Htoq Ló 21

Hebre Jùn Pé Eq Sêng É Târâ

1Nàng gi, shiwa byu pê hí má, a-ô mâ é târâ pé lé hkyô to râ dùt lhê. Haú pé gi, 2nàng, Hebre jùn yùqgè rayùq wui yu é nghut jáng, haú yùq lé hkyuq zân wó jûn zo râ nghut lhê. Nghut kôlhang, nyhit zân nghu é zàn gi, yhang haî le a byi râ é za wó lùt htoq ló râ nghut lhê. 3Yhang baú za jùn lé kut é nghut jáng, yhang baú za lùt htoq ló râ nghut lhê; nghut kôlhang, yhang myi eq lé é nghut jáng, yhang myi le, yhang eq rahá bo htoq ló ra râ nghut lhê. 4Yhâng é yhûmsîng hpó gi, yhang lé myiwe byi tso luî, myiwe haû gi, yùqzo byìzo wó é nghut jáng, myiwe haû eq yhang zô pé gi, myiwe hau é yhûmsîng eq sêng byùq râ nghut luî, yùqgè haú yùq baú lùt htoq ló râ nghut lhê.

5Nghut kôlhang, jùn hpó mai, ‘Ngò gi, ngá yhûmsîng hpó lé le, ngá é yhûmsîng myhí eq ngá zô pé lé le chyit é nghut luî, a kâm lùt htoq ló nau é nghut lhê.’ ga taî htoq lo é nghut jáng, 6yhâng é yhûmsîng hpó gi, yhang lé, târâ agyì pê#21:6 Târâ agyi pê gâ é lé, Garai Gasâng é hí má le ge gâ é nghut lhê. chyáng shuî ê ra râ nghut lhê. Yhang gi, hkum má nghut nghut, hkum dúnlhum má nghut nghut, jùn haú lé shuî htoq ê mù, dûn èq yhâng é nohkyap lé htaû htong byi râ dùt lhê. Haú hkûn mai, yhang gi, yhâng é yhûmsîng hpô chyáng, ra-pyàt é jùn kut nyî berâ nghut lhê.

7Byù rayùq, yhâng é byìzo lé, jùn dông ung zô pyâm é nghut jáng, byìzo haû gi, yùqgè jùn su wó lùt htoq ló râ a nghut. 8Yhûmsing é matú ga byìzo haû lé hkyin é yhûmsîng hpó lé, byìzo haû a myìt ngui é nghut jáng,#21:8 Yhûmsing é matú ga byìzo haû lé hkyin é yhûmsîng hpó lé, byìzo haû a myìt ngui é nghut jáng, gâ é lé, Yhâng é yhûmsîng hpó gi, byìzo haú lé yù mù, a dum ô lo dùt é nghut jáng le ge tô lhê. yhûmsîng hpó haû gi, byìzo haú lé túm nhâng mù lhut kat râ dùt lhê; yhûmsîng hpó haû gi, yhâng chyáng myìt i-kyí a zung é yánmai, yhang lé, byù bíng pê chyáng ung byi râ ahkáng wó râ a nghut. 9Yhûmsîng hpó haû gi, yhang zo yùqzô é matú, byìzo haú lé hkyîn byî é nghut jáng, yhang lé, yhang zo byìzo dông kut ra râ nghut lhê. 10Yhang gi, gótû myi-ngê dum yu é nghut jáng, hí lhê myiwe yùq é matú zoshuq, wùtbu wùtmè eq gùngsho ahko ahkáng pé lé ge lhoqyôm byi râ a nghut. 11Yhang gi, hí lhê myiwe haú lé, shî sûm jung a htuqbáng byî é nghut jáng, myiwe haû gi, hai hpau le a tûm é za wó lùt htoq ló râ nghut lhê.

Byù Jum Myìt Chûng Sû Lé Jéyáng Râ Târâ

12Byù rayùq lé bàt sat pyâm é sû gi, sat pyâm é hui ra râ nghut lhê. 13Nghut kôle, yhang, shi-ngé ngé sat é a nghut é za, Garai Gasâng èq dùt nhang é ru nghut le gi, Ngò hkyin masàt tô é gaû é jowò má, yhángmòq ge hpang ê kôrâ nghut lhê. 14Nghut kôlhang, rayùq yùq, shi-ngé ngé hpàqchyî haq htûng mù, góyùq lé sat pyâm é nghut jáng, haú yùq gi, Ngá é hkungga gyàp má hpang jé kôle, yhang lé she htoq yû mù, sat pyám ra râ nghut lhê.

15Yhûmsing é înu îwa lé bàt pyâm é sû gi, sat pyâm é hui ra râ nghut lhê.

16Byù hkaû é sû gi, byù haú lé ûng pyâm é nghut nghut, yhâng é lòq má nyi tô ashî nghut nghut, sat pyâm é hui ra râ nghut lhê.

17Yhûmsing é înu îwa lé nhîng é sû gi, sat pyâm é hui ra râ nghut lhê.

