1 Tezalonaaika 1

Anga Tezalonaaika mwaalyaihi,

1Polɨnyɨ Saailaazalyɨ Timotilyɨ pɨkarɨyɨkwia da' yavɨkariwa. Kɨraazɨtɨyarɨ lɨmwange'neihi kusɨlaanyavɨyaihɨrɨna yavɨkariwa. Gotɨyai Nɨmwarɨ wɨlamwaaidɨvɨ' Naanga Jizaazai Kɨraazɨtɨyarɨ wɨlamwaaidɨvɨsaihɨrɨna yavɨkariwesɨ.

Gotɨyai yange'na tewaanna yɨhɨgaimwagana! Gotɨyare kwaamu'nanyabwi yɨhwarana!

Tezalonaaika mwaalyara Jizaazare yagaalya' dɨragɨnna lɨmwagesa'nesɨ.

2Yuyagaa' Gotɨyarɨ wɨdadaanyagaa' “Su! Tezalonaaika mwaalyara gɨmɨreraavɨna yɨlaaya gɨmarivanɨgo,” wɨdadaanyɨ. Nabaai, yuyagaa' sarɨmɨnyɨna Gotɨyarɨ wɨdadaanyɨ. 3Sareina nemɨre Gotɨyai Nɨmwarɨ wɨdadaa “Kɨraazɨtɨyarɨ sara lɨmwadɨvɨsa'na tewaanyabwi sara yɨvanɨgava. Gɨmɨnyɨ yɨlaaya yadaapɨjɨ a'mweraavɨna kale wiadaa'nyɨya'na tewaanya mɨraagɨkɨ'manɨgava. ‘Naangei Jizaazai Kɨraazɨtɨyai walaabathelyɨ,’ dadɨvɨ' yemwaaidɨvɨ' dɨragɨnna daa'manɨgava. Su! Su!” Gotɨyarɨ sara wɨdadaanyɨ. 4Sare' neya'mweihi nayaa dara yawɨ'mwo. “Gotɨyarɨ Tezalonaaika mwaalyaraavɨna kale wiadelyɨ. Nabaai sahwaraavɨna ‘Nɨnnyarera,’ dahɨlakɨwakelyɨ,” sara yawɨ'mwo.

5Sare'na Gotɨyare yagaala tewaanya' yɨhɨthonegaa' yaasɨwa' yagaalya'na mɨ'. Aawa. Kurya Tewaanyai dɨragɨnaangei dɨragɨnyainaavɨ kanemwaaiha' dɨragɨnna kyɨhɨtho “Yagaala nebulya yɨhɨthɨvanɨgo,” sarɨmɨ Kɨraazɨtɨyarɨ lɨmwage'. Sagaa' sarɨmɨ dara yawɨre', “Wɨdasaabadera nemɨjɨ mwaaleva tewaanna negaimwamanɨga'. Sarera nemɨnyɨna neyɨvanɨgasare.” 6Sareina yadaawojɨ sarɨmɨ avaaina yage'. Nabaai, Naangei yakabaaibɨ' sarɨmɨ avaaina yage'. Sarɨmɨ Gotɨyare yagaalya' maaresa'na kayaa'nanaanga yɨhye'. Sare' kɨrɨ' sarɨnnya munyɨkaavɨ Kurya Tewaanyai wɨlayɨhɨmwaaidɨsɨ gamɨnyɨna yɨlaaya yadɨvɨ' yagaala sa' maaresaihɨlyɨ. 7Sarevɨdaa'nyɨ tewaanna yadɨvɨ' Kwaaka Maazathonɨya mwaalyarajɨ Kwaaka Gɨriza mwaalyarajɨ Kɨraazɨtɨyareraavɨ sarɨmɨ tewaanna dara wɨjɨwaainesa' “O, Kɨraazɨtɨyareina sana sana yaanneina daaka!” 8Sare' dare'nesɨ. Naangere yagaala wɨdadaapɨjɨ sarɨmɨreba Maazathonɨya yagaala sa' dɨwɨna yaka Kwaaka Gɨriza dɨwɨna. Gavebanyaaina dɨwɨya'ne'na mɨ'. Aawa. Sarɨmɨnyɨna a'mwera kadɨka wɨ'neta yuyaba dara wɨ'nesasɨ. “Tezalonaaika mwaalyara Kɨraazɨtɨyarɨ dɨragɨnna lɨmwamanɨgasare.” Sara deva savɨna nemɨ yagaala pɨnɨ wɨja'ne wawɨnya' mwari'. 9Sare' dare'nesɨ. Kumɨ sara nemɨnyɨ nedɨvanɨga' “Sarɨmɨ Tezalonaaika mwaalyaraavɨ angyɨrɨ'maata kye' tewaanna yɨhɨma'mwa'daa'. Yɨhɨma'mwa'daasara kumɨre kulaka ge gengɨjɨ kwaasɨgotɨyaraavɨjɨ yagalya'maveva Gotɨyarɨ mɨdɨmwa'daa'. ‘Gotɨya Nebulyarɨ wɨdayaadelyɨ yuyagaa' gaala mwaaidei. 10Sɨgunyavɨdaasɨ Gotɨyare Gawaalɨ' walaabathe'na yemwalaana!’ sara dadɨvɨ' Gotɨyarɨ mɨdɨmwa'daa'. Gotɨyare Gawaalɨ' Jizaazalyɨ. Sai kabala' Gotɨyai yɨdɨkaava'. Yɨdɨkaavakei ‘Dɨvi Gotɨyai sahwaraavɨna sɨmɨlɨka nuladɨka!’ daka padaihasamaara'.” Yuyara sara nedɨvanɨga'.

Currently Selected:

1 Tezalonaaika 1: byr

Highlight

Copy

Compare