Apozelɨyara 23

1Polɨ Kaajolɨyaraavɨ tɨnna dɨragɨnna baihanaraka wɨda' “Nya'mweihi, kɨgaasɨ dahaasɨ yuyagaa' Gotɨyai nyangadaasɨ nɨmɨre sɨmunya padaihɨrakyavɨ dara yawɨ'dɨ ‘Gotɨyarɨna nɨmɨrebwi tewaanyabulyɨ,’ sara yawɨ'dɨnyainyɨ.” 2Mena kuda' Gotɨyarɨna Mubɨthɨka Yɨra'de Naangei Ananaayazai Polɨmyaba daavesaraavɨ wɨda' “Gamɨre maangeburɨ dɨramyɨla!” 3Polɨ wɨda' “Kwaasɨ yadɨnyaigɨ kurɨka kayaa'nanya pewɨnakeigɨ Gotɨyai gɨramadeigɨnyɨ. Saba Kɨwɨnyabwina kotɨya walamwaalagɨna nɨmɨnyɨna ‘Dɨramyɨla!’ dɨwaanya'na Kɨwɨnyaburɨ kayaaka yɨgaimwaana.” 4Sara kuda' a'mwera gamɨnyaba daavesara wɨde' “Gotɨyarɨna Yɨra'de Naangei Gotɨyarerɨ bɨrala yɨwaana!” 5Sai wɨda' “Nya'mweihi, Gotɨyarɨna Yɨra'de Naangei mwaalɨkerɨna myawɨriwe sa'na wɨdɨwa. Dare'nesɨ. Gotɨyare bukuya' dɨnɨke' ‘Yagaala kayaa'nanya' gɨmɨre a'mweraavɨ maremwaaiderɨna madɨnnera!’ ” wɨda'.

6Sahwai dara wanganake' “Ai, Kaajolɨya pwara Perɨzɨyara mwaaidapɨjɨ pwara Sazuzɨyara damwaaihava!” Sara daka Kaajolɨyaraayaba jaka wɨda' “Nya'mweihi, Perɨzɨyainyɨ. Perɨzɨyaraavɨ kuvɨbwaalɨvaangeinyɨra. A'mwe baryara dɨvi dɨkaapɨ'devwina yawɨ'dɨnyainyɨna dava kotɨya' nyawɨbwa'manɨgasainyɨra.” 7Sara kuda' Perɨzɨyarajɨ Sazuzɨyarajɨ maanga dɨneva Kaajolɨyara jaapainyɨna ye'. 8Sare' dare'nesɨ. A'mwe Sazuzɨyara dadɨvɨkɨ “Baryara kwaihwaainakera madɨkaayɨ yɨpɨ'derera. Ejelɨyara mamwaalyɨga'. Kuryara mamwaalyɨga'.” Sara dadɨvɨ' kɨrɨ' Perɨzɨyara dɨkaasa'najɨ ejelɨyaraavɨnajɨ kuryaraavɨnajɨ wɨdadɨvɨsarera. 9Sare'na maanga dɨnyɨna ye'. Maanga kuna dɨnyɨna yeva jaka naanga dɨnyɨna dɨnyɨna kye' pwara Perɨzɨyaraavɨ Kɨwɨjara daavɨna yeva dɨragɨnna wɨde' “A'mwe dai kayaa'nanyai mɨka! Kuryai dahawɨdaka? Ejelɨyai dahawɨdaka?”

10Maanga naange' yɨma'nyɨna kya' aawɨlasaraavɨ maremwaaide naangei “Akai, Polɨmɨ nagalapɨripalakɨpɨdɨka!” daka Polɨmɨna lɨka yaka aawɨlasaraavɨ dɨragɨnna wɨda' “Yarala, a'mweraayabanna walaawapɨjɨ kumɨnyɨdaasɨ sahwarɨ maarapɨjɨ aawɨlasaraavɨre angevɨna dɨmakilaawila!”

11Sagaa' sawɨsavɨ Polɨmyaba Naangei daavaka wɨda' “Dɨragɨnyaigɨ jɨma'nana! Sare' dare'nesɨ. Jeruzaalemɨ dava nɨmɨnyɨna nayaa wɨjalɨkurakagɨnyabaaibɨ' Anga Romɨ menyaba avaaina duthatheigɨnyɨra.”

“Polɨmɨ tamakaana!” wɨdesa'nesɨ.

