Mako 4

1Naliŵili ŵalitaticile ukusambisya kumumba yesiŵa. Peŋka lyaliŵuŋgene kuli ŵo iŵumba ilikulu makosa; pakuti pali fyefyo ŵaliinjile mubwato nekwikala pesiŵa; neŵumba lyonse lyaliikele kumutunta kumbali yesiŵa. 2Naŵo ŵalukuŵasambisya ifintu ifinji ukulukupalanya; nekulaŵila kuli ŵo, pakulukuŵasambisya, ati: 3Umfweni! Ŵoneni! Uwakuminsa imbuto waliile mukuminsa; 4ili alukuminsa, lomba simbi syalitolokele pansila, nefyuni fyaliisile nekusilya; 5simbi nasyo syalitolokele pamusili wamabwe, apakuŵula ilowa ilinji; syalipulilile ukumena, pakuti pakuŵula uŵutali ubwapeloŵa; 6peŋka, pakutula akasuŵa, syalipile: nakaŵili, pakuti pakuŵula imisyu, syaliuminine. 7Simbi nasyo syalitolokele pakati kamyuŋga; nayo imyuŋga yalimenene, nekusitaŵilisya; peŋka tasyasakamwine. 8Nasimbi nasyo syalitolokele peloŵa iliweme, nekusakamuna, ili syamenene nekukula; lumbi uluŵuto kalusaŋguka amakumi atatu, lumbi nalo amakumi asanu nalimo, nalumbi nalo umwanda. 9Eli ŵaŋgalaŵila ati: Uyo uli nematwi akumfwa, ŋgaomfwe!

10Peŋka'po, ili ŵalukwikala ŵeŋka, aŵo aŵali apepi pali ŵo, pamo naŵaŵo ikumi naŵaŵili, ŵaliŵepwisye ifyakupalanya uko. 11Naŵo ŵaliŵeŵele ati: Kuli mweŵo filipelwe ifyamfiso ifyaŵufumu bwaŵaLesa: sombi kuli ŵaŵo aŵali posonde, fyonse filukucitwa mufyakupalanya: 12ati pakutamba-ko, kaŵafitamba, sombi ukuŵulo'kufiŵona; napakumfwa, kaŵafyumfwa, sombi ukuŵulo' kufiisiŵa, ŵekesa-kwaluka, nefyakuŵifya fyaŵo nekuŵapupucila. 13Peŋka kaŵalaŵila kuli ŵo ati: Tamwisi ukupalanya uku? Mbefyo mukesiŵa syani ifyakupalanya fyonse? 14Uwakuminsa alaminse'siwi. 15Lomba aŵa eŵaŵo aŵapansila, apaminsilwe isiwi; ili ŵaumfwile, lomba nekupulilila ukwisa Satana, nekulisompola isiwi ilyaminsilwe mumitima yaŵo. 16Nakaŵili koti nifyopele'fyo aŵa eŵaŵo aŵaminsilwe-po pamusili wamabwe, ŵopele, pakumfwe'siwi, lomba nekupulilila ukulipokelela nekulitemucila; 17sombi pakuti taŵali nemisyu aŵene, ŵalekala impindi ice lukoso; peŋka pakwisa ifyakupensya neli fyakukululusya pakuti pesiwi, ŵalapulilila ukulitutula. 18Naŵambi naŵo aŵaminsilwe-po pakati kamyuŋga: aŵo eŵaŵo aŵaumfwe'siwi, 19peŋka ifyakuŵamba-mo mumitima ifyapampindi ino, nekutumpaika kwamaŵoni, pamo nekukumbwa ukwafintu fimbi nekwinjila, nekusacisye'siwi, nalyo nekuŵa cilusya, 20Aŵo nawo aŵaminsilwe-po peloŵa iliweme, aŵo ewawo aŵaliumfwe'siwi, nekulipokelela; nekulukusakamuna, pambi amakumi atatu, pambi amakumi asanu nalimo, napambi napo umwanda.

