2 Koridɨ 11

Polɨ kwaasɨ apozelɨyaraavɨrebwi ku'maayaba jalɨkurakake'nesɨ.

1Akai, dara nyɨvu'nɨvanɨkeinyɨ. Nɨmɨ sɨmumaaya maalɨ'nanya yagaala kave du'nyɨla! Maanga yarai manyɨdɨpɨnera! Kɨrɨ' yɨhɨthɨwe' baa'neka! Sarɨmɨ maanga majɨ, nayaa kave nyu'nadɨvɨsaihɨlyɨ. 2Sare' darevɨnyɨ. Gotɨyarɨdaa'nya wɨvu'nyabwina sarɨmɨnyɨne tewaanya nyɨvu'nadeihɨlyɨ. Gotɨyai a'mweraavɨna “Nɨnnya'neraavɨ dahɨlakɨma!” dada yɨ sasare dazahɨburɨ sarɨmɨnyɨna dɨragɨnna yawɨ'manɨge. Sare' darevɨnyɨ. Gave pwarɨna kwala maa'nya'na sarɨmɨnyɨ mena yɨhɨthahɨlakɨweihɨlyɨ. Yɨ sahwai Kɨraazɨtɨyalyɨ. Yɨ sahwaihi a'mwazɨdɨraaya tewaanya' mwaaide'bɨsaihɨrɨ Kɨraazɨtɨyarɨna yɨhɨmaakɨdeihɨlyɨ. 3Kɨrɨ' nabaai nɨmɨ lɨka dara yɨwa. Kamaala sai kwaasɨya sabwina sɨmunya naanga yawɨ'dei sɨnnawɨ kɨgaa' Yɨvavɨ kwaasɨ yagaala sa' wɨjaakabaaibɨ' sasare sabwi nayɨhima'nadɨka! Sarɨmɨre sɨmunyangɨ yune Kɨraazɨtɨyarɨne yawɨta dazabulyɨ yune gamɨnyɨna tewaanna yɨda'na yɨhɨvu'nya dazabulyɨ yɨhwarɨkebulyɨ. Akai, sarevɨna sarɨmɨre sɨmunya sa kayaaka nayɨhigalakadɨka! Nɨmɨ daza'na lɨka yɨvanɨge. 4Sare' darevɨnyɨ. A'mwe kwai sarɨmɨnyawɨnna yɨma'naabada Jizaaza pwarɨna yɨhɨzɨwaakadei. Nemɨ yɨhɨzɨwaakoyai yɨ Jizaazai sahwarɨna mɨ'. Yɨ sasare dazaburɨ sarɨmɨ kurya nabinanyai maa'dɨvɨsaihɨlyɨ. Sɨnnawɨ sarɨmɨ maareta Kurya Tewaanya dazaina mɨ'. Yɨ sarɨmɨ yagaala tewaanya nabinanya' maa'manɨga'. Sɨnnawɨ sarɨmɨ yagaala tewaanya maareta daza'na mɨ'. A'mwe sai sarɨmɨnyɨ tɨnnyaba sasare sabwi yadei yɨ sahwarɨ kave wɨ'nɨvanɨgasaihɨle! 5Sare' darevɨnyɨ. Nɨmɨ dara yawɨ'manɨge. Mudɨkera sara yɨhɨthadɨvɨ' nabaai, “Apozelɨya nawɨ'nyaanga wavɨla'nɨkeine,” dadɨvɨsaraavɨ dalaangewɨ aane pɨburɨna kɨburɨna maalɨ'na wɨla'nata mijɨvanɨgena! 6Kɨrɨ' yagaala wɨjavɨ nɨmɨ nayaa miwɨrinɨkeinyɨ dahamwaaihe? Baa'nana! Sare kɨrɨ' nɨmɨ sɨmunya yawɨsa'na kuna manyɨmudaasɨvanɨ'. Aawa. Sarɨmɨnyɨna yuya sɨmunya yawɨta yuya sa nemɨ yadaanya yuya saburana yɨhibwarɨdaakwo.

