɨnyawɨnna bɨna yaka nɨmɨnyaba daavɨna yaka nyɨda' ‘Nya'mwe Solɨgɨ, tɨnna ayɨna dangana!’ Sara kanyɨda' sagaa' tɨnna tewaanyaraai yarai yenyɨna yena sarɨ tɨnna wanganna ye. 14Tɨnna wanganna kye Ananaayazai nyɨda' ‘Ne sɨnnawɨnyaraavɨre Gotɨyare sɨmunyavɨna jawɨ'de'na Gotɨyai gɨmɨnyɨ sɨnnawɨ dahɨlaka'. Gannya Yɨda'maraangerɨ tɨnna dangade'najɨ gannya maanguraayavɨ gɨthathe' kadɨka du'nade'najɨ sɨnnawɨ gɨthahɨlaka'. 15Dɨvi gamɨre yagaalya' duthatheigɨnyɨ. A'mwe yuyaraavɨ tɨnna wangamwaanyajɨ kadɨka wɨ'nɨwaanyajɨ sa duzalɨkurakɨdeigɨnyɨra. 16Sare'na dahaa' be'na jemwaaijɨwaana? Gɨmɨ daava'gɨzɨ gɨmɨnyɨ bavɨtaazɨya gyɨdeigɨnyɨ. Jizaazarɨne yaya' kuda'gɨzɨ gɨmɨre kayaa'nanyangɨ marasɨ'nadelyɨra,’ nyɨda' Ananaayazai.

Gotɨyai “Polɨ Menyaraavɨ wɨdathelyɨ,” wɨdaasake'nesɨ.

17Jeruzaalemɨna ayɨna bɨna yena Gotɨyare Angevɨ Gotɨyarɨ dadɨ a'mabaaitɨnna dara wangane' ‘Naangerɨ dangamwana!’ 18Sara kade a'mabaalyavɨ Naangei nyɨda' ‘Yarala, nɨmɨnyɨna duzalɨkurakɨde' dava mwaalyara mamaari gyɨpɨ'de'na Jeruzaalemɨdaasɨ jahalya'maka!’

19Nɨmɨ wɨde. Naangeigɨ, mena nyawɨ'mwaava. Lotuangengɨ wawena gɨlɨmwadɨvɨsaraavɨ kalavuzangevɨ marawɨmwaaihena naanna wɨramenna sara yawɨ'mwaava. 20Nabaai, Sɨtivenɨ gɨmɨnyɨna wɨjalɨkurakaderɨ tamakadaapɨjɨ saba nɨmɨ sainyɨ mwaalena tamakya'na yɨlaaya yadɨ wɨramesaraavɨre yɨvɨsangɨ maredaavena. 21Sara kude Naangei nyɨda' ‘Dɨwona! Nɨmɨre yagaalya' wɨjɨwaakya'na gɨthaasɨdera ajɨmya yuyangɨyaraavɨna.’ ”

22Polɨ wɨdadaasɨ a'mwera kadɨka nayaa wɨ'nyɨna kye' yagaala Menyaraavɨne' kadɨka wɨ'nyɨna yeva jaka naanga dɨna ye' “Tamakaana! Kwaaka davakɨ a'mwei sarerɨ marasɨ'nannelyɨ. Sare' dare'nesɨ. Gaala mwaalannei mwaalade' tewaanya'na mɨ'.” 23Jaka sara dadɨvɨ' kunnya yɨvɨsajɨ purakɨ'na yeva tɨrya asa maarɨna yeva yɨlamarasɨ'naawɨna ye'. 24Yɨlamarasɨ'naawɨna kye' Romɨyai aawɨlasaraavɨ maremwaaide naangei yawɨ'na “Juyara a'mwe sarɨne jaka kayaa'nanya' be'na dɨvanɨgava? Sare'na sarɨ tamaana!” daka gamɨreraavɨ naanga wɨda' “Kaavɨlya' be'na dɨvanɨgava jakeva? Angevɨna yarai makwopɨjɨ wɨlyabaalyɨ duramyɨla sare'na!” 25Kuda' aawɨlasara Polɨmɨ tamya'na pwɨyɨna kye' sai aawɨlata maremwaaidei daavakerɨ wɨda' “Sarɨmɨre kɨwɨnyabwi jɨvanɨgava? Romɨyarɨ kotɨya' myɨvanɨgasarɨ wɨlyabaalyɨ duramyide'na sarɨmɨrebwina daaka?” 26Sara kuda' aawɨlata maremwaaidei yarai wɨna yaka aawɨlasaraavɨ maremwaaide naangerɨ yɨwaarava' “Be'na yɨvanɨgɨna? Sare' dare'nesɨ. Sai a'mwemɨlɨ' mɨka! A'mwe sai Romɨyala!” 27Maremwaaide naangei kadɨka sara wɨ'nyɨna yaka Polɨmyawɨnna yarai wɨna yaka yɨwaara'na ya', “Nyɨdana! ‘Romɨyaigɨ daaka?’ ” Yɨwaara'na kya' “Yayo,” wɨda' Polɨ. 28Sara kuda' maremwaaide naangei wɨda' “Nɨgwia naanga naanga wakena Romɨyainyɨ yɨma'ne.” Sai wɨda' “Nɨmɨ sainyɨre nɨmaamaangei Romɨyai kyɨma'na' nɨmɨre mudangegaa' Romɨyainyɨ yɨma'nyɨna ye.” 29Sarevɨdaa'nyɨ yɨme'nya'bɨ' a'mwera yawɨ'na “Polɨmɨ tamaana!” yesara gamɨnyawɨdaasɨ ayɨna sara wɨna kye' aawɨlasaraavɨ maremwaaide naangei yawɨ'na “Polɨ, a'mwe Romɨyalyɨ. Sa'na myawɨriwe tamya'na nɨmɨ sahwarɨ pwɨyɨwa. Aakai!” yawɨ'na yaka lɨka yɨna ya'.

Kaajolɨyaraayaba Polɨ daavake'nesɨ.

30Aawɨlasaraavɨ maremwaaide naangei yawɨ'na “Juyara Polɨmɨna ‘Sai kayaa'na sara yɨwakelyɨ,’ nyɨdɨpɨ'devwi kayaa'nanyabwi yawɨrɨma!” Yawɨ'na yaka yɨrɨka pɨrɨvɨ Polɨmɨ senɨyabaraai yaarɨna yaka yagaalya' Gotɨyarɨna mubɨthɨka yɨra'dɨvɨta naangerajɨ Kaajolɨya yuyarajɨ saraavɨ “Jɨkabyɨla!” wɨdaasa'. Sara wɨdaasaka gamɨnyɨ makwalaawaka kumɨnyabanna walamaredavaawɨna ya'.

Currently Selected:

Apozelɨyara 22: byr

Highlight

Compare

Copy