HEBREOS 13

Oporogüɨrovia vae reta jeko

1Peyoaɨu päve avei. 2Pemboresive kavi avei mboupa, echa jökorai amogüe reta omboresive araɨgua#Gn 18.1-8; 19.1-3; Ro 12.13; 1 P 4.9. jo pe oikuaambae reve.

3Pemaendúa tembipɨɨrɨru pe ñogüɨnoi vae reta re, peï vi jae reta ndive rami. Pemaendúa vi oyererekoasɨ katu vae reta re, pe reta etei vi peiporara peï rami.#Mt 25.35-46.

4Opaete vae tomboete menda, agüɨye tomongɨa menda vae, echa Tumpa ojäata aguasa oyapo vae reta jare menda re oyuvanga vae reta.

5Agüɨye peipotarai korepoti.#1 Ti 6.6-10. Peyerovia mbaembae penoi vae re, echa Tumpa jei: “Ngaraa poeya peangarekoambae.”#Dt 31.6,8; Jos 1.5; Flp 4.11-13. 6Jáeramo yandepuere yae yakɨɨyembae reve körai:

“YandeYa ko chemborɨ vae.

Ngaraa akɨɨye mbae oyapota cheve vae güi.”#Sal 56.3-4,9-11; 118.6.

7Pemaendúa oyangareko peré vae reta omombeu Tumpa iñee peve vae re. Pemae kërai yogüɨreko vae re jare pemomoe jae reta iporogüɨrovia.

8Jesucristo ko oyepoepɨmbae etei iyɨpɨ güive, añave jare jekuae avei pegua. 9Agüɨye peñemaeño peyererajauka oipotagüe mboromboe ambuaeyee vae pe; ikavi ko ñañemomɨ̈rata yandepɨa peTumpa ipɨakavi rupi, mbaetɨ mborookuai reta tembíu regua rupi. Echa mbaetɨi oporomomɨ̈rata jókuae mbaembae reta. 10Yande ñanoi metei mɨmba oyeyuka oñemee jese vae, joko pe mbaetɨ ipuere okaru sacerdote reta o guakapi pegua pe oparavɨkɨ vae reta. 11Echa sacerdote tenondegua ete güɨroike mɨmba oyeyukagüe mbaeyoa re vae reta jugüɨ o mbaemboetea pe, ërei jetegüe oyeapɨ ikatu pe.#Lv 16.27. 12Jáeramo Jesús vi oiporara mano tëta guasu güi ikatu pe, ñaneñono tee vaerä Tumpa peguarä jae jugüɨ rupi. 13Jáeramo yaja ikotɨ tëta guasu güi ikatu pe, yaiporara vi ñereröɨro Jesús rami, 14echa mbaetɨ ñanoi metei tëta guasu jekuae avei pegua vae kuae ɨvɨ pe, ërei yaeka ko jókuae tëta guasu outa vae. 15Jáeramo yamboete avei Tumpa Jesús rupi, kuae oipota jei yamboete Tumpa yandeyuru pe.#Lv 7.12; Sal 50.14,23; Os 14.2. 16Ërei agüɨye ñaneäteɨ yayapo vaerä ikavi vae jare yayomborɨ päve vaerä; echa kuae nunga ko omboyerovia Tumpa.

17Peñeereendu oyangareko peré vae reta pe jare peiko jae reta jeia re, echa jae reta oyangareko oï perekove re, oikuaa reve Tumpa ojäata ko iparavɨkɨ re; jökorai peyapo yave, jae reta oparavɨkɨta Tumpa pe oyerovia reve, ipɨatɨtɨmbae reve, echa ipɨatɨtɨ reve oparavɨkɨ Tumpa pe yave, ngaraa jaekavi.

18Peyerure Tumpa pe oreré. Echa roikuaa jekuaeño royapo ikavi vae pekotɨ. Jekuaeño roipota royapo jupi vae. 19Jare che pomoñera yae peyerure vaerä Tumpa pe, jae chemondo ye vaerä jarembaeño pépɨri.

Tamaraeme reta

20Tumpa mbɨakatu omee vae, yandeYa Jesucristo omoingove ye omanogüe reta ipɨte güi vae, vecha reta iyangarekoa tuichagüe vae,#Is 40.11; Ez 34; Lc 15.4-5; Jn 10.1-16. tugüɨ morogüɨrökuavee päve opambae vae pegua rupi vae, #Ex 24.8; Heb 10.29. 21tapembojupi opaete mbae pe, peyapo vaerä jemimbota; Tumpa toyapo yanderé oipota vae Jesucristo rupi; ¡toyemboete Cristo jekuae avei rupi! ¡Amén!

22Cherɨvɨ reta, pomoñera peropɨa vaerä kuae mbovɨ yemboarakuaa aikuatía peve vae. 23Tamombeu peve yanderɨvɨ Timoteo oë ma tembipɨɨrɨru güi. Jae ou yave ɨmambae, arajata cherupíe aja pépɨri yave.

24Tamaraeme toñogüɨnoi opaete peangarekoa reta jare opaete oporogüɨrovia vae reta. Italia pegua reta vi omondo peve tamaraeme.

25Tumpa ipɨakavi toï opaete pe ndive. ¡Amén!

Currently Selected:

HEBREOS 13: GUABD

Highlight

Copy

Compare