12Mwanyavɨ Juya pwara yɨkabeva jamungajakɨna yeva dɨne' “Gotɨyarɨna dɨragɨnna dɨvanɨgo. Polɨ mwaaidori nemɨ wapaayajɨ aalyasɨ manyɨ yaadeinera. A'mwe sarɨ mi'na tamakawaajɨ dɨvidaasɨ naadeinera. Sara mi kyawaajɨ Gotɨyai Dɨkevɨ nemarasɨ'nanneinera.” 13A'mwera sara dɨnesara a'mweraare ata sɨvɨlyɨraalyarajɨ (40) pwarajɨ mwaalesarera. 14Mi'na dɨneva Gotɨyarɨna mubɨthɨka yɨra'dɨvɨta naangerajɨ a'mwe naangerajɨ saraayawɨnna waweva wɨde' “A'mwe yuya daina Gotɨyai kadɨka newɨ'nadaasɨ dɨwo. Wapaaya manaanneina Polɨmɨ tamakaadeinera. Sare' ‘Gotɨyai Dɨkevɨ nanemarasɨ'nadɨka!’ dɨragɨnna dona nebulya'na yɨhɨthɨwo. 15Sara dovɨdaa'nyɨ sarɨmɨjɨ Kaajolɨya pwarajɨ Romɨyai aawɨlasaraavɨ maremwaaide naangerɨ kwaasɨ yagaalya' duthaasɨla! ‘Polɨmɨ yagaala pɨnɨ wɨdaathe'na nemɨnyawɨnna dɨmakwalaabidelyɨra.’ Kɨrɨ' makwaidavadaapɨjɨ lɨka yulyarawaajɨ sahwarɨ karamakawaajɨ davanna mwalaabi yadelyɨra,” wɨde'.

16Polɨmɨ gya'mwevɨre gawaalɨ' kadɨka dara wɨ'nake' “O, Juyara aapyarɨ tamakɨpɨ'dei daaka!” Daka wawaka aawɨlasaraavɨre angevɨ wɨlaka savɨna Polɨmɨ wɨdɨthaakuna. 17Sara wɨdɨthaakuna kya' sai aawɨlata maremwaaide pwarɨ jaka wɨda' “Kaajo!” wɨdaka wɨda' “Gɨnnya maremwaaide naangeryawɨnna mɨgɨnya darɨ dɨmakwona! Sare' dare'nesɨ. Yagaala pɨrɨ' wɨdɨthaakwadelyɨra.” 18Sarevɨdaa'nyɨ aawɨlata maremwaaidei aawɨlasaraavɨ maremwaaide naangeryawɨnna jɨvwaramakuna yaka wɨda' “Polɨ, kalavuzai jaka nyɨdaka nyɨdɨwa' ‘Mɨgɨnya dai yagaalyavɨ wɨdathe'na gɨnnya maremwaaideryawɨnna dɨmakwona!’ ” 19Sara kuda' maremwaaide naangei mɨgɨnyare asɨrɨ maaraka saraai gaveraai mwaaidakɨlyɨyabanna jɨvwaramakuna yaka yɨwaara'na ya' “Be yagaala dɨnyɨdɨthaakwɨdevaka?” 20Mɨgɨnyai wɨda' “Juyara mena yawɨreva mwanyagaa' yaamɨjɨ gyɨwaarapɨ'de ‘Kaajolɨyara Polɨmɨ yagaala pɨnɨ nayaa wɨ'nɨpɨ'de'na Kaajolɨyaraayawɨnna dɨmakwalaawa!’ 21Sara gyɨwaarapɨ'de' kɨrɨ' kadɨka mu'nɨnnera! Sare' dare'nesɨ. A'mwera a'mweraare sɨvɨlatɨraalyara lɨka yulyarapɨjɨ gamɨnyɨna yemwaaibɨ'derera. Sahwara yuyara Gotɨyarɨna dɨragɨnna wɨdɨwaa' ‘Wapaayajɨ aalyasɨ manaanneina mwaidaa Polɨmɨ mena tamakawaajɨ dɨvidaasɨ naadeinera. Sara myɨ yaaja' Dɨkevɨ dɨnemarasɨka!’ Gɨmɨ kuda'gɨzɨ ‘Yo, Polɨmɨ waasɨma!’ tusavɨ tamakya'nera tavaravana yemwaaimanɨga'.” 22Sarevɨdaa'nyɨ maremwaaide naangei wɨda' “Sa' nyɨdɨwaa'na pwaraavɨ mudɨnna!” Sara daka pɨwɨnna mɨgɨnyarɨ wɨdaasɨna ya'.

