1 Tezalonaaika 5
5
Naangei walaabathe'na yemwaalya'nesɨ.
1Neya'mweihi, sarɨmɨnyɨ myavɨkaryaanna! “Sagaa' yɨma'nadehaakɨ. Sana yɨma'nadengɨ.” Sara yawɨsaburɨna mihihainyɨwa'. 2Sare' dare'nesɨ. Sahwaihi mena dara yawɨ'mwaa' “Sawɨsavɨ kukeibɨsai Naangei yarai walaabathehaa' yɨma'nadehaakɨ.” 3Pwara yawɨ'na “Dahaa' naryagaa' kwaamu'nanyagaa' tewaanyagaakɨra.” Yawɨ'na yapɨjɨ navɨka mwaalapɨjɨyagaa' kayaaka yarai wigaladerera. Yarai wigalade'na a'mwe sara lɨkaanya mwɨyɨ yɨpɨ'derera. Arɨkawɨ. Mudangegaa' a'mwe' daanga yarai wɨvɨdevaaibɨ' a'mwe saraavɨ kayaaka yarai wigaladerera. 4Sa'na kɨrɨ' neya'mweihi, sagaa' yɨma'nadehaa' sarɨmɨ maryaanga myɨpɨneihɨlyɨ. Jɨhɨnyawɨ mamwaalyɨgasa'na sɨdu'nakeihi maryaanga myɨ jideihɨlyɨ. Kukei bada a'mweraavɨ maryaanga bivalakadevaaibɨ' sagaa' sɨdu'nakeihɨrɨ maryaanga myɨhyanneihɨlyɨ. 5Sare' dare'nesɨ. Sarɨmɨ Baakeihi Yɨrɨkevɨyaihɨlyɨ. Sarɨmɨ Naangeregaasaihɨlyɨ. Nemɨ jɨhɨnyavɨyaina mɨ'. Nemɨ sawɨsavɨyaina mɨ'. 6Sarevɨdaa'nyɨ pwarabɨ' se wakatabaaibɨ' naraadɨka! Aawa. Tɨnna nayaa baihanaraana! Sɨmunya nayaa yawɨraana! 7Sare' dare'nesɨ. A'mwera se wa'dɨvɨsara sawɨsagaa' se wakasare. A'mwera biyaaya nadɨvɨ' yɨmaka widɨvɨsara sawɨsavɨ yɨmaka widɨvɨsagaakɨ. 8Sare' nemɨ Naangeregaasaina mwaaihovɨna sɨmunya nayaa yawɨraana! Sareina Romɨyara aawɨlasara saabya yɨvidɨvɨ' mwaaihɨ'nya dɨragɨnya mwaaihɨ'nadɨvɨ' malyagaa' tewaanna mwaaidɨvɨsarabɨsaina mwalaadeinera. Nemɨre saabya' Gotɨyarɨ lɨmwadaanyabulyɨ. Nabaai, a'mweraavɨna kale wiadevulyɨ. Sahɨrɨsɨra. Nemɨre mwaaihɨ'nya dɨragɨnya' nemɨ dɨragɨnna yawɨ'na “Gotɨyai nevadaihasamaaradelyɨ,” yawɨ'na yadaa yemwaaiho. 9Gotɨyai majɨ “Saraavɨ maanga wɨdɨma! Mala wɨramɨma!” majɨ yaka newakakelyɨ. Aawa. Gotɨyai dɨna “Sahwaraavɨre Naanga Jizaazai Kɨraazɨtɨyai padaihasamaaraderera,” dɨna yaka sabwi nejaavake'nanyɨ. 10Kɨraazɨtɨya sahwai nemɨnyɨna balakelyɨ. Gotɨyai nemɨnyɨna yawɨ'na “Sagaa' walaabathehaa' Kɨraazɨtɨyare pwara baihana'dɨvɨsarajɨ kwaihwaainakerajɨ Kɨraazɨtɨyare pwara se baidɨvɨsarajɨ Kɨraazɨtɨyalyɨ mwaaibɨka!” kada' bala'. 11Sarevɨna gazaigɨzaigɨ yawɨta nawɨ'nya sa ja'mwerɨ dɨragɨnna jɨvaimwana! Kɨraazɨtɨyarerɨ dɨragɨnyarɨ dɨvada'galayɨvaimwana! Dahaa' yɨvanɨgɨnyabaaibɨ' sara kuna ja!