7Nɨmɨ Gotɨyare yagaala tewaanya' yange'na yɨhɨzɨwaakeinyɨ. Yɨ sara yadɨ nɨmɨ savɨna nɨgwia maareinyɨ mɨ'. “Yagaala nebulya' yɨhɨzɨwaakadɨ sarɨmɨnyɨ munyaba makɨlɨma!” dena nɨgwia mamaarya dazaburɨ nɨmɨ sainyɨ walamarake. Sara yene'na nɨmɨ dazabwi ye' yɨwetawakyabwi dɨngaka? 8Kɨraazɨtɨyare kusɨlaanya pɨnɨngɨ sarɨmɨnyɨ yɨhɨthaaya'nevɨ nɨmɨnyɨ nyɨgaimwagya'ne nɨgwia maareinyɨ. Yɨ sasare saburɨ sahwaraavɨre gɨlyɨvɨsa nɨmɨ yaasɨwa' mwagi'nya'bɨsasɨ. Kumɨre wɨdaayavɨna mɨ'. Sarɨmɨnyɨne'nanyɨ. 9Sɨnnawɨ nɨmɨ sarɨmɨjɨ yɨhye'mwannemwaalena yɨ nɨmɨ gɨlyɨvɨsanna nyɨgainakegaa' yɨ dazagaa' sarɨmɨjɨya a'mwe aane pwarɨna kwarɨna taanga wɨjaaveinyɨ mɨ'. Sare' darevɨnyɨ. Neya'mwerana Maazathonɨyadaa'nyara anga Koridɨna yɨ'maveva gɨlyɨvɨta nyɨgainadaasɨya sahwara yunebanna ye'. Yɨ gɨlyɨvɨta yuya nɨmɨ nayaa yavada'gainadɨ sarɨmɨnyɨna nɨmɨ taanga pɨmɨlɨ' kɨmɨlɨ' mayɨhɨzaaye. Nabaai dɨvi yuyagaa' yɨ nɨmɨ nayaa kuna sara yɨdeinyɨ. 10Yagaala nebulya'nanya Kɨraazɨtɨyare' sa' nɨmɨnyɨ sahwainyɨ nyarɨ'. Sarevɨdaa'nyɨ yuya Pɨrovijɨ Gɨriza sɨmagɨ nɨmɨnne yaya' munyaba makidɨ yadɨnya dazabwina a'mwe aane pwai nɨmɨre tusa' yaya' makɨlya'ne' kaanya yɨnɨga wi'na tihɨradei mɨ'. 11Nɨmɨ sasare sa' baarɨ'na yɨvanɨgena? Nɨmɨ sarɨmɨnyɨna tewaanya manyɨvu'nyɨvanɨkeinyɨ dɨngaka! Aawa. Gotɨyai mena nyawɨ'manɨ'. Nɨmɨ sarɨmɨnyɨ nyɨvu'nadeinyɨ. 12Sare kɨrɨ' “Pwara kumɨnne yaya' munyaba makɨlya'ne tusa'na ‘Polɨmɨva avaaina yadɨvɨtabaaibɨ' sabwina bɨraana!’ dadɨvɨ' yaamɨjɨ yɨna yadaapi ‘Tuta sa' kaanya tihɨrɨma!’ dena sarɨmɨre nɨgwia maa'dɨnyainyɨ mɨ'. Yɨ nabaai nɨmɨ yune sasara yɨdeinyɨ.” 13Sare' darevɨnyɨ. A'mwe dazara kwaasɨya apozelɨyare. Sahwara kwaasɨ yadɨvɨsare. Sahwara kumɨrebwi marovinya yadɨvɨ' yune kɨlaakejɨkɨna “Kɨraazɨtɨyare Apozelɨyainera,” dahɨlakɨmanɨga'. 14Yɨ dazavɨne'na sarɨmɨ atɨka mamaru'napɨna! Sare' dare'nesɨ. Saataanɨ gamɨ sai gannya kwaasɨyabwi marovinada yune kɨlaakejɨkɨnanya' sai baakevɨya ejelɨyaibɨ' yɨma'nadelyɨ. 15Sasare savɨdaa'nyɨ gamɨre wɨdaayadɨvɨta a'mwera kwarajɨ kumɨrebwi kwaasɨ marovinya yadɨvɨ' a'mwe yɨda'maraangebwi yadɨvɨsarabɨsara kwaasɨ yɨma'nadɨvɨsa' naange' daaka! Yɨ a'mwe sahwara dɨvidaa'nyɨ kumɨre kwaasɨ yadɨvɨta sabwina tɨvɨkɨta kayaa'nanya maapɨ'dere. Kumɨre aayagaa'ne' kayaa'nanya sahɨrɨ' warɨ'.