Ga'maanɨya naangei Pilɨkɨzaryawɨnna Polɨmɨ waasesa'nesɨ.

23Sagaa' maremwaaide naangei aawɨlata maremwaaideraarɨ jaka wɨdaka wɨda' “Anga Sizaarɨyana aawɨlata kwala naangesɨ (200) yovɨrawakapɨjɨ ozɨyaraavɨ yɨlamwaaidɨvɨta pɨjaakuna (70) sɨramɨnya saamɨnya lɨmwadɨvɨta kwala naangesɨ (200) yovɨrawakapɨjɨ sawɨsavɨ naainɨ kɨlokɨyagaa' dava ja'mayɨla! 24Nabaai ‘Ozɨya pwara Polɨ yɨlamwaaladeraavɨ yovɨrawakakwoihɨjɨ Ga'maanɨyai Pilɨkɨzaryawɨnna a'mwe sarɨ nayaa makwalaawaka!’ dakɨlyɨ sara jɨla!” 25Sara wɨdaka paazɨya' yavɨkarina ya'. Dara yavɨkarina yakesɨ.

26Lɨzɨyaazai Kɨlothɨyaazainyɨ paazɨya da' tewaanyai Ga'maanɨya naangei Pilɨkɨzaigɨnyɨne' yavɨkarivanɨge. “Nɨnnya Pilɨkɨzai naangeigɨ!” gɨthɨwa. 27Juyara a'mwe darɨ galalɨmwanna yeva tamakya'na “Tamaana!” de'. Sara dadaapɨjɨ dara wɨ'nɨwa'de' “A'mwe sai Romɨyai daaka!” Dena nɨmɨre aawɨlasarajɨ walaawena kumɨnyɨ walayɨpalamaa'na yena padaihasamaa'na yɨwa'de. 28Nɨmɨ yawɨ'na ‘Juyara a'mwe darɨna be'na dɨvanɨgava? Kayaa'nanya' be'na dɨvanɨgava?’ Yawɨ'na yena Kaajolɨyaraayabanna sarɨ makwaimwa'daawade. 29Makwalaawena kadɨka dara wɨ'nɨwa'de' “Ai, tamakya'najɨ kalavuzangevɨ wɨmwaaihya'najɨ kayaa'nanyabwi myawaalɨkei daaka! Kumɨre kɨwɨnyabwina gamɨnyɨ maanga duthɨvanɨgava!” 30Sara yawɨ'mwa'deinyɨ yagaala pɨrɨ' pwai nyɨdɨwaka “Juyara sarɨ tamakɨpɨ'derera.” Saburɨ kadɨka wɨ'nena gɨmɨnyawɨnna waasɨvanɨge. Gamɨnyɨ maanga wɨdɨvanɨgasaraavɨ wɨdɨwa “Gamɨre kayaa'nanyangɨ Ga'maanɨya naangeryabanna duzideihɨlyɨ.” Pɨkarya sara yavɨkarina ya'.

31Aawɨlasara kadɨka sara wɨ'neva sara ye'. Sawɨta savɨ Anga Adipaatɨrɨzɨna Polɨmɨ makwalaawɨna ye'. 32Makwalaawɨna kye' yɨrɨkevɨ aawɨlasara kwaakaanya kunnya angevɨna ayɨna wɨna kye' Anga Sizaarɨyana ozɨyaraavɨ yɨlamwaalesara aawɨlata pwara gamɨnyɨ makwalaawɨna ye'. 33Sizaarɨyana makwalaawɨna yeva Ga'maanɨya naangerɨ paazɨya' wɨjaavɨna yeva nabaai, Polɨmɨ gamɨnyabanna wɨmwaaihɨna ye'. 34Wi'na wɨmwaaihɨna kye' Ga'maanɨya naangei paazɨya' tɨnna wanganaka gamɨnyɨ yɨwaara'na ya' “Gɨmɨre pɨrovijɨ gavanaka?” Sai wɨda' “Kwaaka Sɨlɨzɨya.” 35Sara kuda' “Gɨmɨnyɨna yagaainakera kwalyaabapɨjɨ kotɨya' yɨhu'nɨdeinyɨra.” Wɨdaka gamɨjɨyaraavɨ wɨda' “Erotɨyare anga naangevɨ wɨmwaaihapɨjɨ kalavuzangevɨ dameihi dɨmwaalyɨla!”

Currently Selected:

Apozelɨyara 23: byr

Highlight

Compare

Copy