1 Tezalonaaika 3
3
1Sarevɨdaa'nyɨ sarɨmɨnyɨna yawɨ'daa dɨna “Pɨzɨ'gwa mamwalaanna!” dɨna yona naarɨmɨ yɨlaaya'na dɨna “Anga Aathenɨzɨ gaveinaai mwaalaka!” 2Dɨna yola sarɨmɨnyawɨnna Timotirɨ wɨdasaabɨna. Sahwai Kɨraazɨtɨyarei neya'mwei mwaalaka Gotɨyarɨ wɨdaayadei Kɨraazɨtɨyare yagaala tewaanyavɨne avaaiwawɨnyalyɨ. “Tezalonaaika mwaalyara Kɨraazɨtɨyarɨ lɨmwadɨvɨ' kumɨre kuryara nayaa mwaaibɨ'de'najɨ jɨvaimwade'najɨ duzɨwaakya!” wɨdasaabɨna yoi. 3“ ‘A'mwera kayaa'na kyɨhyapɨjɨ nyagalya'mapɨdɨka! Gotɨyare dɨragɨnya' nayaa dɨlɨmwagyɨla!’ duzɨwaakya!” wɨdasaabɨna yolyainaalyɨ. Sare' dare'nesɨ. Sarɨmɨ dara yawɨ'mwaasa' “Kayaa'na kaneyapɨjɨ nemɨ ‘Wikɨra,’ daaza'na Gotɨyai nedahɨlakakei daaka!” 4Sare' dare'nesɨ. Sɨnnawɨ sarɨmɨnyawɨ mwaalonegaa' dara yɨhɨtho, “Naangerɨna pwara kayaa'na neyɨpɨ'de'nanyɨ.” Sara kyɨhɨtho sara kayaa'na yɨhyɨwaasa' sarɨmɨ yawɨ'mwaa'. 5Kayaa'na yɨhyɨwaasavɨ nɨmɨ dɨna “Pɨzɨ'gwa sara mamwaaimuna!” dɨna yena Timotirɨ wɨdasaabɨna. “Tezalonaaika mwaalyara Gotɨyare yagaalya' nayaa dalɨmwamanɨgava?” dɨna. “Yaamɨjɨ yadei Saataanɨ sahwaraavɨ yaamɨjɨ yada kwaasɨ kudɨwa' kayaa'na yɨpɨja'na daaka? Nemɨre wawɨnya yaasɨwa'wawɨnya nyɨma'nadɨka!” dena wɨdasɨwaabe.
6Dahaasagaa' sarɨmɨnyawɨdaa'nyɨ Timoti nemɨnyawɨnna baka sarɨmɨnyɨna yagaala tewaanya' makabɨna. “Sahwara Naangerɨ nayaa lɨmwadɨvɨ' pwaraavɨna kale wiadere,” makabɨna yɨwa'. Nabaai nedɨwa' “Nemɨ byɨrɨ'maaro'na yawɨ'dɨvɨ' nemɨnyɨna yɨlaaya kuna yɨvanɨga'. Nemɨ dɨragɨnna yawɨ'na ‘Tezalonaaika mwaalyaraavɨ tɨnna wanganaana!’ dɨragɨnna yawɨ'manɨgovaaibɨ' sahwara dɨragɨnna yawɨ'manɨga' ‘Apozelɨyaraavɨ tɨnna wanganaana!’ ” Sara nedɨwa'. 7Sare' darevɨnyɨ. Dava a'mwera kayaa'na kaneye' taanga neyɨvanɨkesɨ. Taanga neyadaasɨ kɨrɨ' neya'mweihi, sarɨmɨ Naangerɨ nayaa lɨmwamanɨgasa'na yɨvaimwannadaa mwaaiho. 8Naangerɨ sarɨmɨ dɨragɨnna wɨlamwaaibɨza'na nemɨ dɨragɨnna mwaaiho'nanyɨ. 9Sare' dare'nesɨ. Sarɨmɨnyɨna kadɨka sara wɨ'nona nemɨre Gotɨyarɨ yɨlaaya naanga yɨvanɨgo. Sarɨmɨnyɨna yɨlaaya naanga yɨvanɨgo'na “Su! Su! Yɨlaaya naanga naanga gɨmarivanɨgo,” Gotɨyarɨ dɨragɨnna wɨdadaanyaine. 10Sawɨsavɨ yɨrɨkevɨ dɨragɨnna wɨdadaa “Tewaanyaraavɨ tɨnna wanganya'na sawɨnna dɨnemakwona! Nemɨ tɨnna dara wanganaade' ‘O, Naangerɨ lɨmwadɨvɨsabwi maalɨ'na yɨvanɨgasabwi daaka!’ Sara dawaajɨ yavada'galya'na dɨnemakwona!” Sara wɨdadaanyainera.
11Gotɨyai Nenɨmaangei gamɨ salyɨ nemɨre Naanga Jizaazalyɨ sarɨmɨnyawɨnna kaanya basamakwika! Sarɨmɨnyawɨnna nemakwika! 12Naangei dɨragɨnna yɨhɨgaimwagozɨ sarɨmɨre sɨmunyangɨ yunebanna kale'ne sabwi dɨragɨnna wakana! Sara kyojɨ sarɨmɨnyɨna nemɨnyɨ kale naanga neyɨvanɨkabaaibɨ' sarɨmɨnyɨ Kɨraazɨtɨyare pwaraavɨnajɨ a'mwe pwaraavɨnajɨ kale naanga yɨhyana! Nabaai, naangave'na kale kuna yɨhyana! 13Sara yojɨ sarɨmɨre sɨmunya dɨragɨnna wakɨna kyojɨ dɨvi Naangei Jizaazai gannya tewaanyarajɨ walaabathehaa' Gotɨyai Nenɨmaangeryaba sarɨmɨ nayaa daavɨna jideihɨlyɨ. Sara kyojɨ yɨwetawakya maayaihi tewaanaangeihi nayaa daavɨna jideihɨlyɨ.
Currently Selected:
1 Tezalonaaika 3: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
