Matayo 20

1Pakuti Uŵufumu bwaKwiulu ŵulipalene nemuntu umwine wananda, uwafumine lucelocelo mukufola aŵantu aŵakucite'milimo mwiŵala lyakwe ilyamifaina. 2Peŋka, pakulayana neŵamilimo ukuŵapele'kobili limo pakasuŵa kamo, aliŵatumine kwiŵala lyakwe. 3Peŋka'po alifumine pakasuŵa lomba kasansamuka, nekusaŋgana naŵambi ŵaliimakene lukoso paluŵansa lwakuulila-po; 4peŋka kaalaŵila kuli ŵo ati: Kamuyeni namweŵo kwiŵala lyamifaina, lomba nakumupeleni ifyelelwe. Peŋka naŵo ŵaliile. 5Nakaŵili alifumine liŵili pakasuŵa pakati, napampindi yakusendama'kasuŵa, nekucita fyopele'fyo. 6Peŋka pakuteyama akasuŵa, alifumine nekusaŋgana naŵambi ŵaliimakene; nekulaŵila kuli ŵo ati: Mbanindo mwimakanine lukoso pano akasuŵa konse? 7Naŵo ŵalimwasucile ati: Nipakuti pakuŵula-po umuntu wakutufola. Naye alilaŵile kuli ŵo ati: Kamuya namweŵo kwiŵala lyamifaina.

8Lomba, pakufika iciŋgulo, umwine weŵala walilaŵile kucilolo cakwe ati: Ŵete aŵamilimo, uŵalambule, utatike paŵapela-ko, pantanjile nekufika kuŵakutaŋga. 9Peŋka, pa kwisa aŵo aŵafolelwe pakuteyama akasuŵa, ŵalipokele ŵonse ikobili limo limo. 10Lomba, pakwisa aŵo aŵatanjile, ŵalukulaŋguluka ati twakupoka ifyakucila; sombi naŵaŵo ŵonse ŵalipokele ikobili limo limo. 11Lomba, pakulipoka, ŵaliliŋwiŋwisisye kumwine wananda, 12ati: Aŵa-ŵantu aŵakupela-ko ŵacita impindi imo lukoso; peŋka mwaŵapendela pamo nafweŵo, fwetwaumfwo'kulema nekukalipa kwakasuŵa. 13Sombi naye alimwasucile umbi peŵumba lyaŵo ati: Wemwame, nsilukukukatasya; kansi tawalayene naneŵo ukupoka ikobili limo? 14Ŵule'lyoŵe, ulukuya! Ndukufwayo'kupela uyu uwakupela-ko koti nifyopele'fyo ifi nakupela weŵo! 15Kansi tekwelelwa neŵo ukucita koti mutima wanji nefintu fyanji? Kani ilinso lyoŵe lyacikani, pakuti ndi neŵupe neŵo? 16Fyopele'fyo aŵapelele-ko ŵakatanjila, neŵatanjile naŵo ŵakapela-ko.

17Lomba ŵa Yesu ili ŵalukuya kuJelusalemi, ŵalitwite kumpelo aŵasambile aŵo ikumi naŵaŵili, lomba pansila ŵalilaŵile kuli ŵo ati: 18Ŵoneni, tulukuya kuJelusalemi; lomba Umwana waMuntunsi akaloŵelwa kuŵapapatilisi aŵakulu nakuŵalembesi; naŵo ŵakamusinina ati afwe. 19Peŋka ŵakamuposa kuŵenafyalo ati ŵamuseke, ŵamupume, ŵamutalike; lomba, pakasuŵa kaŵusitatu akaŵusiwa pamfwa.

20Peŋka ŵaliisile kuli ŵo ŵanyinaŵo aŵana ŵakwe Sebedai pamo neŵana ŵaŵo aŵalalume, nekuŵalambila, ili ŵalukulomba kuli ŵo icintu. 21Naŵo nekuŵepusya ati: Ulukufwaye'ndo? Naŵo nekuŵaasuka ati: Ŵalaye aŵana ŵanji aŵa ŵoŵilo ati ŵakekale umbi palwine lwenu, umbi naye pacipiko cenu muŴufumu bwenu. 22Sombi ŵaYesu ŵaliasucile ati: Tamufiisi ifi mulukulomba. Kani muliisi ukunwa kuŋkomeci iyo iyi nakwisa-kunwina-mo neŵo, nekuŵatisiwa kukuŵatisya uko uku ndukuŵatisiwa neŵo? Naŵo nekulaŵila kuli ŵo ati: Tuliisi. 23Naŵo ŵalilaŵile kuli ŵo ati: Kuŋkomeci yanji mukanwa-mo icine, nekuŵatisiwa kukuŵatisya uko uku ndukuŵatisiwa neŵo; sombi ukwikala palwine lwanji neli nipacipiko canji takuli kwanji ati mpele, sombi nikuli ŵaŵo ŵeŋka aŵo aŵa kwaansicilwe kuli ŵaTata. 24Peŋka aŵo ikumi, pakumfwe'fyo, ŵaliŵele nekufitwa pakuti pawakwawawo aŵo ŵoŵilo. 25Sombi ŵaYesu ŵaliŵetile, nekulaŵila ati: Muliisi ati aŵalukwikalika aŵenafyalo ŵalaŵakomeka, neŵakulu ŵaŵo naŵo ŵalaŵacitilo'ŵukulu. 26Sombi pali mweŵo tafikekale'fyo, tau; sombi mweŵo mwense, ukafwayo'kuŵa mukulu, eukekala wakumutaŵataŵileni. 27Nakaŵili apa pali mweŵo ukafwayo'kuŵa wakutaŋga, eukekala mupyunjisi wenu. 28Koti nifyopele'fyo neMwana waMuntu nsi tesile-po mukupyunjilwa, sombi mukupyuŋga, nekuposoʼmweo wakwe cakuluŵula-mo aŵenji.

29Peŋka'po, ili ŵafumine kuJeliko, iŵumba lyaŵantu ilikulu lyaliŵalondele. 30Lomba aŵantu ŵaŵili impofu syaliikele mumbali yansila. Ili syaumfwile ati ŵaYesu ŵalukupita, syaliŵilicisye ati: MweŵaSikulu, mutucitile'ŋkumbu, mweŵana ŵakwe Dafidi? 31Sombi iŵumba lyalisikenye ati: Celele! Sombi nasyo syaliŵilicisye ukucila ati: MweŵaSikulu, mutucitile'ŋkumbu, mweŵana ŵakwe Dafidi! 32Peŋka ŵaYesu ŵaliimakene, nekusiita, nekulaŵila ati: Mulukufwaya ati ncite'ndo kuli mweŵo? 33Nasyo syalilaŵile kuli ŵo ati: MweŵaSikulu, ati amenso esu asiŵulwe. 34Naŵo ŵaYesu ŵaliŵele neŋkumbu, nekusitintila pamenso: lomba impindi iyo yopele, syalipokele ukulaŵa kwasiko, nekuŵalonda.

Currently Selected:

Matayo 20: AAL59

Highlight

Copy

Compare