Mako 5

1Lomba ŵalificile bwisilya bwacisiŵa, kucalo caŵaGadala. 2Peŋka, ili ŵafumine mubwato, impindi iyo yopele, alikumene naŵo umuntu uwali nemupasi uŵipile, uwafumine mumicembo yafilende, 3uwalukwikala mweŋka mumicembo yafilende; tapali-po awantu neli umo uwaisiŵile-po ukumukaka neli nikuminyololo, ŵalimufililwe akale; 4pakuti alukukakwa liŵili liŵili nemyando neminyololo; sombi alukwikonona iminyololo, nemyando nekwiputala; peŋka tapali-po umuntu uwamakosa akumukomeka; 5nempindi yonse neŵusiku nekasuŵa mumicembo napamapili alukuŵilicisya, nekulukulikopala kumabwe. 6Peŋka ye pakuŵaŵona ŵaYesu ukutali, waliŵutucile, nekuŵalambila; 7nekuŵilicisya nesiwi ilikulu, nekweŵa'ti: Mbasyani ciŵele pali neŵo namweŵo, mweŵaYesu, mweŴana ŵaŵaLesa Aŵo Aŵacilile? Ndukumulapisyeni kuli ŵaLesa ati mwiŋkululusya neŵo! 8Peŋka kale ŵaYesu ŵalaŵile kuli ve ati: Wemupasi uŵipile, fuma-mo mumuntu uyu! 9Naŵo ŵalimwipwisye ati: Mbesina lyoŵe niwenani? Nave nekuŵaasuka ati: Isina lyanji nineLejo, pakuti tuli ŵenji. 10Naye nekuŵakombetela ukwakuti ati: Mwitutamfya-mo mucalo.

11Uko kweŋka apa lwakuneme ulupili pali itaŋga lyaŋkumba ilikulu ukulukulya. 12Peŋka ifyo-fiŵanda fyaliŵakombetele ati: Mututume kuŋkumba ati twinjile muli syo. 13Naŵo nekufisumina. Peŋka imipasi iŵipile yalifumine-mo, nekwinjila muŋkumba: netaŋga nalyo lyalikuŋkulucile mumukolo wacisiŵa; ukusipenda syali koti myanda amakumi aŵili; nasyo syalifwile mucisiŵa. 14Lomba aŵalukusyembela ŵaliŵutucile, nekutwala iceŵo ico kumusi nakumitala; peŋka neŵantu nekwisa mukufiŵona ifyo ifyacitilwe. 15Naŵo ŵaliisile kuli ŵaYesu, nekuŵona uyo uwaiketwe nefiŵanda, aliikele, alifwite, muntunsi, ewopele uwali neŵumba lyafiŵanda; lomba naŵo nekutina. 16Lomba aŵafibwene-po ŵaliŵaŵulile ifyo ifyacitilwe kuli woyo uwali nefiŵanda, nefyaŋkumba. 17Lomba ŵo ŵalitaticile ukuŵakombetela ati ŵafume-mo mumitala yaŵo.

18Peŋka pakwinjila ŵo mubwato, uyo uwaiketwe akale nefiŵanda waliŵakombetele ati: Njikale nenu. 19Sombi naŵo taŵamusumine-po, sombi ŵalimweŵele ati: Koya kunanda yoŵe nakuŵaŵyoŵe, ukaŵaŵule ifyafintu ifikulu ifi ŵakucitile ŵaSikulu, nefyaŋkumbu ŵakucitile. 20Peŋka ye alikumbulucile, nekutatika ukutulisya muDekapoli ifyo-fintu ifikulu ifyamucitile ŵaYesu; neŵantu ŵonse naŵo walukukaŋkamana.

21Lomba ŵaYesu ili ŵaaŵucile liŵili mubwato ukubwelela bwisilya, lyaliŵuŋgene kuli ŵo iŵumba ilikulu: naŵo ŵali pamumba yacisiŵa. 22Lomba yaliisile imbi impemba iyamwisunagoge, isina lyaiyo nilailo: nayo, ili yaŵabwene ŵaYesu, yaliwilile muceni caŵo, 23nekuŵakombetela ukwakuti ukweŵa ati: Umwana wanji umwanakasi umwanice ali apepi ukufwa! Iseni, mukaŵike-po iminwe yenu pali ye ati atenduluke, nekulukwikele nemweo. 24Naŵo ŵaliile nakwe, neŵumba ilikulu nekuŵalonda, nekulukuŵasininci sya.

