Apozelɨyara 21

Anga Jeruzaalemɨna Polɨ wawake'nesɨ.

1A'mwe naangeraavɨ ya'ma'na yona sɨpɨyavɨ yɨlamwaaina kyo sɨpɨya' makuna neyaka Ahu'manna Kozɨna yɨda'na nayaa makuna neya'. Makuna neyaka yɨrɨka pɨrɨvɨ Anga Rozɨna yɨ'mavaawɨna yaka sabadaasɨ Anga Pataarana makuna neya'. 2Makuna kaneya' dara wangano' “Kwaaka Pɨnɨzɨyana sɨpɨya pɨrɨ' wawade' daaka!” Sara dona sɨpɨya savɨ yɨlamwaaina kyo makuna neya'. 3Makuna neyadaasɨ Ahu'manna Saaipɨraazɨ tɨnna wanganna kyo pimagɨ kwanaamimagɨ wavɨla'na yaka Kwaaka Sɨrɨyana makuna neya'. Anga Taayaa saba gɨlyɨvɨta yuya sɨpɨyavɨ wa'dɨ'nyɨya wakya'na sabanna makuna neya'. Makuna kaneya' Anga Taayaa sɨpɨyavɨdaasɨ bwalaawɨna yo. 4Bwalaawɨna yona Jizaazarɨ mɨdɨdɨvɨta pwaraavɨ bɨrɨna yona kumɨnyaba wikɨya pɨrɨ' mwaalɨna yo. Saba mwaalɨna yadozɨ Kuryai Tewaanyai Taayaa mwaalyaraavɨ Polɨmɨna pwara kayaa'na yɨpɨ'de'na wɨjɨwaainyɨna kya' sahwara Polɨmɨ wɨde' “Jeruzaalemɨna yɨlaawɨna minnera!” 5Sara kude' kɨrɨ' kaanyagaa' wikɨya' mena wavɨla'na kya' ya'ma'na yoinera. Angaba mwasabanna Kɨraazɨtɨyarera a'mwerajɨ kunnya a'mwejɨ kunnya kaimɨraayajɨ yuya makuna neye'. Makuna kaneye' aalɨmaangebaarɨ kwadaai gɨlona Gotɨyarɨ wɨdɨna yo. 6Mi'na wɨdɨna yona dɨnyɨna “Nemɨreihi tewaanna dɨwila!” Dɨnyɨna kyo sɨpɨyavɨ yɨlamwaaina kyo kunnya angengɨna wɨna ye'.

7Anga Taayaa sɨpɨya' ya'ma'na yaka Anga Tolɨmezɨna kuna makuna kaneya' Kɨraazɨtɨyarɨne neya'mweraavɨ ata bwa'nona kumɨnyawɨ sawɨta pɨrɨvɨ se wa'mwa'na yo. 8Se wa'mwa'na yona sɨpɨyavɨ yɨlamwaaina kyo saba ya'ma'na yaka Anga Sizaarɨyana yɨ'mavaawɨna ya'. Yɨ'mavaawɨna kya' Jizaazarɨna yagaala tewaanya' wɨdadei Pilipɨmɨre angevɨ wawona saba wa'mwa'na yo. Jeruzaalemɨ a'mwe atina ata purɨdaasɨ pwaraalyaraavɨ dahɨlakesalyɨ Pilipɨ. 9Gamɨre sɨdɨraaya dawaai dawaalyangɨ kwala mamaa'nya Gotɨyarɨ wɨ'nawɨjɨwaakesangɨra. 10Saba mwaaidozɨ yɨrɨka pɨnɨ wavɨla'na kya' Aahavaazai wo'nɨkei Kwaaka Juthɨyadaasai walaabɨna ya'. Walaabɨna yakei Gotɨyarɨ wɨ'nawɨjɨwaakadelyɨ. 11Walaabɨna yaka nemɨnyawɨnna bɨna yaka Polɨmɨre munnaanya' maarɨna yaka gannya asɨraalyɨ gannya sɨvɨlyɨraalyɨ sangɨ marayegipwɨyɨnyɨna yaka wɨda' “Kuryai Tewaanyai kanedɨwakɨra ‘Munnaanya davɨre gyakwarɨ Jeruzaalemɨ Juyara dara marayegipwɨyapɨjɨ ajɨmya yuyangɨyaraavɨre asɨraavɨ marɨmwangɨpɨ'delyɨra.’ ” 12Sara kuda' kadɨka wɨ'nona nemɨjɨ saba mwaalyarajɨ saina kɨnna dona Polɨmɨ wɨdo, “Jeruzaalemɨna milaawɨnnera!” 13Sara kudo sai neda' “Be'na yɨvanɨgataihɨlaka? Kɨnna sara kanyɨmaredɨwaa' kale naanga nyɨwake'na be'na dɨvanɨgava? Sare' dare'nesɨ. Jeruzaalemɨ kalavuza pwɨyɨna nyɨpɨ'de'na nɨmɨ dɨragɨnna mwaaihe. Sa' wikɨra. Nabaai Naanga Jizaazarɨne yayavɨna nyɨramakɨpɨ'de'na dɨragɨnna mwaaiheinyɨra.” 14Sara nedaka kuna dɨragɨnna yawɨ'na kya' yagaala pɨnɨ ayɨna mujɨ yona wɨdɨna yo, “Gotɨyai sɨmunyavɨ yawɨrade' sara yɨma'nana!”