Yagaala aayannesɨ
12Neya'mweihi, kɨwɨnya dɨragɨnna yɨhithanganaana! Naangei sarɨmɨjɨyaraavɨ dahɨlaka' “Nɨmɨreraavɨ nayaa dɨmaremwaala!” Sara kadahɨlaka' sahwara yɨhɨzɨwaakadɨvɨ' sarɨmɨre sɨmunya yavada'gaidɨvɨsare. Sahwara sarɨmɨnyawɨ Naangere wawɨnya yadɨvɨsa'na nayaa dara jawɨka! “A'mwe naangere. Nemɨ nayaa wɨdaana!” 13Wawɨnya yadɨvɨsa' yawɨra'gɨzɨ kumɨnyɨna yɨlaaya yadɨ dɨmaryawɨka! “Sahwara nemaremwaaidɨvɨsa' tewaanyasɨ.” Sareigɨ Naangereraavɨna avaaizɨmunya'na dɨmwaala!
14Neya'mweihi, kɨwɨnya naanga yɨhɨthaana! Sarɨmɨjɨyara wawɨnya myadɨvɨsaraavɨ duzɨwaakya! “Yaasɨwa'na namwaaidɨka! Wawɨnya ja!” Pwaraavɨre kuryara dɨragɨnya maayara lɨka yadɨvɨsaraavɨre kurya dɨragɨnyara dumwaaihya! Pwara sɨmunya dɨragɨnna myawɨryadɨvɨsaraavɨ wɨgaimwange'na nayaa dɨmaremwaala! Yuyaraavɨ kave ja! Nayaa duthana! 15Da' jawɨka! Pwai sarɨmɨjɨyarɨ kayaa'na kyojɨ mɨnya mamaaranna! Mɨnya mamaa'dɨnna! Aawa. Sa' dɨragɨnna jawɨka! Tewaanyaburɨ dɨmɨdɨna! Kɨraazɨtɨyareraavɨ tewaanna ja! Yuyaraavɨ tewaanna ja!
16Gazagaasagaa' yɨlaaya ja! 17Yuyagaa' Gotɨyarɨ duthana! 18Pwara kayaa'na gyɨpɨjahaa' pwara tewaanna gyɨpɨjahaa' yɨ yuyangɨ “Su! Su!” Gotɨyarɨ duthana! Sare' dare'nesɨ. Sasareigɨnyɨ Kɨraazɨtɨyai Jizaazai gannya dɨragɨnya' kagɨzaavojɨ Gotɨyai sɨmunya sara gyawɨ'daa'nyɨ “Nɨmɨrera nayaa yɨpɨka!” gɨmɨ sana sana ja!
19Kurya Tewaanyarɨ myɨgaa'mwadɨnna! 20Sare' Kuryai kudozɨ a'mwera Gotɨyare yagaala kagɨzɨwaakapɨjɨ yaasɨwa'na “Waryaanyasɨ,” madɨnna! 21Aawa. Yuyangɨ kadɨka wɨ'na'gɨzɨ nayaa dɨmaryawɨbwaka! “Tewaanyasɨ,” da'gɨzɨ dɨlɨmwagaka! 22“Kayaa'nanya gazasa',” da'gɨzɨ dasɨ'nana!
23Gotɨyai gamɨ sai kwaamu'nanyabwi kɨnɨnnakei gamɨreihi tewaanyaihɨrɨ yuneba yɨhɨmwaaihana! Sarɨmɨre kuryaraavɨ sarɨmɨre sɨmunyangɨ sarɨmɨre kɨlaakejɨkaavɨ nayaa maremwaalana! Yuyagaa' sara maremwaaida nemɨre Naangei Jizaazai Kɨraazɨtɨyai walaabathehaa' dara wanganade “Ya, nawɨ'nyarera. Yɨwetawakya maayarera.” 24Sare' Gotɨyai yɨhɨthahɨlakɨvanɨkei gazagaasagaa' tewaanyabwi yadei sana yɨhɨmwaaihadelyɨ.
25Neya'mweihi, nemɨnyɨna Gotɨyarɨ duzɨla!
26Kɨraazɨtɨyarera neya'mwera yuyaraavɨ yɨlaaya yadɨvɨ' nemɨnyɨne'na maangwɨdaayɨlaaya jɨnyɨla!
27Naangere dɨragɨnya'na naanna yɨhɨthɨma! Pɨkarɨyɨkwia da' neya'mwera yuyaraavɨ duzɨla!
28Yuyagaa' nemɨre Naanga Jizaazai Kɨraazɨtɨyai yange'na tewaanna yɨhɨgaimwagana! Gannya dɨragɨnya' yanga yɨhɨzaavana!
Polɨ
Currently Selected:
1 Tezalonaaika 5: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
