Htoq Ló 19
19
Sinaq Bùm Mâ É Hkyô
1Isira-elaq byu pé Egutuq ming mai htoq lo é htâng lha-mó sum hkyap hkyap sânghî nyí má yhang, yhángmòq gi, Sinaq Yòso má jé akô nghut ri. 2Yhángmòq gi, Rehpidim mai htoq luî, Sinaq yòso má wang ló kômù, bùm hí mâ é yòso má jowò hkyô akô nghut ri.
3Haú htâng, Mosheq gi, Garai Gasâng chyáng dòq ló ri; haû Yhûmsîng Garai le yhang lé bùm mai wùt mù, taî é gi, “Yakup é awùt ashín, haû Isira-elaq byu pé lé, nàng îsu nghû taí kyô ra râ nghut lhê; 4‘Egutuq byu pé lé Ngò hkâsu kut é hkyô lé le, zun é dùng mai wàq é su núngmòq lé wàq mù, Ngá chyáng shuî yu é hkyô lé le, núngmòq yhang sê lhê. 5Ahkuî, núngmòq gi, Ngá é jì-no hkyak gyo kó luî, Ngá é dangshikaq lé cháng kô é nghut jáng, byù myû bànshoq hkaû mai Ngò sing é bang dùt kôrâ nghut lhê. Myìdàm gón gi, Ngá é nghut kôlhang, 6núngmòq gi, Ngá é matú hkyangjông pê é mîngdán eq chyoiyúng byù myû dùt kôrâ nghut lhê.’ nghû àq. Dang shí pé gi, Isira-elaq byu pé lé nàng taí râ dang pé nghut lhê.” gâ ri.
7Haû mù, Mosheq gi, taû ló luî, shiwa byu pê é sûwún wuî lé ji tsîng yù mù, haû Yhûmsîng Garaî èq yhang lé hkunmó hkyó luî taí nhang é dang bànshoq, yhángmòq lé taî kyô ri. 8Haû shiwa byù bànshoq bang gi, “Haû Yhûmsîng Garai taî é jung hkangmó lé ngá-mòq kut râ nghut lhê.” ga chôm tû taî akô. Haû mù, Mosheq gi, yhángmòq tû taî é dang lé, haû Yhûmsîng Garaî chyáng lé taî kyô ri.
9Haû Yhûmsîng Garai gi, Mosheq lé, “Haû shiwa byu pé gi, Ngò, nàng eq nyo nyi é lé wó gyo mù, hkâ-nhám le nang lé lùmjíng kó sháng gàq, Ngò gi, htu é mhuthtui hkaû mai náng chyáng lé jé râ nghut lhê.” ga taî ri. Haú hkûn, Mosheq gi, shiwa byu pé taî é dang lé, haû Yhûmsîng Garai lé taî kyô ri.
10Haû mù, haû Yhûmsîng Garai gi, Mosheq lé, “Haû shiwa byu pê chyáng ló mù, hkû-nyí eq nàpmá gyoro má yhángmòq lhoqchyoi lhoqyúng yû luî, yhángmòq é mèbu lé chî pyám nhâng àq. 11Yhángmòq gi, sum nyí nghu é nyí má rì rì kut to kó sháng gàq; hkâsu mù gâ le, haú nyí má, Yhûmsîng Garai gi, shiwa byù bànshoq bâng é myòq hí má, Sinaq Bùm má gyó lé râ nghut lhê. 12Bùm hau é lhînghkyùq má, shiwa byu pé a wó lai râ kyo kat to mù, yhángmòq lé, ‘Bùm haú má a ê dòq kut é htoq agó, bùm hkyî má a ê záng shoq sidìq keq. Bùm haú má ê záng sû ó yùq nghut kôle, sat pyâm é hui ra râ nghut lhê. 13Haú yùq lé gi, lòq èq a záng é za, lùqgòk èq dú sat é, a nghut jáng, myoshî èq bìk sat é kut ra râ nghut lhê. Byù nghut nghut, shigu gaunyhaú nghut nghut, chyungxe ge duì nhang to râ a nghut.’ nghû taî kyo aq. Tut htê myáng myáng mùt myhíng jáng za shèq, bùm haú má yhángmòq wó chyâng htèp dòq ê râ nghut lhê.” ga taî ri.
