2 Koridɨ 10

Apozelɨyaraavɨ kayaakyagaala wɨdesa' Polɨ walamarakake'nesɨ.

1A'mwe pwara nɨmɨnyɨna kwaasɨ yagaalya' dara dadɨvɨkɨ “Sahwai nemɨjɨ neye'mwannemwaaida gamɨ sarɨne yaya' kwaakewɨ marima'nadelyɨ. Kɨrɨ' nabaai gamɨ menyaba mwaaida sahwai yagaala dɨragɨnaange nedasaabadelyɨ.” Polɨnyɨ nɨmɨ sainyɨ Kɨraazɨtɨyare kwaamu'nanyabulyɨ bwiwanna maremwaalyabulyɨ nayaa mɨdɨdɨ sareinyɨ kave dɨragɨnna yɨhɨthɨvanɨge. 2Yɨ dara yɨhidaangamanɨge. Dɨvidaa'nyɨ nɨmɨ sarɨmɨnyawɨnna kabi'mava'mujɨ yɨ a'mwe sahwara mala nayaa yɨwannɨpɨka! Akai, a'mwe sahwaraavɨ nɨmɨ yagaala dɨragɨnya' nudɨwɨka! Sahwara nemɨnyɨna dara yawɨ'dɨvɨsa'na “Kɨlaakejɨkɨya yawɨta saburɨ yamaryadɨvɨkɨra,” nayaa dɨragɨnna wɨdɨde'nanyɨ. Sara dɨragɨnna yawɨrangamanɨge' kɨrɨ' baa'nana! Sɨmunya yarai kyavada'galayawɨrapɨjɨ sara myavada'galyɨ yɨhyɨwɨneinyɨ. 3Kɨlaakejɨkɨya yawɨta saburɨ myamaryadaanyɨ. Sare' darevɨnyɨ. Kɨlaakejɨkɨ yamaryadaa kɨrɨ' kayaa'nanya neyɨma'nadaa'nyɨ kɨlaakejɨkɨya yawɨta saburɨna kayaa'nanya dathɨwadaanyaine. 4Sare' darevɨnyɨ. Yuyajɨ mala tannya'ne sa nemɨ lɨmwagako sa kɨlaakejɨkɨya yawɨta saburɨyanna mɨ'. Aawa. Sa Gotɨyare dɨragɨnya' kɨnɨnnakenna yɨkamaangeraavɨre maihurɨta dɨragɨnya yɨnɨga wi'na wo'dalasɨ'nade'na. 5Nemɨ sahwaraavɨre sɨmunya wo'daidaanyaine. Nabaai yuya sabura munya ke'beva daa'da a'mwera “Gotɨyarɨ yawɨranganaana!” dadɨvɨ' yadɨvɨsaraavɨne tusa' kaanya tihɨ'devura, sabura kɨburajɨ wo'daidaanyasɨ. Yɨ sara yadaa nemɨ a'mweinaavɨre yawɨta yuya sa Kɨraazɨtɨyarɨ mɨdɨnya'nengɨna kalavuza yɨralɨmwaga'daanyaine. 6Yɨ nemɨ mena yawɨbwa'nona sarɨmɨnyɨna yemwaala yɨgo. Sarɨmɨ nemɨre yuya yagaala sa dɨnemɨdɨnyidehaa' yɨ nabaai nemɨ yagaalya' galazekɨvaidɨvɨta a'mwe yuyaraavɨ kumɨre kayaa'nanyabwina wɨrɨvɨkɨraadeine. Sareina yawɨralɨmwagata yɨvanɨgoinera.

7Sarɨmɨre tɨnnyangɨ yɨhwarɨka dazanna Apozelɨyainaavɨnenna nayaa jawɨranganyɨla! Yɨ a'mwe pwai kwai yune gamɨ sarɨna dɨragɨnna lɨmwaga'da “Nɨmɨ Kɨraazɨtɨyareinyɨ mwaaihe,” yɨ sai sɨmunya' ayahi yawɨrana! Gannya sɨmunyavɨne'na yojɨ dara yawɨrana! “Yɨ nɨmɨ Kɨraazɨtɨyareinyɨ mwaaihebaaibɨ' Polɨjɨ Apozelɨya pwarajɨ Kɨraazɨtɨyarera.” 8Sare' darevɨnyɨ. Naangei nemɨnyɨna sarɨmɨre dɨragɨnna lɨmwangebwi dɨragɨnya yɨhiwagaathe'na gannya dɨragɨnya' nejaavakeine. Sa' sarɨmɨnyɨ kayaaka yɨhigalakaade'na mɨ'. Yɨ dɨragɨnya sa'na nɨmɨ yune nemɨnne yaya sanna makɨlaaja' yɨ sa'na wagɨla maarɨdeinyɨ mɨ'. 9Kɨrɨ' nɨmɨ “Aala!” dɨwa. Sarɨmɨ nɨmɨnyɨna dara yawɨ'manɨga' “Gamɨre paazɨyangɨ nemɨnyɨ lɨka dahaneyɨrɨ'gaimanɨ'.” Sare' sarɨmɨ yawɨsa'na “Aala!” dadɨ mi'na yɨhɨthɨwa. 10Sare' dare'nanyɨ. A'mwe pwara nɨmɨnyɨna dara dadɨvɨsare “Yo, gamɨre paazɨya naanga kɨnɨnnake yɨ yagaala dɨragɨnya kɨnɨnnakengɨ. Kɨrɨ' gamɨ sai kabi'mavojɨ nemɨ gamɨre kɨlaakejɨkɨ tɨnna wangadaawori dɨragɨnya maayalyɨ. Yɨ sagaa' gamɨre yagaalya' yaasɨwa'nanyasɨ.” 11Sasarera nayaa dara yawɨpɨka! Nemɨ sarɨmɨnyɨ menya keibeva yɨbwa'nadozɨ yune yagaalya' sarɨmɨnyɨna pɨkarya yɨda'daanya' yɨ nabaai nemɨ sarɨmɨjɨ yɨhye'mwannamwalaaja' nemɨ avaainanyabwi yagaala sa' sara yɨhyadaanyasɨ.

