1 Tezalonaaika 4

A'mwere mwaalyabwina Gotɨyai “Nawɨ'nyabulyɨ,” dake'nesɨ.

1Neya'mweihi, sarevɨdaa'nyɨ yagaala pɨnɨ dɨragɨnna yɨhɨthaana! Nemɨ Naanga Jizaazarɨ wɨlamwaalona kɨwɨnya dɨragɨnna yɨhɨthɨvanɨgo. Sɨnnawɨ sagaa' dara yɨhɨzɨwaako. Sara mwaalapɨjɨ sana yadɨvɨ' Gotɨyarɨ yɨlaaya wigaibɨ'delyɨ. Sara yɨhɨzɨwaakobaaibɨ' sara yɨvanɨga'. Sara yɨvanɨgasaihi naanga sana sana jɨla! 2Sare' dare'nesɨ. Naanga Jizaazai kanejɨwaaka' yɨhɨthonna sarɨmɨ yawɨ'mwaa'. 3Sare' dare'nesɨ. Gotɨyare sɨmunyabwi dara yawɨ'manɨ' “Gɨmɨ nɨmɨreigɨ tewaanyaigɨ dɨmwaala! Ata lɨmwangebwi minna!” 4Sara yawɨrapɨjɨ gazaigɨzaigɨ gɨnnya balaangevɨ tewaanna dɨmaaka! Yawɨta tewaanyajɨyaigɨ kwala dɨmaaka! “Nɨmɨre a'mwe kwala maake mwaalɨka nawɨ'nya' gave dasɨ mwaalɨma!” da'gɨzɨ dɨmaaka! 5Ajɨmya yuyangɨyara Gotɨyarɨ myawɨryara dɨka widadaa'nyɨyara yaalɨvɨna maa'dɨvɨtabaaibɨ' kwala mamaa'dɨnna! 6Tewaanyabwi mamarasɨ'nɨnna! Ja'mwerevɨ kuka mamaa'dɨnna! Sabwina sɨnnawɨ jalɨkurakya' naanga yɨhɨtho. Sabura pwara kyapɨjɨ Naangei wɨrɨvɨkɨradelyɨ. 7Sare' dare'nesɨ. Gotɨyai myawɨri “Sahwara ata lɨmwangebwi yɨpɨka!” myawɨrya'. Aawa. “Sahwara nɨmɨrera tewaanyara nayaa mwaaibɨka!” yawɨraka nejɨvwaramaarakelyɨ. 8Sasarevɨdaa'nyɨ pwai yagaala da' marasɨ'najai a'mweraavɨre yagaalya' mamarasɨ'nyɨvanɨ'. Aawa. Gotɨyare yagaalya' marasɨ'nɨvanɨ'. Gotɨyai sahwai gannya Tewaanyai Kuryarɨ yanga nejaavanɨkerevɨ yagaalya' marasɨ'nɨvanɨkelyɨ.

9Kale wia'nebwina Gotɨyai sahwaihɨrɨ yɨhɨzɨwaaka' “Saigɨ ja'mwerɨna kale gyana!” Sara kyɨhɨzɨwaaka' sare'na nɨmɨ myavɨkariwɨna! 10Sare' dare'nesɨ. Sarɨmɨreba Kwaaka Maazathonɨya yuneba sɨrya'mweraavɨ yuyaraavɨna kale yɨhyɨvanɨ'. Sareihɨrɨ dɨragɨnna yɨhɨthɨvanɨgo. Gazaigɨzaigɨ kale naanga naanga gyana! 11Dɨragɨnna dara jawɨka! “Nɨmɨ kave mwaalɨma! Nɨmɨre wawɨnya' kuna maremwaalɨma! Pwaraavɨre wawɨnya kuna mamaremwaaimuna! Wɨdaasadera dɨragɨnna nyɨdetabaaibɨ' nɨnnya asasɨ aawawɨnya yɨma!” 12“Pwara Kɨraazɨtɨyarɨne mwasawɨnyaraavɨna wɨjɨwaainya'na kaanya nayaa yamarima! Nabaai aane pɨrɨ' kɨrɨvɨna nanyɨgainadɨka!” da'gɨzɨ gɨnnya asasɨ ja! Sara jawɨ'deigɨnyɨ.

Naangei walaabozɨ neyɨdɨkaavade'nesɨ.

13Neya'mweihi, nemɨ sɨmunyavɨ yawɨ'na “Kɨraazɨtɨyarera sɨdu'maayara namwaaibɨthɨka! Kɨraazɨtɨyare pwara baimwa'daasaraavɨna wɨjɨwakaana! Naangerɨ mu'nyadɨvɨsara dɨvi Naangei baryaraavɨ yɨdɨkaasa'na myemwaalyadɨvɨsaraavɨ kunnya baryaraavɨna kale wiadevaaibɨ' Kɨraazɨtɨyareraavɨ kale nyadɨka!” Yawɨ'na yona sare' yavɨkarivanɨgo. 14Sare' dare'nesɨ. Nemɨ dara lɨmwadaanyɨ. Jizaazai balaka ayɨna dɨkaavakelyɨra. “Nebulyasɨ,” dovɨdaa'nyɨ dara dɨna “A'mwera Jizaazarɨ lɨmwadɨvɨ' bainɨkeraavɨjɨ Jizaazarɨjɨ Gotɨyai makwalaabathere!” 15Sare' dare'nesɨ. Naangei kanejɨwaaka' yagaala sa' dɨragɨnna dara yɨhɨthɨvanɨgo. Naangei walaabathehaa' nemɨ kwaihwaainakeina mwalaajaina baryara wa'dapɨri myagalya'mayɨ yawaajɨ sɨnnawɨ myɨlaawi yaadeine. Arɨkawɨ. Baryara dɨkaavapɨjɨ sɨnnawɨ yɨlaawɨpɨ'derera. 16Sare'na Naanga sahwai Sɨgunyavɨdaa'nyɨ waidaavada jaka naanga danganadelyɨ “Jɨkabyɨla!” Sagaa' ejelɨya naangei jaka kudozɨ Gotɨyare gware' makuradesɨra. Naangei jaka naanga kadanganojɨ sɨnnawɨ Kɨraazɨtɨyarera baryara dɨkaapɨ'dere. 17Nabaai, nemɨ kwaihwaainakeina mwalaadeinajɨ sahwarajɨ sainaavɨ yarai nemakɨlaawadeinera. Sɨgunyavɨ nemɨ Naangerɨ wɨjɨmaata'na yɨraayangɨ nemakɨlaawadeinera. Sara kyojɨ yuyagaa' Naangeryaba mwalaade'nanyɨ. 18Sare'na pwaihɨlyɨyarɨ gamɨre baryarɨna kale wiadaa'nyɨ wɨgaimwange'na yagaala da' kave duzɨla!

Currently Selected:

1 Tezalonaaika 4: byr

Highlight

Copy

Compare