Matayo 21

1Ili ŵapalamine kuJelusalemi nekufika kuBetafage, kulupili lwamaolife, peŋka ŵaYesu ŵalitumine aŵasambile ŵaŵili, 2nekuŵaŵula ati: Kamuyeni kumusi uyo usiŋkamene pali mweŵo; lomba kopele uko mwakusaŋgana imboŋgolo ikacilwe pamo nemwana waiyo; mukakulule, mukandetele. 3Lomba kani umbi alaŵile fimbi kuli mweŵo, mwakweŵa ati, NiŵaSikulu ŵalukusifwaya; lomba akupulilila ukusituma. 4Pakuti ifi fyaisa-kucitwa ati fipelelwe pamo nafyefyo ifyalaŵilwe kuwakusimika ati:

5Mumuŵule umwana umwanakasi wakuSayoni, ati:

Ŵona, Imfumu yoŵe ilukwisa kuli weŵo,

Ilicefesye, ilukwenda pamboŋgolo,

Napamutule, akana kamboŋgolo.

6Peŋka aŵasambile ŵaliile, nekucita koti nifyopele'fyo ifi ŵaŵa ŵulile ŵa Yesu; 7nekuleta nemboŋgolo nemwana waiyo, nekuŵika-po ifyakufwala fyaŵo; lomba naŵo ŵaYesu ŵaliikele-po. 8Peŋka iŵumba lyaŵantu, ŵambi aŵenji, ŵaliansicile ifyakufwala fyaŵo munsila; ŵambi naŵo ŵalitemene ifinsokela kumiti, nekufisansika munsila. 9Nemaŵumba akuntanjile nealukuŵalonda alukuŵilicisya ati: Osana kuŴana ŵakwe Dafidi! Ŵalicindeme aŵo aŵalukwisa mwisina lyaŵaSikulu! Osana kwiulu kwancimbwe! 10Peŋka, ili ŵaficile kuJelusalemi, umusi wonse walisakene, ukulaŵila ati: Mbaniŵanani aŵa? 11Lomba nemaŵumba aliasucile ati: A ŵa eŵakusimika, niŵaYesu, aŵafumine kuNasaleti uwakuGalili.

12ŴaYesu naŵo ŵaliinjile mwitempuli lyaŵaLesa, nekuŵafumya-mo ŵonse aŵalukuule'fintu nekuulisya mwitempuli; nekuwisya amatebulu aŵalukusitula indalama, nemipando yaŵaŵo aŵalukuulisya ŵaciŵa; 13kaŵili nekuŵeŵa ati; Fililembelwe ati, Inanda yanji ikalukwilikwa niŊanda yakutembelela-mo; sombi mweŵo mulayalula liceŋgo lyaŵaŋo. 14Lomba impofu nefilema fyaliisile kuli ŵo mwitempuli, naŵo ŵalifiŵusisye. 15Sombi aŵapapatilisi aŵakulu neŵalembesi, pakuŵona ifyakukaŋkamana ifyo ifi ŵalukucita, neŵanice aŵalukuŵilicisya mwitempuli ati: Osana kuŴana ŵakwe Dafidi! lomba ŵaliŵele nekukalipa; 16nekulaŵila kuli ŵo ati: Kani mulukumfwe'fi ifi ŵalukulaŵila awa? Peŋka ŵa Yesu ŵaliŵaasucile ati: Inya; kani tamupendele ati: Mutunwa twatwaniee nencece mwawaminisyo'kucindika? 17Peŋka ŵaliŵasile, nekufuma-ko kumusi, nekuya kuBetania, nekulukwikele uko.

18Ŋgamailo ulucelo, ili ŵalukubwelela kumusi, ŵali nensala. 19Lomba, pakuŵona umukuyu mumbali yansila, ŵalipalamine kuli wo; sombi taŵasanjile-ko ifisepo neli kamo, eŋka'mawula: naŵo ŵaliweŵele ati: Tokekata-po ifisepo liŵili insiku syonse pee, ukufuma kumpindi ino! Impindi iyo yopele umukuyu waliuminine. 20Peŋka aŵasambile, pakuŵone'fyo, ŵalikaŋkamene, nekulaŵila ati: Wapulilila syani umukuyu ukuuminina? 21ŴaYesu ŵaliŵaasucile ati: Icinenene ndukumuŵuleni ati, kani muli nekucetekela nekuŵulo'kukanika tamukacita fyeŋke'fi ifyacitwa kumukuyu, sombi naŋgawa ati mukalaŵile kulupili ulu, ati: Usuntulwe, uposwe mucisiŵa! fikacitwa. 22Kaŵili ifintu fyonse ifi mukalomba mwitembelo, ili mucetekela, mukafipoka.