25Lomba nemwanakasi umbi uwali neŵulwele ubwakuswe'milopa imyaka ikumi naiŵili, 26nekusomenwa kufintu ifinji kuŵalaye aŵenji, nekulukuposaila amaŵoni akwe onse, uwakuŵulo'kukosa neli panini, sombi uwulwele bwakwe nekulukukula lukoso. 27Peŋka, pakumfwa ifyakuli ŵaYesu, aliisile panuma mwiŵumba, nekukuma-ko kucakufwala caŵo; 28pakuti alukweŵa ati: Kani nakukuma-ko lukoso kufyakufwala fyaŵo, nakupuluka. 29Lomba impindi iyo yopele, kuntulo yamilopa yakwe nekupwa; peŋka ye nekumfwa mumuŵili ati natenduluka kuŵulwele.

30Lomba ŵaYesu ŵalipulilile ukwisiŵa aŵene ati amakosa afuma-mo muli neŵo, nekusyololoka mwiŵumba nekwipusya ati: Mbaninani uwakuma-ko kufyakufwala fyanji? 31Lomba aŵasambile ŵaŵo ŵaliŵaasucile ati: Mulilibwene iŵumba lilukumusinincisyeni, syani kaŵili mulukwipusya ati: Mbaninani uwaŋkuma-ko? 32Naŵo ŵalicencentele ponse ponse mukumufwaya uyo uwacitile'fyo. 33Sombi uyo-mwanakasi, ili atinine nekututuma, pakuti pakufiisiŵa ifyacitilwe kuli ye, aliisile nekuwila pansi pamenso aŵo, nekuŵaŵula fyonse'fyo ifyacine. 34Sombi naŵo ŵalilaŵile kuli ye ati: Wemwana wanji, ukucetekela koŵe kwakupulusya; uye neŵutende, ulukwikele upulucile kukulwala koŵe.

35Peŋka, ili ŵacilaŵila, ŵaliisile aŵafumine kwaŵo impemba iyamwisunagoge, nekulaŵila ati: Umwana wenu wafwa! Mbanindo mulukuŵakatasisya Aŵasambisi nafimbi? 36Sombi ŵaYesu, pakumfwa amasiwi alaŵilwe, ŵalipulilile ukulaŵila kumpemba iyamwisunagoge ati: Mwitina, mucetekele lukoso! 37Naŵo taŵasumine-po aŵantu ukumulonda, sombi ŵeŋka ŵaPetilo, naJakobo, naYoane umukwaŵo Jakobo eŵo ŵasumine. 38Peŋka nekufika nakunanda yampemba iyamwisunagoge; nekusaŋga nikucipupa, nekulukulila ukwakuti, nemisowa. 39Naŵo, pakwinjila, ŵalilaŵile kuli ŵo ati: Mbanindo mulukucitile' cipupa, nekulukulila? Taafwile-po umwanice, woyu: alilele lukoso! 40Lomba ŵo ŵaliŵasekele ukuŵapufya; sombi naŵo nekuŵafumya ŵonse, nekupinta ŵawisi naŵanyina naŵaŵo aŵo ŵali naŵo, nekwinjila umo umwali umwanice uyo. 41Peŋka'po ŵalimwikete umwanice kuminwe, nekulaŵila kuli ye ati: Talita kumi-akwaluka ati: Wemwanice, ndukukuŵula ati, Ŵuka! 42Naye umulindu aliŵucile bwaŋgu, nekulukwenda, pakuti imyaka yakwe yalikumene ikumi naiŵili. Peŋka naŵo ŵalikaŋkamene nekukaŋkamana ukwakuti. 43Naŵo ŵa Yesu ŵaliŵafundile ukwakuti ati aŵantu ŵonse tekucumfwa iceŵo ici neli umo; popele ŵaliŵaŵulile ati: Mumupele ukulya.

Currently Selected:

Mako 5: AAL59

Highlight

Copy

Compare