15Sizaarɨya saba mi'na mwaalɨna yona nemɨre gɨlyɨvɨsa yovɨrawakɨna yona Jeruzaalemɨneina ya'ma'na yo. 16Kɨraazɨtɨyare mɨdɨdɨvɨsara Sizaarɨya mwaalya pwarajɨ yɨlaawɨna yona Mɨnezonɨmɨre angevɨna makwina kaneye' mwaalɨna yo. A'mwe Mɨnezonɨ Ahu'manna Saaipɨraazɨdaasai sɨnnawɨ sagaa' Kɨraazɨtɨyarɨ mɨdɨnyaakelyɨra.

Polɨ Jemɨzarɨ angyɨrɨ'maata yake'nesɨ.

17Jeruzaalemɨna yɨ'mavaawɨna kyo neya'mwera tɨnna wanganna neyeva yɨlaaya nemarye'. 18Yɨlaaya kanemarye' yɨrɨka pɨrɨvɨ Polɨjɨ nemɨjɨ Jemɨzarɨ tɨnna wanganya'na wɨna kyo Jemɨzai mwaalakeba Kɨraazɨtɨyareraavɨre a'mwe naangerajɨ mwaalɨna ye'. 19Mwaalɨna kye' Polɨ “Nya'mweihi!” wɨdaka gannya wawɨnyavɨna ajɨmya yuyangɨyaraayaba Gotɨyai yake yuyanna wɨda'. Mi'na kuda' kadɨka wɨ'nyɨna yeva Gotɨyarɨna “Byaannakeigɨ!” yɨlaaya yɨna ye'. 20Yɨlaaya yɨna yeva Polɨmɨ wɨde' “Neya'mweigɨ, davanna nayaa yawɨ'manɨgɨnyaigɨnyɨ. Juyara kwala naange' Naangerɨ lɨmwadɨvɨ' nabaai, Ne Mozɨzare Kɨwɨnya dɨragɨnna lɨmwamanɨgasare. 21Sahwaraavɨ pwara gɨmɨnyɨna kwaasɨ wɨde' ‘Polɨ ajɨmya yuyangɨyaraavɨreba Juya yuyaraavɨ wɨjɨwaaka' “Mozɨzare Kɨwɨnya' dasɨ'nyɨla! Sarɨmɨre kaimɨraayaraavɨre kɨlaakejɨ' madapɨnera! Juyaraavɨrebwi mipɨnera!” ’ 22Sara kwaasɨ kude' dara wɨ'nɨpɨ'de' ‘Davanna Polɨ jɨ'ma'mwaabɨka!’ Sara dapɨjɨyavɨdaa'nyɨ gara yaadeinaavaka? 23Sarevɨdaa'nyɨ gɨthaade' ja! Nemɨrera daraai daraalyara Gotɨyarɨ dɨragɨnna wɨja' kɨnɨnnakera kɨgaa' wɨdesa' sara yɨpɨ'derera. 24A'mwe saraavɨ makwo'gɨzɨ kumɨjɨ Juyainaavɨrebwina gɨrɨka maayaigɨ yɨma'nya'na baaka mwadana! Kumɨnyɨne nɨgwia kwaka'gɨzɨ kunnya mɨjata da'nɨpɨ'dengɨra. Sara kya'gɨzɨ a'mwera tɨnna gwanganapɨjɨ dara yawɨpɨ'de' ‘O, pwara Polɨmɨna yuya nedeta kwaasɨ yagaalya' daaka! Gamɨ sahwai Ne Mozɨzare Kɨwɨnya' nayaa yɨvanɨkei damwaalɨka!’ 25Sara wɨdɨpɨ'de' kɨrɨ' ajɨmya yuyangɨyara lɨmwadɨvɨsaraavɨna paazɨya' mena wɨdaaso. Pɨkarya dara yavɨkarinɨke' ‘Nemɨ mi'na yawɨ'mwo' “Nyɨlyarɨjɨ Lawerɨjɨ pwaraavɨjɨ wɨjaavɨpɨja mɨwɨta wapaaya manɨnna! Yɨsaraavɨne wapaa yɨlaaya'ne manɨnna! Tawe manɨnna! Yɨkurɨyaawia gɨraabimwannɨke tawanake mavɨrenɨnna! Ata lɨmwagya'nebwi minnera!” sara wɨdo,’ ” wɨde'. 26Mi'na kude' yɨrɨka pɨrɨvɨ Polɨ a'mweraavɨ makuna kya' kumɨjɨ gɨrɨkita'nanya wasɨ'nya'ne yɨna ye'. Mi'na kye' Gotɨyare Angevɨ wɨlaka Gotɨyarɨna mubɨthɨka yɨra'dɨvɨsaraavɨ wɨda' “Wikɨya mena kwavɨlavojɨ a'mwe dara gɨrɨkita'nanya wasɨ'nya'ne yuna kyɨma'nojɨ sagaa' pwai sipɨzipɨya pɨrɨ' wakɨna. Pwai pɨrɨ' wakɨna, yuyaina Gotɨyarɨna wakaadengɨra.”

Gotɨyare Angevɨ Polɨmɨ wɨla pwɨyesa'nesɨ.

