1 Tezalonaaika 2

Anga Tezalonaaika Polɨ yake'nesɨ.

1Sare' dare'nesɨ. Neya'mweihi, sahwaihi dara yawɨ'mwaa' “Nemɨnyawɨnna Wɨdasaabadera Apozelɨyara angyɨrɨ'maata beva yagaala dɨragɨnya kanede' dɨnona ‘Yagaala kune' mɨ'. Nemɨ mɨdɨnaana!’ ” 2Nabaai dara yawɨ'mwaa' “Anga Pilipaai a'mwera Apozelɨyaraavɨ kayaa'na yeva bɨrala wiesarera.” Sagaa' daanga kanevɨna' kɨrɨ' sarɨmɨnyawɨnna bona nemɨre Gotɨyai dɨragɨnya nemwaaihakeina lɨka myɨ yona Gotɨyare yagaala tewaanya' yɨhɨtho. Pwara nede' “Sabwi mujɨwaakɨpɨna! Mala nayɨhɨramaadɨka!” Sa'na yawɨrona kɨrɨ' lɨka myona dɨragɨnna yɨhɨtho. 3Sare' dare'nesɨ. Sareina yawɨta kayaa'nanya' malɨmwagyadaa gɨrɨkita'nanyabwi myadaa kwaasɨ myɨhɨzadaa Gotɨyarɨna yɨhɨzɨwaako. 4Nemɨ kayaa'na myo. Aawa. Gotɨyai dɨna “Sahwaraavɨ yaamɨjɨ mi'na a'mwe sara nɨmɨre wawɨnya' tewaanna yɨpɨ'de'nanyɨ,” dakabaaibɨ' gamɨre yagaalya' damaarya'neina nemwaaiha'. Sare'na damaryadaa myawɨri “A'mweraavɨ yɨlaaya wigalaana!” Aawa. “Gotɨyai nemɨre sɨmunya wangaderɨ yɨlaaya wigalaana!” dadaa wɨjɨwakadaanyaine. 5Sare' dare'nesɨ. Sarɨmɨnyawɨnna wabwiwayagaalyasɨ mabyo. Yuyagaa' wabwiwayagaala myɨhɨzo. Sara yawɨ'mwaava. Sarɨmɨre gɨlyɨvɨsa maarya'na kwaasɨ yɨhɨthoina mɨ'. Wabarɨnnya' lɨka yulyarya'na yɨhɨthoina mɨ'. Sare' Gotɨyai jalɨkurakɨvanɨkelyɨ. 6Nabaai, majɨna “Tezalonaaika mwaalyara yawɨpɨka! ‘Wɨdasaabadera byaannakera.’ A'mwe pwarajɨ sara yawɨpɨka!” sara majɨ yona yɨhɨtho. Nemɨ Kɨraazɨtɨyare Nedasaabadeinaavɨna “A'mwe naangere,” wɨja' tewaanyasɨ Naangereinaavɨne'na. 7Sara mwaaihoina kɨrɨ' sarɨmɨnyawɨ mwaalona nayaa kave yɨhyo. Kuvɨnaange' gannya kaimɨraayangɨ maremwaaidevaaibɨ' nayaa kave yɨhyo. 8Sarɨmɨnyɨna yɨlaaya sara nevu'nade'na Gotɨyare yagaala tewaanya' yɨhɨtho. Sare' gave'na mɨ'. Aawa. Sarɨmɨnyɨna tewaanya nevu'nade'na dara do. Tezalonaaika mwaalyaraavɨ wɨgaimwagaaza'na balaade'nanyɨ. 9Sare' dare'nesɨ. Neya'mweihi, nemɨ yawɨ'na “Tezalonaaika mwaalyaraavɨre wapaaya saza nagainadɨka! Aane pwai kwarɨ taanga nujavaadɨka! Nemɨnyɨne wapaaya sazanne nɨgwianna wawɨnya yaana!” Sara yawɨ'na yona Gotɨyare yagaala tewaanya' yɨhɨthadaawojɨ tɨnna dara wanganesa' “O, Wɨdasaabadera, Apozelɨyara wawɨnya naanga mɨraagɨkɨ'manɨgasara daaka! Sawɨsagaa' yɨrɨkegaa' yɨvanɨgasara daaka!”

10Sarɨmɨ tɨnna nengadɨvɨ' Gotɨyalyɨ dara jalɨkurake' “Nemɨnyɨna Wɨdasaabadera tewaanyabwi yadɨvɨ' yɨda'maraangebwi nayaa yadɨvɨ' yɨwetawakyabwi myɨvanɨgasarera.” 11Sareina kyo yɨ, ganɨmaanga pwai gannya kaimɨraayangɨ nayaa yadevaaibɨ' nemɨ sarɨmɨjɨya gazarɨzarɨ nayaa yɨhyo'na yawɨ'mwaa'. Sarɨmɨre sɨmunya tewaanna yɨhivaimwagona sarɨmɨre kuryara dɨragɨnna mwaalya'na yɨhɨthadaa dɨragɨnna dara yɨhɨzalɨkurako. 12Gotɨyai yawɨ'na “Sahwaraavɨ maremwaalɨdeinyɨ,” yawɨ'na yaka sarɨmɨnyɨ yɨhɨzɨvwaramaarakelyɨ. “Nɨnnya byaannyavɨjɨ nawɨ'nyaba maremwaaidɨnyavɨjɨ wɨmwaaihɨma!” Gotɨyai sara yɨhɨthahɨlakakerɨna sarɨmɨ nayaa jamarila! Dɨragɨnna sara yɨhɨtho.

