Matayo 22

1Naŵo ŵaYesu ŵaliasucile nekulaŵila kuli ŵo liŵili mufyakupalanya ati: 2Uŵufumu bwaKwiulu ŵulipalene nemfumu imbi, iyaansicile icitenje cabwiŋga bwamwana waiyo; 3nekutuma aŵantu ŵaiyo mukuŵeta aŵalailwe mukulye' citenje cabwiŋga: sombi ŵalikene ukwisa. 4Kaŵili yalitumine naŵambi aŵantu ati: Muŵaŵule aŵalailwe ati, Ŵoneni, naipike'fyakulya fyanji; iŋombe syanji nesinonene syaipaiwa; ifintu fyonse filiteyanisiwe limo; iseni kucitenje caŵuufi! 5Sombi ŵo ŵalifipufisye, nekuya kumbi kumbi, umbi kwiŵala lyakwe, umbi naye kumaŵoni akwe. 6Ŵambi naŵo ŵaliŵekete aŵapyunjisi ŵaiyo, nekuŵapensya ukwakuti, nekuŵepaya.

7Sombi imfumu yalikalipile; nekutume'fita fyaiyo, nekuŵonala aŵepaisi aŵo, nekoca nemusi waŵo. 8Peŋka yalilaŵile kuŵapyunjisi ŵaiyo ati: Uŵuufi bwaansikwa, sombi aŵo aŵalailwe taŵaelelwe. 9Kamuyeni lomba mumansilampindwe amiseŵo, ŵonse aŵo mwakusaŋga muŵete, ati ŵese mukulye'fyaŵuufi! 10Naŵo aŵapyunjisi ŵalifumine ukuya kumiseŵo, nekuwuŋganya ŵonse aŵo ŵasanjile, neŵaŵipile neŵaweme; lomba kuŵuufi kwaliiswile aŵensu.

11Sombi, pakwinjila imfumu mukuŵona aŵensu, yalibwene nikumuntu umbi utaafwite umwinjila wakuŵuufi. 12Nayo yalilaŵile kuli ye ati: Wemwame, syani wainjila muno wewakuŵulo' mwinjila wakuŵuufi? Naye celele. 13Lomba imfumu yalilaŵile kuŵapyunjisi ati: Mukakeni kumaŵoko nakumolu, mumupose pamfinsi posonde; pakaŵa nemisowa apo, nekulukusumanya ameno. 14Pakuti aŵetilwe ŵenji, sombi aŵasalulwilwe ŵace.

15Peŋka'po aŵaFalisi ŵaliile, nekufundana umwakuŵasempela amasiwi aŵo. 16Peŋka ŵalitumine kuli ŵo aŵasambile ŵaŵo pamo neŵena-Elode, ati: MweŵaSambisi tuliisi ati muli ŵacine, mulasambisya icine insila yaŵaLesa, tamuŵamba mumutima ifyaŵantu ŵonse neli umo; pakuti tamulaŋgulukapo amekalilo aŵantu. 17Mutuwule lomba, mulukulaŋguluka syani? Kani ukwelelwa ukusoŋka kuli ŵaKaisa, kani tekwelelwa? 18Sombi ŵaYesu ŵalibwene uŵuŵi bwaŵo, nekulaŵila ati: Mbanindo mulukuŋgesesya, mweŵakutumpaika? 19Mundanjisye indalama yamusoŋko. Peŋka ŵaliŵaletele ikobili. 20Naŵo nekuŵepusya ati: Mbecicinsiŋgwa caŵanani, nemalembo aya? 21Kumfwa ŵo ati: CaŵaKaisa. Eli ŵaŵaŵulile ati: Muŵapele lomba ŵaKaisa ifintu fyaŵaKaisa; nekuŵapela naŵaLesa ifintu fyaŵaLesa. 22Naŵo, pakumfwe'fyo, ŵalikaŋkamene lukoso, nekuŵasya nekukumbuluka.