27Yɨrɨka atina yaka ata purɨdaasɨ pɨrɨwaalyagaa' aya kɨgaa' mena kwavɨlava' Gotɨyare Angevɨ Juya pwara Kwaaka Ezɨyadaasara Polɨmɨ tɨnna wanganna ye'. Tɨnna wanganna yeva “Aakai, aakai,” kude' kwala bwa'naanya' yarai yɨkabɨna yeva yuyara jaka dɨna yeva gamɨnyɨ asajɨ galalɨmwanna ye'. 28Gamɨnyɨ galalɨmwanna yeva jaka wɨde' “Yɨzɨrelɨyaihi, dɨnegaidaayɨla! A'mwe dai yuyaba kaanya yamaryada yuyaraavɨ wɨjɨwaakɨna ‘Yɨzɨrelɨyara kayaa'nanyarera. Mozɨzare Kɨwɨnya' waryaanya'nesɨ. Gotɨyare Ange' tewaanya' mɨka,’ sara wɨjɨwaakadelyɨ. Nabaai, dahaa' Gotɨyare Angevɨ kayaa'nanaangei Menyara pwaraavɨ makulaabɨna yaka sara kayaa'na kyɨwa' nemɨre Anga tewaanya' gɨrɨkita'nanya' yɨma'nɨwakesɨ.” 29Wɨdesa' dare'nesɨ. Pɨgaa' angeba Jeruzaalemɨ sahwara Polɨmɨjɨ Tɨropimaazai Anga Epazaazɨ mwaalyarɨjɨ tɨnna wanganesara kwaasɨ dara yawɨresa' “O, Gotɨyare Angevɨ Polɨ Menyarɨ bamakwimwakei daaka!” 30Sara kude' Jeruzaalemɨ mwaalyara yuyara jaka dɨna yeva yarai yɨkabɨna yeva gɨla'mwannemwaaina yeva gamɨnyɨ galalɨmwanna yeva Gotɨyare Angevɨdaasɨ mwasawɨnna mwagi'namaa'na ye'. Mwagi'namaa'na kye' sagaa' kaanyangɨ yarai tihɨ'na ye'. 31Yarai tihɨ'na kye' kwala bwa'naanya' tamakya'na sahwarɨ tamɨna yadaapɨjɨ pwara Romɨya aawɨlasaraavɨ maremwaaide naangerɨ yagaala wɨdaase' “Yarala! Jeruzaalemɨ mwaalya yuyara jaka dɨna, mala tannɨvanɨgava.” 32Sara kudaase' maremwaaide naangei gannya aawɨlata maremwaaidɨvɨsarajɨ aawɨlata kwalaalyarajɨ yarai makuna yaka kwala naangeyawɨnna yarai walaawɨna ya'. Walaawɨna kya' a'mwera gamɨjɨ gamɨre aawɨlasarajɨ saraavɨ tɨnna wanganna yeva sahwarɨ ayɨna muramyɨ ye'. 