Htoq Ló 20

Târâ Yhâng Nu Raxê

1Haú hkûn, Garai Gasang gi, a-ô mâ é mungdang bànshoq lé sang tô ri.

2“Ngò gi, núngmòq jùn dut nyi é Egutuq ming mai núngmòq lé shuî htoq lo é Sû, núngmòq é Garai Gasang nghut é, haû Yhûmsîng Garai nghut lhê.

3Nàng gi, Ngò mai lai luî#20:3 Ngò mai lai luî gâ é lé, Ngá é hí má ga le ge hpuq lhê., gótû hparà pé lé hkâ-noq.

4Nàng gi, mauhkûng ahtoq tsáng má nyi é nghut nghut, mauhkûng ô myigùng tsáng má nyi é nghut nghut, myigùng a-o tsáng wuì hkaû má nyi é nghut nghut, hai é azòng lé le, náng é matú hparà lhô hkâsaí. 5Nàng gi, haú pé lé hkâ-paî gòp, hkâ noqkuq. Hkâsu mù gâ le, náng é Garai Gasang nghut é, haû Yhûmsîng Garai Ngò gi, manôn sê é Garai Gasang nghut mù, Ngo lé a naù a wom kut é îchyí îwâ pê é yubàk mara dam lé, yhángmòq é shubyi shuké sum myi bán jé shoq byi râ nghut lhê. 6Nghut kôlhang, Ngo lé chyitdàp luî, Ngá é hkunmó pé lé châng é bang lé gi, pyàt bán hkyîng mun jé shoq chyitdàp myìt shit râ nghut lhê.

7Nàng gi, náng é Garai Gasang nghut é, haû Yhûmsîng Garaî é myìng lé akôm má hkâlang. Hkâsu mù gâ le, haû Yhûmsîng Garai gi, Yhâng é myìng lé akôm má lang sû lé, mara a byî é kut râ a nghut.

8Nàng gi, Bánno Buìnyì lé lhoqchyoi lhoqyúng mù, haú nyí lé bûn nyì àq. 9Hkyuq nyí gû gi, nàng mú zui mù, náng é múzó bànshoq lé zui saí ra râ nghut lhê. 10Nghut kôlhang, nyhit nyí nyí gi, náng é Garai Gasang nghut é, haû Yhûmsîng Garaî é matú kut é Bánno Buìnyì nghut ri. Haú nyí má gi, nàng le, náng é byìzo yùqzô pé le, náng é duìnhâng zoshâng yùqgè myiwe wuì le, náng é gaunyhaú pé le, náng é wânghkaû má nyi é byù bíng pé le, hai mú ge zui râ a nghut. 11Hkâsu mù gâ le, haû Yhûmsîng Garai gi, hkyuq nyí gyoro má, mauhkûng eq myigùng, wuìshuq lung-aû eq haú pé má nyi é lhúnglháng lé hpan to mù, nyhit nyí nyí má, Yhang nô yu é nghut ri. Haû mù, haû Yhûmsîng Garai gi, Bánno Buìnyì haú lé shimân byi mù, lhoq chyoiyúng ri.

12Nàng gi, náng é Garai Gasang nghut é, haû Yhûmsîng Garaî èq nang lé byî é maumyî má, chyungxe wó hing nyì sháng gàq, náng nu náng wa lé hkúngga hpautap àq.

13Nàng gi, byù hkâsat.

14Nàng gi, su-myi sulàng hkâlú.

15Nàng gi, zè hkâhkau.

16Nàng gi, náng é yhûmkyochâng é hkyô lé, a têng é sàksé hkâhkám.

17Nàng gi, náng é yhûmkyochâng é yhûm lé myòqnòq é myìt hkâbô. Nàng gi, náng é yhûmkyochâng é yhûmsîng myhí lé le, yhâng é duìnhâng zoshâng yùqgè myiwe wuì lé le, yhâng é no eq loze pé lé le, yhang eq sêng é haí jung lé le, myòqnòq myìt ge bò râ a nghut.” gâ ri.

18Shiwa byu pé gi, maugum gûm é eq lhap hpyat é lé myàng mù, tut htê lé wó gyo luî, bùm haû myihkau hkaû má dùt tô é lé myàng kôjáng, gyùq nán byùq bùm kômù, we we má yàp tô akô nghut ri. 19Haû mù, yhángmòq gi, Mosheq lé, “Nàng shèq ngá-mòq lé nyò àq, ngá-mòq gyo râ nghut lhê. Garai Gasang yhang gi, ngá-mòq lé a nyò sháng gàq, haû a nghut jáng, ngá-mòq shi byùq râ nghut lhê.” ga taî akô.

20Haú hkûn, Mosheq gi, shiwa byu pé lé, “Hkâgyùq kó. Garai Gasang gi, núngmòq lé chyam wú râ matú le, núngmòq mara a kut shut shoq, Yhang lé gyùq hkúnggâ é myìt bo nyì râ matú le, gyó lé é ru nghut lhê.” ga taî ri.

21Haû mù, shiwa byu pé gi, we we má yàp tô akô; haú u, Mosheq gi, Garai Gasang nyi tô é, tîng tîng nòq é mhut hkaû shut chyâng htèp e ló ri.

Hparà Lhô Pé Eq Hkungga Gyàp Pé

22Haú hkûn, haû Yhûmsîng Garai gi, Mosheq lé, “Haû Isira-elaq byu pé lé shî su nghû taí aq; ‘Ngò, núngmòq lé mauhkûng mai dáng nyo é lé, núngmòq yhang myàng bekô nghut lhê. 23Haû mù, Ngò mai lai luî, ngùn hparà hpôlhô nghut nghut, hîng hparà hpôlhô nghut nghut, ge saí râ a nghut.

24Nàng gi, Ngá é matú, myi-tsê èq hkungga gyàp ralhum saí mù, hau é ahtoq má, náng é myi nyhé hkungga eq zùmhkaû hkungga nghut é, náng é sau pé, bainám pé eq no myang pé lé nhông byi aq. Ngò, Ngá é myìng lé láng nhang é jowò hkangmó má, náng chyáng lé mù, nang lé shimân byi râ nghut lhê. 25Ngá é matú, lùqgòk èq hkungga gyàp saî é nghut jáng, kyûng yúng é lùqgòk èq ge saí râ a nghut. Hkâsu mù gâ le, lùqgòk má kyûng é zè chûng jáng, hkungga gyàp lé a chyoiyúng nhâng dùt râ nghut lhê. 26Hau htoq agó, Ngá é hkungga gyàp má dòq é hkûn, náng é hoq jung gùngsho myàng nhâng âbe, zùmhtâng htûng mù hkâdòq.’ nghû àq.

Currently Selected:

Htoq Ló 20: znot

Highlight

Compare

Copy