14Mosheq gi, bùm haû mai shiwa byu pê chyáng gyo jé é htâng má, yhángmòq lé lhoqchyoi lhoqyúng byî é nghut luî, yhángmòq gi, yhûmsing é mèbu pé lé chî yúng bekô nghut ri. 15Hau htâng, yhang gi, shiwa byu pé lé, “Yhûmsing gùng yhûmsîng sum nyí nyí lhê é matú hen to keq. Gùngsho hkâzûm yàp kó.” ga taî ri.
16Sum nyí nyí nàpkyó lé, maugum gûm lhê, lhap hpyat lhê dùt é htoq agó, bùm haú má htu dik é mhut nghop to mù, htê mó o mó yhang tut htê mying nyi ri. Wàp má nyi tô é yùq hkangmó gi, gyùq nán byùq bùm bekô nghut ri. 17Haú hkûn, Mosheq gi, Garai Gasang eq shuî hui râ matú, shiwa byu pé lé wàp mai shuî htoq e é nghut mù, yhángmòq gi, bùm hkyî má ê yàp tô akô nghut ri. 18Haû Yhûmsîng Garai gi, bùm haú má myi eq gyó lé lo é nghut mù, Sinaq Bùm haú má myihkau htup to bê nghut ri. Myihkau haû gi, myi bunghkyûng mâ é myihkau su bùm haú mai htuî rhîn htoq lo é nghut mù, bùm haû gi, gyai yhang nún byùq bê nghut ri. 19Tut htê gi, je riyhang mying hûm lo é hkûn, Mosheq nyo kat é nghut luî, Garai Gasang gi, yhang lé tu byî ri.
20Haû Yhûmsîng Garai gi, Sinaq Bùm nyuq má gyó lé luî, Mosheq lé bùm nyuq haú má wùt yu ri. Haû mù, Mosheq gi, haú má dòq ló ri. 21Haú hkûn, haû Yhûmsîng Garai gi, yhang lé, “Shiwa byu pé gi, haû Yhûmsîng Garai lé wú râ ga chyûn wang lé kôluî, myo myo shi byùq é a hui kó sháng gàq, nàng gyó ló mù, yhángmòq lé ló taî pun taî kying aq. 22Haû Yhûmsîng Garaî chyáng huî htèp lé é hkyangjông pé lháng, yhûmsing gùng yhûmsîng lhoq chyoiyúng ra râ nghut lhê; haû a nghut jáng, Yhûmsîng Garai gi, yhángmòq lé dam mó byi râ nghut lhê.” ga taî ri.
23Mosheq gi, haû Yhûmsîng Garai lé, “Haû shiwa byu pé gi, Sinaq Bùm má a wó dòq lò kôrâ nghut lhê. Haî mù gâ le, Nàng yhang, ‘Bùm hau é lhînghkyùq má a wó lai râ kyo kat mù, chyoiyúng bùm dông kut to aq.’ ga sidìq byî tô é nghut lhê.” ga taî ri.
24Haû Yhûmsîng Garai gi, “Gyó ló mù, nàng eq rahá Arun lé ló shuî lò àq. Nghut kôlhang, hkyangjông pé eq shiwa byu pé gi, haû Yhûmsîng Garai chyáng a ge chyûn dòq lò kôrâ nghut lhê; haû su kut kôjáng, Yhang, yhángmòq lé dam mó byi râ nghut lhê.” ga tû taî ri.
25Haû mù, Mosheq gi, shiwa byu pê chyáng gyó lé mù, yhángmòq lé ló taî kyô bê nghut ri.
Currently Selected:
Htoq Ló 19: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