33Ayɨna muramyɨ kye' aawɨlasaraavɨ maremwaaide naangei Polɨmyawɨnna wɨna yaka lɨmwanna yaka gannyaraavɨ wɨda' “Senɨyabaraalyɨ dɨvwɨyɨla!” Wɨdaka kwala bwa'naanyavɨ wɨda' “A'mwe dai aaihwalaka? Berɨ' yɨwakalaka?” 34Kwala bwa'naanyavɨ pwara yagaala pɨrɨ' jaka kude' pwara yagaala ge' ge' jaka wɨdɨna yesare. Avaalyagaa' jaka dɨna dɨna yadaapɨjɨ Polɨ yake'na naangei kadɨka mu'nyɨ yaka gannyaraavɨ wɨda' “Nemɨre aawɨlasainaavɨre angevɨna a'mwe darɨ dɨmakilaawila!” 35Kuda' yɨtaavakulayaba makuna yeva a'mwera Polɨmɨ tamya'na besa'na aawɨlasara Polɨmɨ marikwavalɨmwanna yeva makuna ye'. 36Sare' dare'nesɨ. Kwala naanga yuya' mɨdɨnaabɨna yeva jaka naanga wɨde' “Tamakaana!”

Gannyabwina Polɨ wɨdake'nesɨ.

37Aawɨlasaraavɨre angevɨna Polɨmɨ makwodaapɨjɨ tɨkuryayaba sai aawɨlasaraavɨ maremwaaide naangerɨ wɨda' “Gɨthɨwɨjainyɨ daaka?”

“O, Gɨrikɨyagaala dadɨnyaigɨ daa?” naangei yɨwaaravaka 38wɨda' “ ‘Kɨgaa' Kwaaka Yɨzɨpɨ mwaalya sai “A'mwera kwaaka maremwaaidɨvɨsaraavɨ yɨrawasaana!” daka a'mwamaayawɨnna yɨkamaanga kwalaalyara (4,000) kɨlɨ'nakeraavɨ makuna yakei daaka!’ sara yawɨ'mwana.” 39Polɨ wɨda' “Aawa, Juyainyɨ sahwainyɨ Kwaaka Sɨlɨzɨya Anga Taazazɨ mudanga nyɨmaarakeinyɨ. Anga naangeba mwaalyainyɨra. Nya'mweigɨ, ‘A'mwe daraavɨ duthana!’ kanyɨda'gɨri wɨdɨdeinyɨra.” 40A'mwe naangei “Wikɨra,” kuda' sahwai yɨtaavakulyayaba yɨladaa'na yaka gannya asi a'mweraavɨna bathamakina kya' a'mwera yagaala majara kave mwaalɨna kye' Yɨvɨruyagaalya' wɨda'.

Currently Selected:

Apozelɨyara 21: byr

Highlight

Compare

Copy