HEBREOS 12

Ñamae avei Jesús re

1Jáeramo, ñanoi ko jeta yae omae yanderé vae yandeɨ́vɨri rupi, Jáeramo yamombo yandeyeugüi opaete yandemboavai vae jare yandeyoa, jare ñañoñókuai yandepɨa guasu reve yanderenonde kotɨ ñoñókuai ñanoi vae. 2Jare ñamae avei Jesús re, mborogüɨrovia iyapoa jare jae vi ombokavi. Jae tuicha güɨropɨa omano vaerä kurusu re, oyandúä oiporarauka chupe vae reta pe. Jare oguapɨ oï Tumpa iyakatu kotɨ.#Flp 2.6-11; Heb 2.9.

3Peyemongeta Jesús re, kërai iyoa vae reta ikavimbae vae jei yave ikotɨ, oiporara yae, agüɨye vaerä pepɨtu pegüɨapi regua. 4Echa pe reta mbaetɨño pemano mbaeyoa ndive peñeraroa pe. 5Jare peakañɨ ma Tumpa pemboarakuaa taɨ rami vae güi, jei reve:

“Cheraɨ, agüɨye eröɨro ndeYa oiporarauka ndeve yave,

agüɨye vi ndekuérai omboeta ndeve yave.

6Echa ndeYa, oaɨu vae ombosɨmbi ko;

oinupa vi taɨrä oyapo vae.”#Job 5.17; Pr 3.11-12.

7Peropɨa yembosɨmbi, Tumpa omaeta peré taɨ rami, echa ¿oime pa kia mbaetɨ taɨ ombosɨmbi vae? 8Echa mbaetɨ yave pembosɨmbi, opaete taɨ reta oyapo rami, mbaragüe ko pe, taɨä ko jayave. 9Añete ko, yanderu reta ɨvɨ pegua yandembosɨmbi ko, jare yamboete. Jayave ikavi ko ñañeñono vaerä yandeRu ara pegua ipo pe yaikove vaerä. 10Echa yanderu ɨvɨ pegua yandembosɨmbi michi peguaño jae oipota vae rupi. Ërei yandeRu ara pegua yandembosɨmbi ikavi vaerä yandeve, yaiko vaerä ikɨambae jae rami. 11Añete ko, yembosɨmbi pe ñaï yave, yandepɨatɨtɨ ko, mbaetɨ ko yayerovia. Ërei taɨkue rupi yaikuaa yandemborɨ yayapo vaerä jupi vae yandepɨakatu reve.#Dt 8.5; 1 S 7.14; 1 Co 11.31-32.

Tumpa ipɨakavi güɨröɨro vae reta

12Jáeramo, pemopüa pepo ipɨtu vae reta jare petava omɨimbae vae.#Is 35.3. 13Peyapo kavi pepɨ japerä, agüɨye vaerä pepia tape güi, jaeño pekuera.

14Pepɨakatu opaete vae ndive, jare peñeñono tee Tumpa pe. Echa jokuaembae reve ngaraa etei kia oecha yandeYa. 15Jare pemae kavi agüɨye vaerä kia pe ave oata Tumpa ipɨakavi; agüɨye pemboɨpɨ peñomotareɨ peyomboavai vaerä, jare jeta#Dt 29.18. vae re ova jókuae; 16jare peyeandu agüɨye vaerä oï pepɨte pe aguasa oyapo vae, jare agüɨye vaerä oï pepɨte pe omboeteä oñeñono tee Tumpa peguarä vae, Esaú rami. Echa Esaú omee tembíu re membɨrɨpɨ yekou.#Gn 25.29-34. 17Jare peikuaa kërai taɨkue rupi Esaú oipota tëi güɨnoi ñee kavi tu güi, ërei mbaetɨ ma oñemee chupe, yepe tëi oyerure jese oyaeo reve, ërei mbaetɨ ma mbae ipuere oyeapo.#Gn 27.30-40.

18Ërei pe reta mbaetɨ ko peya ɨvɨtɨ guasu Sinaí re, jókuae jendɨ vae re, pɨtumimbi jare ɨvɨtuai re, 19mbaetɨ peendu mimbɨguasu iñee jare Tumpa iñee oyeendu vae, jókuae oendu vae reta oyerure Moisés pe agüɨye vaerä ma Tumpa imiari chupe reta,#Ex 19.16-22; 20.18-21; Dt 4.11-12; 5.22-27. 20echa mbaetɨ güɨropɨa reta Tumpa iporookuai, jei yave: Metei mɨmba opɨ̈ro yave kuae ɨvɨtɨ guasu re, tomano ita pe#Ex 19.12-13. ani toñeɨ̈vo mii raɨ pe. 21Jare jókuae oyekuaa vae yavaete yae ramo Moisés jei: “Arɨrɨi yae akɨɨye ramo.”#Dt 9.19.

22Ërei pe reta peya ma ɨvɨtɨ guasu Sión re, Tumpa oikove vae jëta guasu re. Jae ko Jerusalén ara pegua, araɨgua reta jeta yae ñogüɨnoia re, 23Tumpa taɨ tenondegua reta jee oñemoapɨta oï ara pe vae reta re, Tumpa re, opaete vae ojäa vae, kuimbae reta Tumpa ombojupi vae reta iespíritu re, 24jare Jesús re, oporomoñoövaiti morogüɨrökuavee päve ipɨau ndive vae re, jare Jesús jugüɨ yandetɨo vae re, jókuae tugüɨ ikavi yae Abel#Gn 4.10. jugüɨ omee vae güi.

25Jáeramo peyeandu, agüɨye peäteɨ peyeapɨsaka imiari yandeve vae re, echa mbaetɨ ojoyepe jókuae ñäteɨ oyeapɨsaka kuae ɨvɨ pe omboarakuaa tëi vae reta, vɨtei pa yande ñaneäteɨ yayeapɨsaka yave ara güi yandemboarakuaa vae re.#Ex 20.22. 26Jókuae ara Tumpa iñee omokana ɨvɨ. Ërei añave jei körai: “Mbaetɨta amokana ye ɨvɨño, ara vi amokanata.”#Hag 2.6. 27Jókuae “metei vese ye” jei vae oipota jei, Tumpa oekɨta ipuere okana vae reta, jae oyapogüe reta, opɨta vaerä jókuae ipuerembae oñemomɨi vae reta. 28Jare Tumpa omee yandeve iporookuaía mbaetɨ ipuere oñemomɨi vae, jáeramo ñamee yasoropai Tumpa pe ipɨakavi re, yambopɨakatu reve yayeokuai chupe yamboete jare yaipoɨu reve; 29echa ñaneTumpa ko tata opaetei oapɨ mbae oeya vae rami vae.#Dt 4.24; 9.3; Mt 3.12; 2 Ts 1.7-8.

Currently Selected:

HEBREOS 12: GUABD

Highlight

Copy

Compare