Mako 6

1Peŋka'po ŵalifumine-ko uko, nekufika kucalo cakwaŵo; neŵasambile ŵaŵo nekuŵalonda. 2Lomba, ili aficile sabata, ŵalitaticile ukulukusambisya mwisunagoge: peŋka aŵenji aŵalukuŵomfwa walikaŋkamene nekwipusya ati: Mbanikwisa fyafume'fi ifili nawuyu? Mbasyani amano apelwe kumuntu uvu, nayiyi-milimo ikulu ilukucitwa kuminwe yakwe? 3Kansi taali nikalipentala uyu, umwana wakwe Maliya, nemukwaŵo Jakobo, na Iose, naJuda, naSimoni? Neŋkasi syakwe nasyo kansi tasili nafweŵo pano? Naŵo ŵalukulitutula pakuti pali ŵo. 4WaYesu naŵo ŵalilaŵile kuli ŵo ati: Uwakusimika taaŵula-ŵuleme, sombi nimucalo cakwaŵo, napakati paŵakwaŵaŵo, namwaŵo mopele, emo aŵulo'ŵuleme. 5Lombo'ko taŵaisiŵilepo ukucita imilimo ikulu, sombi paŵaIwele aŵace ŵaliŵicile-po iminwe yaŵo, nekuŵatendulusya. 6Naŵo ŵalikaŋkamene pakuti pakukanika kwaŵo.

Eli ŵalukwenda-enda mumisi, nekulukusambisya.

7Peŋka'po ŵaliŵetile aŵo ikumi nawaŵili, nekutatika ukuŵatuma ŵaŵili ŵaŵili; nakaŵili ŵaliŵapele uŵukulu ubwapamipasi iŵipile; 8nekuŵalaya ati: Tekupinta-po akantu akapalwendo, neli nisiŋkwa, neli lifukuta, neli nindalama mucipokolo, sombi niŋkoli veŋka; 9sombi mulukufwala iŋkwawilo; tekufwala iminjila iŵili. 10Peŋka nekuŵeŵa ati: Munanda syonse'syo isi mukenjila-mo, emo mukekala, ili tamuŋgaya. 11Apo ponse apa taŵakamupokeni, neli kumumfweni, pakufuma-po, mukalukukuntako ikuŋgu kumakasa enu, akesiŵilo kuli ŵo. 12Peŋka naŵo ŵaliile, nekulukutulisya ati aŵantu ŋgawaaluluke. 13Naŵo ŵalukufitamfya-mo ifiŵanda ifinji, nekulukuŵasufya nemafuta aŵalwele aŵenji, nekuŵaŵusya.

14Lomba imfumu Elode yaliumfwile' fyo, pakuti isina lyaŵo lyalitulicile; nayo ati: Yoane uwakuŵatisya aliŵucile pamfwa, pakuti pali fyefyo iyi-milimo yamakosa ilukucitwa muli ye. 15Sombi ŵambi naŵo ati: NiElaija. Naŵambi naŵo ati; Wakusimika, koti niumbi uwapaŵakusimika. 16Sombi Elode, pakufiumfwe'fyo, walilaŵile ati: Uyo-Yoane, unatetele umutwi, aŵuka. 17Pakuti Elode umwine alitumine aŵantu nekumwikata Yoane, nekumukaka mwikati, pakuti pali Elodya, umukasi wakwe Filipo umukwaŵo; pakuti alimuupile. 18Pakuti Yoane alimweŵele Elode ati: Tekwelelwa mweŵo ukupoka umukasi wamukwanu. 19Peŋka Elodya alimukanamine, nekufwaisyo'kumwipaya; sombi taesiŵile; 20pakuti Elode walukumutina Yoane, pakuti aliisiŵile ati ye muntu uluŋgeme, uswetelele, nekulukumulama bwino; lomba pakulukumumfwa, uyo-Elode nekukaŋkamana ukwakuti, nekulukumukutika nekutemwa.

21Peŋka pakufika akasuŵa akelelwe, akasuŵa akafyelwe-mo Elode, alisiipicile ifyakulya ifiweme ifyacitenje impemba syakwe nefilolo ifikulu neŵakulu aŵamuGalili. 22Peŋka nekwinjila umwana wakwe Elodya, umwanakasi, nekulukusyana, nekutemwesya Elode naŵaŵo aŵasamine ukulukulya nakwe; lomba imfumu yalilaŵile kuli moye uyo ati: Undombe fyonse ici ulukufwaya, nakukupela. 23Nayo nekulapa kuli ye ati: Fyonse ici wakundomba nakukupela, naŋgawa luŵali lumo lwaŵufumu bwanji. 24Naye alifumine-mo nekuŵepusya ŵanyina ati: Mbafindo ifi nakulomba? Naŵo ŵaliasucile ati: Mutwi wakwe Yoane uwakuŵatisya. 25Naye walipulilile ukwinjila bwaŋgu kumfumu, nekulomba ati: Ndukufwaya ati mumpele umutwi wakwe Yoane uwakuŵatisya pacakulila-po ŵuno-ŵukumo. 26Popele nayoimfumu yaliumfwile insoni isyakuti, sombi tayamukenye-po, pakuti pakulapa kwaiyo napakuti pali ŵaŵo aŵasamine ukulukulya. 27Lomba imfumu yalitumine bwaŋgu umbi umusilikani waiyo ati: Kalete umutwi wakwe. Naye nekuya, nekumupinika umutwi mwikati, 28nekuuleta umutwi wakwe pacakulilapo, nekumupela moye uyo; naye nekupela ŵanyina. 29Lomba aŵasambile ŵakwe, pakufiumfwe'fyo, ŵalificile nekuŵula icimpilinte cakwe, nekucilalika mumucembo wacilende.