16Sɨnnawɨ mena yɨhɨthɨwe' nɨmɨ ayahi yɨhɨthɨma! A'mwe pwai kwai nɨmɨnyɨna dara nyawɨradɨ' “Sai a'mwe sɨmumaayalyɨ.” Kɨrɨ' sare' yawɨrya'neihɨrɨ yɨhɨvu'naja' “Nɨmɨ kwainyɨjɨ sɨmumaayaibɨsainyɨ nɨmɨnne yaya' munyaba makɨlɨma!” kada'mujɨ kave dɨnyu'naabyɨla! 17Nɨmɨ Naangei yakebwi mamɨdɨnyadɨ yagaala dara majɨvanɨge. Aawa. Sɨmumaayaibɨ' yagaalya' yaya' munyaba makɨlya'na nɨmɨ dɨragɨnna yɨvanɨge' dara dahathɨvanɨge. 18A'mwe kwalaalyara kɨlaakejɨkɨyabwi mɨdɨdɨvɨ' yɨ kumɨnne yune yaya sangɨna munyaba makimanɨgasavɨ yɨ dahaa' nɨmɨ kwainyɨjɨ yaya' munyaba maalɨ'na makɨlɨdeinyɨ. 19Sare' dare'nesɨ. Sarɨmɨ a'mwe sɨmumaayaraavɨ kwaasɨ yagaala yɨhɨzɨwaakadɨvɨsaraavɨ yɨlaaya'na kave wɨ'nɨvanɨga'. Sarevɨ sɨmunya tewaanya' kɨnɨnnakeihi daa! 20Sare' darevɨnyɨ. A'mwe pwai kwai gamɨre yaasɨwa'wawɨnya'na yɨhɨmwagi'namakabaza' yɨ sai sarɨmɨre gɨlyɨvɨta yuya yunebanna yaja' yɨ sai gamɨre kwaasɨya'na yɨhigalaja' yɨ sai kayaa'na yɨhibwaakaja' yɨ sai sarɨmɨre sɨdalengɨ mala yɨhɨramaja' yɨ sara yɨhyadaawori sare sarɨ kave nayaa wɨ'nɨvanɨgasaihɨle! 21We'! Sasare kayaa'nanya sabwi ya'ne sahwara yadɨvɨsanna nemɨ dɨragɨnya maayaine. Sarevɨ yɨ nɨmɨ savɨna jalɨkurakɨwe' yɨ nɨmɨ wagɨlya' nyɨvwa'nanneinye!

Nabaai a'mwe pwai kwai dɨragɨnna yada gannya sabwina jalɨkurakadevurɨna yɨ dazahɨburɨna nɨmɨ kwainyɨjɨ dɨragɨnya yadɨ jalɨkurakɨdeinyɨ. Sara dɨwe' a'mwe sɨmumaayainyɨbɨ' dɨwebaaibɨsasɨ. 22Sahwara Yɨvɨruyara dɨngaka? Yɨ nɨmɨ kwainyɨjɨnyɨ. Ne Jaikopɨmɨdaa'nyara Yɨzɨrelɨyara dɨngaka? Yɨ nɨmɨ kwainyɨjɨ. Ne Evɨraamɨmɨre yɨsiwiara dɨngaka? Yɨ nɨmɨ kwainyɨjɨ. 23Kɨraazɨtɨyarɨ wɨdaayadɨvɨtara dɨngaka? A'mwe wana sɨdu'maaya yune navɨ'navɨka nebulya'nanyaibɨsainyɨ dara dɨma! Yɨ nɨmɨ wavɨla'dɨnyainyɨ. Yagɨyagɨ wawɨnya kwalaalya naangengɨna wavɨla'na. Nɨmɨre wawɨnya'na kalavuza kwalaalya naangengɨ yɨrakesangɨna wavɨla'na. A'mwera nɨmɨnyɨ mala naange nyɨradaapɨri yɨ dazavɨ sahwaraavɨ nebulya'na wavɨla'na. Kwalaalyagaa' nebawa kabaimudɨkeinye! 24Yɨ yɨrɨka dahasaai dahasaai dahaa' sarevɨ Juyara wɨla kayaa'nanyabaalyɨ nyɨlɨ'bware'. Kuna nyɨlɨ'bwa'dɨvɨ' aaya' teti naainɨyavɨ (39) tamɨdaakuna nyadɨvɨkɨ. Sarevɨ aya kɨba nɨmɨ balɨgɨrasainyɨ. 25Yɨrɨka dahasaai dahaa' Romɨyara yɨsarɨkajɨ nyɨrame'. Gave pɨgaa' a'mwe pwara sɨlyajɨ lɨwakɨna nye'. Gotɨyare wawɨnya'na wodɨ yɨrɨka dahasaai dahaa' sɨpɨya' kayaaka yɨnyɨna kya' nɨmɨ saalaalyavɨ yɨwɨna kyɨwɨdɨkeinyɨ. Yɨ sarevɨdaa'nyɨ pɨgaa' sawɨta pɨrɨ' yɨrɨte pɨrɨ' saalaalya naangevɨ a'ba yɨlaramaryeinyɨ. 26Nɨmɨre wɨdaayaburɨ kwalaalyagaa' nɨmɨ tuta saamɨnyavɨ waweinyɨ. Aalya yarai bwalyawodaa'nyɨ yɨwɨna kiwɨdɨkeinyɨ sara yeinyɨ. Yɨ a'mwe kuka yɨpalamaa'dɨvɨsaraavɨre asɨrɨ saba sana yɨwɨna kiwɨdɨkeinyɨ. Yɨ nɨmɨre yɨsavaakɨyara Kɨraazɨtɨyarɨna sɨnna tɨka wɨda'daa'nyɨ nɨmɨnyɨna “Kayaaka yɨgalaana!” deva sara kanyɨramakɨpɨdɨkeinyɨ. Yɨ a'mwe ajɨmya pɨnɨngɨya pwara sara kwarajɨ “Kayaaka yɨgalaana!” deva sara kanyɨramakɨpɨdɨkeinyɨ. Yɨ anga naangeba sara yɨwɨna kiwɨdɨkeinyɨ. Yɨ kwaaka a'mwamaayavɨ sara yɨwɨna kiwɨdɨkeinyɨ. Yɨ saalaalyavɨ sara yɨwɨna kiwɨdɨkeinyɨ. Yɨ a'mwe “Nemɨ Kɨraazɨtɨyareinera. Ja'mweinera,” kwaasɨ dadɨvɨsaraavɨre asɨrɨ sara yɨwɨna kiwɨdɨkeinyɨ. 27Nɨmɨ wawɨnya kwalaalya yagɨyagɨ sara yeinyɨ. Dɨragɨnna mɨraagɨkɨreinyɨ. Kwalaalyagaa' sawɨ'wawɨnya yadɨ se wareinyɨ mɨ'. Mɨjɨ'na mwaalɨna yadɨ aalya'na baleinyɨ. Kwalaalyagaa' Kɨraazɨtɨyare wawɨnya'na tɨka wapaaya yagalya'maveinyɨ. Nɨmɨnyɨ yɨrɨla nyadaa'nyɨ baazɨ'ma'nyanna kune nyɨma'nakeinyɨ. 28Nabaai yune sahɨnɨnanna mɨ'. Pɨnɨ warɨke wavɨla'nɨkeinyɨna wibwarɨdaakuvanɨkengɨ. Yuya yɨrɨkerɨkaavɨ nɨmɨ Kɨraazɨtɨyare kusɨlaanya yuya sangɨ maremwaalya'na sɨmunya kwalaalya yawɨ'dɨnyainyɨ. Yɨ daza' taanginya naanga nebulya'nanya' nyakɨvanɨ'. 29Yɨ a'mwei Kɨraazɨtɨyarɨ lɨmwadei gamɨre kuryai dɨragɨnya maayai yojɨya'na yɨ nɨmɨ kwainyɨ gamɨbɨ'na najɨnanyainyɨ ye'mwannamwaalɨdeinyɨ midaaka! Yɨ a'mwe kayaa'nanyavɨ yɨdɨhwakɨ'naraawajai yɨ daza'na nɨmɨre sɨmunyavɨ kale dusɨna, daanga naanga dɨke'bɨ' nyɨgɨnyɨwannaradeinyɨ midaaka!