23Popele, ili ŵainjile mwitempuli, aŵapapatilisi aŵakulu neŵakulu ŵaŵantu ŵaliisile kuli ŵo, ili ŵalukusambisya, nekulaŵila ati: Mbanikuli bwisa-ŵukulu ulukuficitila ifi-fintu? Kaŵili mbaninani uwakupele uŵukulu uŵu? 24Naŵo ŵaYesu ŵaliŵaasucile ati: Naneŵo nakumwipusyeni iceŵo cimo; popele kani mweŵo mwakuŋgasuke'co, naneŵo nakumuŵuleni ifyaŵukulu uŵo uŵu ndukucitile'fi-fintu, 25Ukuŵatisya kwakwe Yoane kwalifumine kulipi? Kani nikwiulu? Kani nikuŵantunsi? Popele naŵo ŵalukwipusyansyanya ati: Kani tulaŵile ati: Nikwiulu; akutwasuka ati: Mbanindo lomba tamwamucetekele? 26Sombi kani tulaŵile ati: Nikuŵantunsi; tulukutine'ŵumba, pakuti ŵonse ŵalamweŵa Yoane ati wakusimika. 27Peŋka waliŵaasucile ŵaYesu, nekulaŵila ati: Tatwisi! Naŵo ŵalilaŵile kuli ŵo ati: Naneŵo tesi muŵuleni-po ifyaŵukulu uŵo uŵu ndukucitile'fifintu.

28Sombi mulukulaŋguluka syani? Umuntu umbi wali neŵana aŵalalume ŵaŵili; lomba aliile kumukulu-ŵantu, ati: Wemwana wanji, koya, ucite imilimo lelo mwiŵala lyamifaina! 29Naye aliasucile ati: Newaswe! Sombi pantanjile alilaŋgulucile bwino, lomba nekuya. 30Peŋka ŵawisiŵo ŵaliile kumwaniceŵantu, nekulawila koti nifyopele'fyo. Naye aliasucile ati: Ndukuya, sikulu! Sombi taele. 31Mbaaŵo ŵoŵilo ninani uwacitile koti kufwaya kwaŵawisi? Naŵo ati: Wakutaŋga. ŴaYesu naŵo ŵalilaŵile kuli ŵo ati: Icinenene ndukumuŵuleni ati awasoŋkesi neŵanakasi aŵacencemesi ŵalamutanjilileni ukwinjila muŴufumu bwaŵaLesa. 32Pakuti Yoane aliisile kuli mweŵo, uwalukwenda munsila yafiluŋgeme, namweŵo tamwamucetekele; sombi awasoŋkesi neŵanakasi aŵacencemesi eŵamucetekele; namweŵo, pakuŵone'fyo, tamwalapile neli nipantanjile, ati mumucetekele.

33Umfweni ukupalanya nakumbi: Eko ali umuntu umwine wananda, uwalimine iŵala lyamifaina, nekulisiŋgulusya neluŵawo, nekutule'cilindi icakusansila-mo imfaina kulusanso, nekwiŵaka akatuŋgu kakatambo; popele aliliapwisye aŵalimi, nekuya umwine kucalo cimbi. 34Lomba, pakupalamina impindi yafisepo, alitumine aŵapyunjisi ŵakwe kuŵalimi, mukupoke'fisepo fyakwe. 35Sombi aŵalimi ŵaliŵekete aŵapyunjisi ŵakwe, nekumulupula umbi, umbi naye nekumwipaya, naumbi naye nekumupama' mabwe. 36Kaŵili alitumine naŵambi aŵapyunjisi aŵenji aŵakucila napaŵakutaŋga: sombi naŵaŵo ŵaliŵacitile koti nifyopele'fyo. 37Sombi pantanjile alitumine kuli ŵo umwana wakwe, nekweŵa'ti: Ŵakacindika umwana wanji! 38Sombi aŵalimi, pakuŵona umwana uyo, ŵalukuŵulansyanya ati: Uyu empyani! Twendeni, tumwipaye, tukapoke uŵupyani bwakwe! 39Peŋka ŵalimwikete, nekumuposa pesonde Iyeŵala, nekumwipaya.

40Mbefyo lomba, pakwisa umwine weŵala, akaŵacita syani aŵalimi aŵo? 41Naŵo ŵalilaŵile kuli ŵo ati: Akaŵonalo'kwakuti awoŋgwa aŵo, nekwapwisya iŵale'lyo kuŵalimi ŵambi aŵakalukumupela ifisepo pampindi syafifyo. 42Naŵo ŵaYesu ŵaliŵeŵele ati:

Ibwe ilyo ili ŵakene awewacisi,

Lyopele'lyo lyaliŵele nisunsa wamucilulu:

Ifi fyalifumine kuli ŵaSikulu,

Fyakukaŋkamana pamenso esu?

43Pakuti pali fyefyo ndukumuŵuleni ati, Uŵufumu bwaŵaLesa ŵukafumiwa kuli mweŵo, nekupelwa kumukoka waŵantu uwakwikate'fisepo fyawuwo, 44Kaŵili uyo ukaponena pebwe'lyo akatoŵeka, sombi uyo uyu likaponena, likamusansala koti lifukutu. 45Peŋka aŵapapatilisi aŵakulu neŵaFalisi, pakumfwa ifyakupalanya fyaŵo, ŵaliisiŵile ati nifweŵo alukweŵa. 46Lomba, pakufwayo'kumwikata, ŵalitinine amaŵumba, pakuti o alukuŵeŵa ati ŵakusimika.

Currently Selected:

Matayo 21: AAL59

Highlight

Copy

Compare