18Byù yhangchang byòq lhum luî, rayùq gi, góyùq lé lùqgòk èq bàt é, a nghut jáng, lòqtsup èq htuî é nghut mù, haû bàt é hui sû gi, a shi byùq kôlhang, yhuphpyang má no lèq mù, 19dum wó toq luî, dumbáng èq wó sô lhing wún é nghut jáng, bàt é sû yùq gi, mara lùt râ nghut lhê; nghut kôle, yhang gi, dàm dap hui sû gyo pyâm é ahkyíng hpau byi mù, gè shoq yâ gè byi râ dùt lhê.

20Rayùq yùq, yhâng é jùn myhí lé nghut nghut, jùn hpó lé nghut nghut, gán-yâng èq bàt mù, haú hkûn yhang shi byùq é nghut jáng, yhang gi, dàm byî é hui ra râ nghut lhê. 21Nghut kôlhang, jùn haû ra í nyí chyungxe dui nyi é nghut jáng, yhang gi, ngun èq wui hpyit to bê sû nghut mù, bàt é jùn sîng hpó gi, mara dam byî é hui nó a ra nghut ri.

22Byù rayùq eq rayùq htîm dàp lhum mù, zogûng dùt é byù rayùq lé záng htung byi luî, myiwe myhí haû zobyaí byaí byùq é nghut kôlhang, yhâng chyáng gótû dàm a dàp é nghut jáng, záng htung byi sû yùq gi, myiwe myhí haú yùq é yhûmsîng hpó taî é eq rajung za, târâ rûng mai hpyit byî é dông yui chyîn byi ra râ nghut lhê. 23Nghut kôlhang, myiwe myhí haû dàm dap byùq é nghut jáng, záng htung byi sû haú yùq lé gi, chyungxê é matú chyungxe xap nhâng, 24myòqjí é matú myòqjí xap nhâng, zui é matú zuì xap nhâng, lòq é matú lòq xap nhâng, hkyi é matú hkyî xap nhâng, 25nyé gyùt é matú nyé gyùt é hui nhâng, dàm dap é matú dàm dap é huî nhâng, bàt pup é matú bàt pup é hui nhâng ra râ nghut lhê.

26Byù rayùq yùq, yhâng é jùn myhí lé nghut nghut, jùn hpó lé nghut nghut, myòqjí htuî htên pyám byî é nghut jáng, myòqjí hau é matú, jùn haú lé lhoqlhut kat ra râ nghut lhê. 27Haû eq rajung za, jùn myhî é zuì lé nghut nghut, jùn hpô é zuì lé nghut nghut, nhuq hkyô pyám byî é nghut jáng, zuì hau é matú, jùn haú lé lhoqlhut kat ra râ nghut lhê.

28Nohtó radu du, myiwe lé nghut nghut, yùqgè lé nghut nghut, htûng sat é nghut jáng, nohtó haú lé lùqgòk èq dú sat pyám ra râ nghut lhê; hau é sho lé le ge zo râ a nghut. Nghut kôlhang, nohtó yhûmsîng gi, hai wò a yù râ nghut lhê. 29Nghut kôle, nohtó haû gi, byù lhaq htûng é nohtó nghut mù, nohtó yhûmsîng lé le sidìq byî wú bê nghut kôlhang, a lhúng a zúng kut é nghut luî, yùqgè lé nghut nghut, myiwe lé nghut nghut, nohtó hau èq htûng sat é nghut jáng, nohtó haû lùqgòk èq dú sat pyâm é hui ra râ nghut é htoq agó, hau é yhûmsîng hpó le sat pyâm é hui ra râ nghut lhê. 30Nghut kôlhang, yui chyîn jaí râ dông hpyit byi kô é nghut jáng, nohtó yhûmsîng gi, jaí nhang é myhó jaí mù, yhûmsing é chyungxe lé ge hkyi yù râ nghut lhê. 31Góyuq é yùqzo byìzô pé lé htûng sat byi jáng le, târâ shî lé chûng ra râ nghut lhê. 32Nohtó radu du, jùn myhí lé nghut nghut, jùn hpó lé nghut nghut htûng sat pyâm é nghut jáng, nohtó yhûmsîng gi, jùn sîng hpó lé ngùnhtung myi rûng byi ra râ nghut lhê; nohtó haú lé gi, lùqgòk èq dú sat pyám ra râ nghut lhê.

33Byù rayùq yùq, dong dû tô é nghut nghut, dong du mù a nghop tô é nghut nghut kut luî, haú má, no a nghut jáng, loze byìt gyó wang é nghut jáng, 34dong dû hpóng sû haû gi, no loze yhûmsîng lé yui chyîn xap ra râ nghut lhê. Yhang gi, yui chyîn xap jáng, shî màng ge yù râ nghut lhê.

35Byù rayùq yùq é nohtó gi, góyùq é nohtó lé htûng sat pyám byî é nghut jáng, no yhûmsîng nhik gi, haû a shi é no lé ûng pyám mù, ngùn gam yu lhum ra kôrâ nghut lhê. Shi byùq bê no mâng lé le, rawuí za kut gam yù ra kôrâ nghut lhê. 36Nghut kôle, nohtó haû gi, lhaq htûng é no nghut to gû wá, nohtó yhûmsîng gi, a lhúng kut é nghut jáng, yhang gi, nô é matú no byi ra râ nghut lhê; haû jáng, shi byùq bê no mâng lé, yhang ge yu ló râ nghut lhê.

Currently Selected:

Htoq Ló 21: znot

Highlight

Compare

Copy