30Nabaai nɨmɨ yevɨna “Kwalaalyanna dɨjɨ,” yawɨ'mujainyɨ yɨ nɨmɨ dara dɨdeinyɨ. Nɨmɨ dɨragɨnya maayainyɨra. Yɨ dazavɨna nɨmɨnne yaya' munyaba nayaa makɨlɨdeinyɨ. 31Gotɨyai, Naanga Jizaazarɨ Ganɨmaangei sahwai nɨmɨnyɨna dara yawɨ'delyɨ “Sai kwaasɨ majɨwa'.” Nemɨ yuyagaa'na sahwarɨne yaya' munyaba makidaanyai sara yawɨ'delyɨ. 32Yɨ sarɨmɨ nayaa yawɨranganya'neihɨrɨ “Polɨ dɨragɨnya maayalyɨ,” yɨhɨthɨma! Damaazɨkazɨ saba Aaretazai Kingɨyai mwaala'. Sarei kɨyaapɨya naangerɨ anga naanga Damaazɨkazɨ tɨkuryavɨ maremwaalya'nerɨ dahɨlakakelyɨ. Yɨ sahwai dame daaya'nei nɨmɨnyɨna “Kalavuza yɨrɨma!” daka nyakelyɨ. 33Sara kanya' nya'mwe pwara soigɨlya naangevɨ lɨka wɨlanyɨmarulakeva angebanya sikurɨkevɨ munyaba dabu'nɨkevɨ nɨmɨnyɨ wɨlyabaarɨ makwasaabɨna nye'. Yɨthaa, sara kanye' nɨmɨ walaabɨna yɨna yena lɨkaanya wɨna ye. Sarevɨdaa'nyɨ yɨ nɨmɨ kɨyaapɨyare asɨrɨ makwasakena yɨ nɨmɨ lɨkaanya wɨna ye. Saza yadɨnyainyɨ wɨrɨsainyɨ.

Currently Selected:

2 Koridɨ 11: byr

Highlight

Copy

Compare