13Sare' darevɨnyɨ. Sɨnnawɨ sagaa' Gotɨyare yagaala kyɨhɨtho newɨ'neva myawɨrina “Yagaala a'mweraavɨnesɨ.” Aawa. Yagaala sa' sarɨmɨ maarɨna yeva yawɨ'na “Gotɨyare yagaala nebulyasɨ.” Sara deva Gotɨyare yagaala nebulya' warɨke'na sarɨmɨre sɨmunyangɨ Gotɨyai dɨragɨnna yɨhɨzɨwaakɨvanɨ' Kɨraazɨtɨyarɨ lɨmwadɨvɨsaihi. Sara yesa'na yɨlaaya yona yuyagaa' Gotɨyarɨ wɨdadaanyɨ. Su! Su! 14Sare' dare'nesɨ. Neya'mweihi, Kwaaka Juthɨya mwaalyara Gotɨyare kusɨlaanyangɨyaraavɨne mɨdɨdɨvɨsaihi yɨma'ne'. Yɨ sahwaraavɨ kayaa'na yetabaaibɨ' pwara kayaa'na sara yɨhyesaihɨlyɨ. Juyara kumɨreba Kɨraazɨtɨya Jizaazareraavɨ kayaa'na yetabaaibɨ' sarɨmɨre kwaakevɨ mwaaidɨvɨsara kayaa'na yɨhyesaihɨlyɨ. 15Juya sahwara Gotɨyarɨ wɨ'nawɨjɨwakyaasara pɨropetɨyaraavɨ tamakeva Naanga Jizaazarɨ tamakeva nabaai nemɨnyɨ neramaase'. Sare'na kumɨrebwi Gotɨyai tɨnna wanganaka yɨlaaya mya'. Yɨ a'mwe yuyaraavɨne yɨkamaangere. 16Sahwara yawɨ'na “Ajɨmya yuyangɨyaraavɨ Apozelɨyara nudɨpɨdɨka! Gotɨyai Maaveraavɨ navadaihasamaaradɨka!” deva nede' “Dɨragɨnna yɨhɨthɨwo ‘Yagaala sa' mujɨ jideihɨlyɨ. Nayɨhɨramaadɨka!’ ” Sara yadɨvɨ' a'mwe yuyaraavɨna yɨkamaangera yɨma'nesare. Sarera kunnya kayaa'nanya yune'na yesarera. Kɨrɨ' sareraavɨna Gotɨyarɨ yune'na sɨnna tɨka wɨda'mwakerera.

Polɨ Tezalonaaika mwaalyaraavɨ angyɨrɨ'maata'na yawɨrake'nesɨ.

17Neya'mweihi, nemɨ yɨhyagalya'mavona maalɨkegaa' sarɨmɨjɨ mamwaalyo'na sɨgɨraayarabɨsaina yɨma'noinera. Nemɨ maavewɨ mwaidaa kɨrɨ' nemɨre sɨmunya sarɨmɨnyaba yuyagaa' warɨ'. “Sahwaraavɨ tɨnna wanganaana!” dona savɨna nevu'nada dɨragɨnna yaamɨjɨ yaamɨjɨ yo. Maavewɨ mwaaihasa'na kale neyada 18sarɨmɨnyɨna byɨrɨ'maasa'na dɨragɨnna yaamɨjɨ yaamɨjɨ yoine. Nabaai, sarevɨna Polɨnyɨ gazagaasagaa' “Tezalonaaikana wɨma!” dena yaamɨjɨ kyo Saataanɨ kaanya nerihɨ'daa'nyɨ sarɨmɨnyɨ myɨhwanganyɨwo. 19Sare' dare'nesɨ. Dɨvi Naanga Jizaazai walaabathehaa' gamɨnyawɨ daavɨna yadaa nemɨ yɨlaaya berɨ'na yaadevaka? Be yagaalya' wɨdaathevaka? Naangerɨ yemwaaimanɨgohaa' yɨlaaya aaihwaravaavɨne'na yɨvanɨgona? Sarɨmɨnyɨnanyɨra. 20Yo, sare' dare'nesɨ. Gamɨnyawɨ sarɨmɨ daavɨna yadaapɨjɨ nemɨ yɨlaaya yaade'nanyɨ. Nabaai, “Nemɨ sara kyo dahaa' dava mwaaiha',” yawɨrawaajɨ byaannakeina yɨma'naadeihɨlyɨ.

Currently Selected:

1 Tezalonaaika 2: byr

Highlight

Copy

Compare