2 Tezalonaaika 1
1
Anga Tezalonaaika mwaalyaihi,
1Polɨnyɨ, Saailaazai, Timoti saina sarɨmɨnyɨ pɨkarɨyɨkwia da' yavɨkariwo. Kɨraazɨtɨyare kusɨlaanyavɨyaihɨrɨna yavɨkariwo. Gotɨyai nemɨre Nɨmwarɨ wɨlamwaaidɨvɨ' Naanga Jizaazai Kɨraazɨtɨyarɨ wɨlamwaaidɨvɨsaihɨrɨna yavɨkariwo.
2Gotɨyai Nɨmwalyɨ Naanga Jizaazai Kɨraazɨtɨyalyɨ sarɨmɨnyɨ yange'na yɨhɨgaimwagika! Gotɨyare kwaamu'nanyabwi yɨhwakika!
Anga Tezalonaaika mwaalyaraavɨna yɨlaaya yesa'nesɨ.
3Neya'mweihi, Gotɨyarɨ wɨdaaza' “Yuyagaa' Tezalonaaika mwaalyara Kɨraazɨtɨyareraavɨna ‘Su! Su!’ gɨthaana!” Nemɨre wɨdaazabwi sabwi tewaanyabulyɨ. Sarɨmɨ Naangerɨ yawɨralɨmwangebwi naanna kuna yadɨvɨsa'najɨ gazaigɨzaigɨ sarɨmɨnyɨdaa'nyarɨ kale naanga kuna gyade'najɨ nemɨre wɨdaazabwi tewaanyabulyɨ. 4Sareihɨrɨna nemɨ yɨlaaya yadaa Gotɨyare kusɨlaanya anga geva gevanyaraavɨ yarai wɨdɨna “Pwara kayaa'na yadaapɨjɨ Tezalonaaika mwaalyara Naangerɨna dɨragɨnna mwaaihasare. Sahwaraavɨ taanga wiadaa'nyɨ Naangerɨ nayaa lɨmwamanɨgasare.” Sara wɨdadaa yɨlaaya yɨvanɨgoihɨlyɨ.
5Sarɨmɨjɨ nayaa dara dɨmanɨgo. Ya, Gotɨyai nemɨnyɨna yɨda'maraangebwina tewaanna yadelyɨ. Sarɨmɨ yawɨ'na “Gotɨyai nayaa nemaremwaalana!” yawɨ'na yadɨvɨ' pwara kayaa'na yɨhyɨvanɨgasaihɨlyɨ. Sare'na Gotɨyai yawɨ'na “Ya, nebulyasɨ. Sahwara nɨmɨre maremwaaidɨnyaba maapɨnera tewaanyaraavɨ wɨmwaaihere.” 6Pwara kayaa'na yɨhyɨvanɨgasara sahwaraavɨ Gotɨyai mɨnya maa'da kayaa'na wiadelyɨ. Sara yade'na sahwai yawɨ'na “Yɨda'nanyasɨ.” 7Gotɨyai mɨnya maaradehaa' nemɨnyɨjɨ kayaa'na yɨhyɨvanɨgasaihɨrɨjɨ gannya kwazaakevɨ nemwaaihadelyɨ. Sɨgunyavɨdaa'nyɨ Naanga Jizaazai gannya ejelɨya dɨragɨnyarajɨ yɨma'naabɨna yadehaa' gannya kwazaakevɨ nemwaaihadelyɨ. Yɨma'naabɨna yadehaa' dɨtaalɨta naangengɨ walaabɨna yojɨ 8pwara Gotɨyarɨna “Naangelyɨ,” majaraavɨ nabaai, nemɨre Naanga Jizaazare yagaala tewaanya' malɨmwagaryaraavɨ yuna mɨnya maa'da kayaa'na wiadelyɨ. 9Sahwaraavɨ yuyagaa'na Gotɨyai marajawɨbwa'na kyojɨ sahwara tɨvɨkɨta maa'dɨvɨ' Naangeryaba mamwaalyɨ yɨpɨ'dere. Naangei dɨragɨnna mwaaladevɨ byaannyavɨ tɨnna mwanganyɨ yɨpɨ'dere. (Yuyagaa' maavewɨ mwaaidɨvɨ' daanga naangevɨ mwaaibɨ'dere.) 10Yɨrɨka savɨ walaabathehaa' gannya tewaanyara yɨlaaya'na wɨdɨna “Naangeigɨnyɨra. Byaannakeigɨnyɨ.” Sagaa' gamɨre dɨragɨnya' tɨnna wanganapɨjɨ gamɨre yagaala tewaanya' lɨmwaga'dɨvɨsara atɨka maru'napɨ'dere. Sahwara yɨlaaya yadaapɨjɨ nabaai sarɨmɨ yɨlaaya jideihɨlyɨ. Nemɨre jalɨkurakya' Kɨraazɨtɨyarɨna lɨmwagesa'na saba yɨlaaya jideihɨlyɨ.
11Sare' yawɨ'daa yuyagaa' sarɨmɨnyɨna Gotɨyarɨ wɨdadaanya'nesɨ. Nemɨre Gotɨyai sarɨmɨnyɨna dara yawɨrana! “Sahwara nɨmɨre wɨjɨvwaramaarya'ne tewaanyara mwaaibɨka! Nabaai tewaanyabwi yɨlaaya nyɨgaide gazabwizabulyɨ Kɨraazɨtɨyarɨ lɨmwagasaburɨne wawɨnya gazasasɨ nɨmɨre dɨragɨnyavɨ yune'na yɨpɨka!” da'mujɨ sareraavɨ wɨmwaaihɨma! “Sara yawɨrana!” dona wɨdadaanyɨ. Sara wɨdadaanyasɨ sarɨmɨnyɨna. 12Gamɨre dɨragɨnyasɨ sarɨmɨ nayaa yapɨjɨya'na pwara dara wangabɨ'de' “O, Jizaazai Naangei daaka! Byaannakei daaka! Gannyara naangera daaka! Byaannakera daaka!” Nemɨre Gotɨyalyɨ Naanga Jizaazai Kɨraazɨtɨyalyɨ yange'na yɨhɨgaimwadi' tewaanna yɨhyadisa'na sara yawɨpɨ'devɨnyɨra.
Currently Selected:
2 Tezalonaaika 1: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.