21Nakaŵili ŵalilaŵile kuli ŵo ati: Kani ŵalaileta inyale, mukwiifunika munoŋgo, kani nimukwiŵika mwifuŋgu lyaŵulo? Kansi, temukwiŵika pacakuteka-po? 22Pakuti pape'cintu icifiswapo, sombi ati cikafisuluke: neli kucifwitika, sombi ati cikafisuluke apaswetele. 23Uyo uli nematwi akumfwa, ŋgaomfwe! 24Lomba ŵalilaŵile kuli ŵo ati: Mulukucenjela ifyo ifi mulukumfwa: pakuti fyopele'fyo ifi mwesya, efyo fikesiwa nakuli mwewo, nefyakulunda-po kaŵili. 25Pakuti aŵantu ŵonse uli nafyo, kuli woyo efikapelwa; neutaakwete, kuli ye fikapokololwa ifyo ifi ali nafyo.

26Peŋka ŵo ati: Uŵufumu bwawaLesa ŵulipalile koti nififi ifyamuntu uwaŵyele imbuto pamusili; 27nekulukulele, nekulukuŵuka, napaŵusiku napakasuŵa; nasyesyo-mbuto nekufumyo'musoŋgo, nekulukumena; sombi ifyafyefyo uyo taafiisi. 28Umusili uwine eumesya; tanje umusoŋgo, peŋka necikola, lomba nempeke isikulile pamutwi. 29Sombi pakupya impeke, lomba ye nekupulilila ukutuma icikwakwa, pakuti impindi yakucesa yaisa.

30Peŋka ŵo ati: Mbafindo twakupalanya neŴufumu bwaŵaLesa? Neli kwisa-kupalanya twakubwesya? 31Ŵulipalile ulusaŋgu lwasinapi, ulu pakuluŵyala mumusili, kalucepele ukucila napambuto syonse isyamucalo conse icapansi; 32naŋgawe'fyo, pakuluŵyala, lulamena nekucilo'ŵukulu napaŵucisa ŵonse, nekutaŵa imitano ikulu; fyopele' fyo ifyuni fyamwiulu filiisi ukwikala mucinto caiyo.

33Nefyakupalanya ifyakuŵe'yo ifinji ŵalukulaŵila kuli ŵo Isiŵi lyaŵaLesa, koti kukumanina nemano aŵo akuliumfwa. 34Sombi taŵalaŵile-po kuli ŵo ukwakuŵula ukupalanya; sombi kumpelo ŵalukufiŵulisisya fyonse kuŵasambile ŵaŵo.

35Peŋka pakasuŵa ako, pakwisa iciŋgulo, ŵalilaŵile kuli ŵo ati: Ŋgatwaŵucile bwisilya! 36Popele, pakulituma iŵumba, ŵaliŵatwite ŵaYesu mubwato, fyopele'fyo ifi ŵaikele; naambi amato ŵali nao. 37Peŋka caliŵucile necipupu icikulu, nemaŋkapa nao alisempucile mubwato, fyopele'fyo ubwato bwati wukesule. 38Nawo aŵene ŵali kunsaŋga kunuma, ŵalilele pamusamino: naŵo nekuŵaŵusya, nekuŵeŵa ati: MweŵaSambisi, tamulukuŵamba mumutima ati tulukufwa? 39Naŵo ŵaliŵucile, nekucikanya icipupu, nekulaŵila kucisiŵa ati: Celele, ŋgauŵe neciŵombe! Peŋka'po necipupu nekucileka, nekwikala iciŵombe icikulu. 40Popele ŵalilaŵile kuli ŵo ati: Mbanindo mulukutinina? Tamuŋgaŵa nekucetekela? 41Naŵo ŵalisusilwe ukwakuti, nekulukulaŵilansyanya ati: Mbaaŵa ŵali syani lomba, pakuti cine necipupu necisiŵa nekuŵomfwisya?

Currently Selected:

Mako 4: AAL59

Highlight

Copy

Compare