30Peŋka'po intanjisi syaliwuŋgene kuli ŵaYesu, nekuŵaŵula fyonse'fyo ifi syacitile, nefi syasambisye. 31Naŵo nekulaŵila kuli syo ati: Twendeni kumpaŋga pakaŵeya, mukatusye panini. (Pakuti aŵantu aŵenji ŵalukwisa nekulukuya; lomba aŵasambile naŵo taŵabwenepo impindi yakutusya neli yandilo.)

32Peŋka ŵo ŵalikumbulucile mubwato; lomba ŵalukuya ŵeŋka kumpaŋga. 33Sombi aŵantu ŵaliŵabwene ŵalukuya, neŵenji nekuŵesiŵa, nekuŵutucilo' ko pansi ukufuma mumisi yonse, nekuŵacilo'luŵilo aŵali mubwato. 34Lomba, pakufuma-mo ŵo, ŵalibwene iŵumba ilikulu makosa, nemutima nekupopomenwa pali ŵo, pakuti ŵo ŵali koti nimbelele isitasikwete-mwembesi; peŋka' po ŵalitaticile ukuŵasambisya ifintu ifinji. 35Peŋka, pakupalamina ukuwa akasuŵa, aŵasambile ŵaŵo ŵaliisile kuli ŵo, nekulaŵila ati: Pano nipampaŋga lukoso, kaŵili akasuŵa kaya. 36Ŋgamuŵatume, ŵaye kumitala nakumisi isiŋgulucile, ŵaliulile aŵene ifyakulya. 37Sombi ŵo nekuŵaasuka ati: Ŋgamuŵapele mweŵene ukulya. Naŵo nekulaŵila kuli ŵo ati: Kani tuye tukole siŋkwa uwakukumana indalama imyanda iŵili, tuŵapele ati ŵalye? 38Naŵo nekuŵepusya ati: Ŵasiŋkwa waŋga muli naŵo? Ŋgamuye, muŵone! Peŋka, pakwisiŵa, ŵaliasucile ati: Ŵasanu, nesaŵi liŵili. 39Naŵo ŵaliŵaŵulile ati ŵonse ŋgawekale pansi pacani camyefu mumaŵumba aŵo. 40Naŵo ŵaliikele imiloŋgo, pambi iyamwanda, pambi iyamakumi asanu. 41Peŋka ŵaliŵulile ŵasiŋkwa ŵosanu, nesaŵi liŵili; lomba, ili ŵatontomekele kwiulu, ŵalicindicile, nekuŵakumala wasiŋkwa, nekuŵapela aŵasambile ŵaŵo, ati ŵataŵataŵile aŵantu: nalyelyo-saŵi liŵili ŵaliŵakumawilile ŵonse. 42Lomba ŵonse aŵo ŵalilile, nekwikuta, 43Peŋka'po ŵalitolele ifyakumacile-ko ututundu ikumi natuŵili, pamo nefyesaŵi. 44Aŵo aŵalile wasiŋkwa aŵalalume ŵalikumene amasausande asanu.

45Peŋka ŵalipulilile ukumanamika aŵasambile ŵaŵo ati ŵenjile mubwato ukutanjilila pesilya kuBesaida, aŵene ili ŵalukuŵatuma aŵantu iŵumbe'lyo. 46Lomba, ili ŵaŵalayile, ŵaliile kulupili mukutembela. 47Peŋka'po, pakufika uŵusiku, lomba ubwato bwali pakati pacisiŵa, naŵo ŵaYesu kumutunta ŵeŋka. 48Peŋka ŵo ŵaliŵabwene ŵafilwa ukoŵa, pakuti icipupu caliciliŋgene pali ŵo; lomba kucinyamaca ŵaliisile kuli ŵo, ili ŵenda pacisiŵa, nekuya koti kuŵapitilila. 49Sombi ŵo, ili ŵaŵabwene ŵalukwenda peulu pacisiŵa, ŵalilaŋgulucileati mupisi, nekwansimuko'kulila; 50pakuti ŵonse aŵo ŵaliŵabwene, nekususwa. Sembi, ŵo, ŵalipulilile ukulaŵila naŵo, nekuŵeŵa ati: Tekeni imitima: nineŵo, mwitina! 51Peŋka ŵaliinjile mubwato, umu ŵali ŵo, necipupu naco nekucileka: naŵo nekukaŋkamana ukwakuti lukoso. 52Pakuti ŵo taŵaisiŵile-po bwino ifyawasiŋkwa, pakuti imitima yaŵo yalikosele too.

53Peŋka'po, pakwaŵuka, ŵalificile kumutunta kuGenesaleti, ubwato nekuŵukulicila kumumba. 54Lomba, pakufuma ŵo mubwato, aŵantu ŵalipulilile ukuŵesiŵa ŵaYesu, 55nekuŵutuka ukulukupitana monse mucalo ico, nekutatika ukuŵapinta aŵalwele pamalo uko konse uku ŵaŵomfwila ati eko ŵali. 56Namomo monse umu ŵalukwinjila, neli nimuli tumisi, neli nimumisi ikulu, neli nimumitala, ŵalilalicile aŵalwele pamansa syakuulila-po, nekuŵakombetela ati ŵakume-ko naŋgawa nikumukombelo lukoso uwacakufwala caŵo; lomba ŵonse aŵaŵakumine-ko ŵalipulucile.

Currently Selected:

Mako 6: AAL59

Highlight

Copy

Compare