23Pakasuŵa ako kopele ŵaliisile kuli ŵo aŵaSadukayo, aŵalaŵila ati takulipo ukuŵuka pamfwa; kaŵaŵepusya ati: 24MweŵaSambisi, Mose walilaŵile ati, Kani afwo'muntu, utaakwete-ŵana, ukwelelwa umukwaŵo ukuupo'mukasi wakwe, nekumufyalila aŵana umukwaŵo. 25Lomba eko ŵali nafweŵo aŵana-ŵaŋkasi ŵasanu naŵaŵili; uwakutaŋga waliupile nekufwa, peŋka, pakuti taafyele-ŵana, alimusilile umukwaŵo umukasi wakwe: 26fyopele'fyo newaŵuŵaŵili, newaŵuŵatatu, ukufika nakuwaŵuŵasanu naŵaŵili. 27Peŋka, panuma yaŵo ŵonse umwanakasi naye alifwile. 28Mbapampindi yakuŵuka pamfwa, akaŵa mukasi wakwe nani aŵo ŵosanu naŵaŵili? Pakuti ŵonse ŵalimuupile. 29Sombi ŵaYesu ŵaliŵaasucile ati: Mulukufuluŋganya: tamwisi amalembo neli makosa aŵaLesa. 30Pakuti pampindi yakuŵuka pamfwa, taŵopa neli kuupwa, sombi ŵali koti niŋkalamba syakwiulu, 31Sombi ifyo ifyakuŵuka kwaŵafwile, kani tamupende le ifyo ifyamuŵulileni ŵaLesa ati: 32Neŵo nineŵaLesa ŵakweAblaamu, ŵaLesa ŵakwe Isaci, ŵaLesa ŵakwe Yakobi? ŴaLesa taŵali niŵaLesa ŵaŵafwile, sombi niŵaLesa ŵaŵalaŵi. 33Peŋka pakumfwe'fyo amaŵumba, alikaŋkamene kuŵusambisi bwaŵo.

34Sombi aŵaFalisi, pakumfwa ati ŵaŵasinawila aŵaSadukayo, ŵaliŵuŋgene. 35Naumbi pali ŵo uwamano amumafunde, aliŵepwisye iceŵo ukulukuŵesya ati: 36MweŵaSambisi, mbalise'funde lyakucila uŵukulu pamafunde onse? 37Naŵo kaŵamweŵa ati: Ulukutemwa ŵaSikulu Lesa woŵe, nemutima woŵe wonse, nemupasi woŵe wo nse, nemano oŵe onse! 38Ilyo efunde lyakucila uŵukulu, ilyakutaŋga. 39Kaŵili ilyaŵuaŵili ilipalene nalyo nilili ati: Ulukutemwo'muŵyoŵe koti kulitemwa wemwine! 40Pamafunde ayo oŵilo palikoŵeme amafunde onse nefyaŵakusimika.

41Lomba, ili ŵaciŵuŋgene aŵaFalisi, ŵaYesu ŵaliŵepwisye iceŵo 42ati: Mbamulukulaŋguluka syani ifyakuli ŵaKlistu? Ŵana ŵakwe nani? Naŵo kaŵaŵaasuka ati: Ŵana ŵakwe Dafidi. 43Kumfwa ŵo ati: Mbanindo lomba aŵelicile Dafidi muMupasi ati niŵaSikulu, ili alaŵile ati:

44ŴaYawe ŵalilaŵile kuli ŵaSikulu ŵanji ati:

Ulukwikala palwine lwanji,

Ili nsiŋgakunyantika-po patupondo toŵe?

45Lomba kani Dafidi alukuŵelika ati niŵaSikulu, mbasyani lomba ŵali ŵana ŵakwe? 46Peŋka'po tapali-po umuntu uwaisiŵile ukuŵaasuka-po neli lisiwi limo; kaŵili, ukufuma kukasuŵa ako, tapali-po umuntu uwali nemutima uwakuŵepusya-po liŵili iceŵo neli cimo.

Currently Selected:

Matayo 22: AAL59

Highlight

Copy

Compare