12Sare' darevɨnyɨ. Nemɨ sɨmunya kwalaalya yawɨ'manɨgo. Yɨ “A'mwe pwarabɨ' avaainanyainera!” nemɨ yɨnɨga wi'na daanneina mɨ'. Sahwara yune kumɨnne yayanna munyaba makinadɨvɨsare. Yɨ nemɨre sabulyɨ akwaraavɨre sabulyɨ yɨnɨga wi'na maryawɨbwaraanneina mɨ'. Aawa. A'mwe dazara yune kumɨre saburɨne yaamɨjɨta wakadɨvɨ' “Tewaanyainera,” maryawɨbwa'dɨvɨsare. Sahwara kumɨre yawɨsangɨna maryawɨbwa'nadɨvɨsare. Yɨ sarera sɨmunya maayare. Kwaakevakɨyara kunnya yawɨsabwina nayaa maryawɨbwa'nadɨvɨsara mɨ'. 13Sahwara sara yadɨvɨ' kɨrɨ' Apozelɨyaina nemɨnne yaya' munyaba makɨlyavɨna nemɨre yɨtaasavɨ wavɨlavaadeina mɨ'. Aawa. Yɨtaata savɨ Gotɨyai yaamɨjɨta wakada yɨtaasa' maryawɨbwaraka yanga nejaava'. Nemɨ yɨtaata yune dazahɨrɨvɨna mɨdɨdaanyaine. Nemɨ sahɨrɨvɨ kusawɨ mɨdɨnona sarɨmɨ kwaihɨryawɨnna bi'mavoine. 14Sare' darevɨnyɨ. Nemɨ sarɨmɨnyawɨnna mabi'mayɨ yaajɨ kwajɨ nemɨre yɨtaasavɨ kavari'mavaadɨkebaaibɨ' pilaanna nemɨ saina dɨragɨnna wavɨla'manɨgoina mɨ'. Aawa. Sare' darevɨnyɨ. Sɨnnawɨ sarɨmɨnyawɨnna bi'mavona sarɨmɨnyawɨnna Kɨraazɨtɨyarɨne yagaala tewaanya' yɨhɨmakabovɨna sarɨmɨ nemɨre yɨtaasavɨ mwaaiha'. 15Wawɨnya pɨnɨngɨ a'mwe pwara gaalyagaa' mɨraagɨkɨresangɨna nemɨnne yaya' mamakɨlyɨvanɨgo. Nemɨre yɨtaasavɨ Gotɨyai dahɨlakaka wawɨnya savɨ mavari'mayona sara mi. Aawa. Nemɨ sɨmunya dɨragɨnya dara yawɨrakɨvanɨgo. Sarɨmɨre dɨragɨnna lɨmwangebwi sarɨmɨre sɨmunyavɨ dɨragɨnaanga mena kima'nojɨ nemɨre yɨtaasavɨ yɨnɨgeva wawɨnya sa' yunebanna yɨ'mwannaade'nanyɨ. 16Yɨ sarɨmɨnyɨ bulyɨmagɨ mwaaihata kwaaka pimagɨnna Naangerɨna kadɨka mu'nyadɨvɨsaraayawɨnna nemɨ yagaala tewaanya' wɨjɨwakamaryaade'nanyɨ. Nemɨre yɨtaasavɨ pari'makwɨya yaadeina mɨ'. A'mwe pware yaamɨjɨta wakɨnɨkeba mena yakengɨna nemɨnne yaya' yaasɨwa' makɨlaanneina mɨ'. “Wawɨnya sa' nemɨ saina yagosɨra,” majadaanyainera. 17Aawa. “A'mwe gamɨnne yaya' munyaba makidei yɨ Naangerɨna gaverɨna nayaa sara makɨlana!” 18Sare' darevɨnyɨ. A'mwe yune gannya yaya'na munyaba makɨlajai yɨ dazarɨ Gotɨyai yawɨramaaradei mɨ'. Aawa. A'mwe Naangei gamɨre yaya' makɨlajai yune a'mwe sahwarɨ yawɨramaaradelyɨ.

Currently Selected:

2 Koridɨ 10: byr

Highlight

Copy

Compare