Matayo 19

1Pakusilo'kulaŵila amasiwi ayo, lomba ŵa Yesu ŵalifumine kucalo caGalili, nekwinjila mumitala yacalo caŵena-Juda bwisilya bwaJodeni; 2popele amaŵumba aŵantu akulu alukuŵalonda; naŵo nekuŵaŵusya kopele uko.

3Lomba ŵaliisile kuli ŵo aŵaFalisi ukuŵesya, nekuŵepusya ati: Kani ukwelelwa umuntu ukuleko'mukasi wakwe pafyeŵo fyonse? 4Naŵo ŵaliasucile ati: Kani tamuŋgapenda ati aŵo awaleŋgele awantu kumpindi yakutaŋga, ŵaliŵaleŋgele nemwalalume nemwanakasi, 5nekulaŵila ati: Pakuti paceŵo ico, umuntu akaleka ŵawisi naŵanyina, nekwikalisya nemukasi wakwe; popele ŵoŵilo ŵakaaluka munefu umo? 6Fyopele'fyo ŵukumo taŵali ŵaŵili sombi munefu umo. Pakuti pali fyefyo, ifyo ifi ŵalundenye ŵaLesa, awantu ŵonse tekufilekanya neli umo. 7Peŋka ŵalilaŵile kuli ŵo ati: Mbanindo lomba Mose afundile ukumupele'ŋkalata iyakumukanina-mo, popele nekumuleka? 8Naŵo ŵalilaŵile kuli ŵo ati: Pakuti pakukosa ukwamumitima yenu, Mose alimusumineni ukuleka'ŵakasi ŵenu: sombi ukufuma kumpindi yakutaŋga takwali nifyefyo. 9Popele ndukumuwuleni ati: Aŵantu ŵonse ukakano'mukasi wakwe pakuti paceŵo cimbi icitacili caŵucencemesi, peŋka nekuupo'mwanakasi umbi, uyo alukucito'ŵucende: nakaŵili uyo uwakuupo'mwanakasi uwakenwe kumulume wakwe, uyo naye alukucito'ŵucende. 10Eli ŵalaŵile aŵasambile kuli ŵoati: Kani ifyamuntu nemukasi wakwe fili nifyefyo, lomba tekwelelwa ukuupa, 11Sombi naŵo ŵalilaŵile kuli ŵo ati: Aŵantu ŵonse taŵesi ukupoka amasiwi ayo, sombi weŋka'wo aŵapelwe. 12Pakuti epo sili intuŋgu isyafyelwe ifyo munda mwaŵanyinaŵo; kaŵiliepo sili intuŋgu isyatuŋgwilwe kuŵantu; nakaŵili epo sili intuŋgu isilituŋgwile isine, pakuti paŴufumu bwaKwiulu. Uyo uwisi ukupoke'fi, apoke!

13Peŋka'po ŵaliletele kuli ŵo aŵaniee, ati ŵaŵatintile-po iminwe yaŵo, nekutembela. Sombi aŵasambile ŵaliŵakenye. 14Sombi ŵaYesu ŵalilaŵile ati: Ŵalekeni aŵanice ati ŵese kuli neŵo; tekuŵakanya; pakuti Uŵufumu bwaKwiulu ŵuli kuŵakuŵe'fi. 15Peŋka ŵaliŵatintile-po iminwe yaŵo; lomba nekufuma-ko uko.

16Lomba umbi umuntu aliisile kuli ŵo, ati: Mweŵasambisi, mbacisa-cintu iciweme nakulukucita ati ŋkaŵe neMweo uwamuyayaya? 17Naŵo nekumweŵa ati: Mbanindo ulukunjipusisya ifyaceco iciweme? Epo ŵali ŵamo weŋka eŵaweme. Sombi kani ulukufwayo'kwinjila mu Mweo, ulukulama'mafunde. 18Naye aliŵepwisye ati: Mbaesa-mafunde? Kumfwa ŵaYesu ati: Tekwipayo'muntu; Tekucito'ŵucende; Tekwiŵa; Tekuŵepo'ŵufi; 19Ucindike ŵawiso naŵanoko; kaŵili, Utemwe umuŵyoŵe koti kuli temwa wemwine. 20Walilaŵile kuli ŵo umusaŋkwa uyo ati: Ndafilama fyonse'fyo; mbeci nciŵula cindo? 21Peŋka ŵaYesu kaŵalaŵila kuli ye ati: Kani ulukufwayo'kuŵa uwaminine, koya, ukole fyonse'fyo ifi uli nafyo, uŵapele awapeŋgele: lomba ukaŵa nemaŵoni kwi ulu; eli ukese, ili undonda. 22Sombi umusaŋkwa uyo, pakumfwa amasiwi ayo, alikumbulucile ili aŵombomene; pakuti ali nemaŵoni aenji.

23Peŋka ŵaYesu ŵalilaŵile kuŵasambile ŵaŵo ati: Icinenene ndukumuŵuleni ati, Kulikatesye ukwinjila muŴufumu bwaKwiulu umusambasi. 24Kaŵili ndukumuŵuleni ati, Capepi kuŋgamela ukwinjila pesiso lyansiŋgano, ukucila napakwinjila mu Ŵufumu bwaŵaLesa umusambasi. 25Lomba aŵasambile, pakumfwe'fyo, ŵalikaŋkamene ukwakuti, ati: Mbaninani lomba uwisi ukupuluka? 26ŴaYesu naŵo ŵaliŵatontomekele, nekulaŵila ati: Ifyo filakaŋga'wantu; sombi ifintu fyonse filesibwa kuli ŵaLesa.

27Peŋka Petilo aliŵaasucileati; Ŵoneni, fweŵo twalisile fyonse, nekumulondeni; mbafindo lomba tukapoka? 28Peŋka ŵaYesu ŵalilaŵile kuli ŵo ati: Icinenene ndukumuŵuleni ati: Pampindi yakuleŋga liŵili ifintu fyonse, ili akalukwikele Umwana waMuntunsi peteŵe lyaŵuleme bwakwe, namweŵo, mwemulukundonda neŵo, mukalukwikele pamateŵe ikumi naaŵili ukulukusololola nemikoka yaŵaIsilaeli ikumi naiŵili. 29Kaŵili aŵantu ŵonse uwasile kani mananda kani ŵakwaŵo, kani niŋkasi, kani niŵawisi, kani niŵanyina, kani ŵana, kani maŵala, pakuti pesina lyanji, uyo akapoka umwanda, nekupyana umweo uwamuyayaya. 30Sombi aŵenji aŵatanjile eŵakapela-ko, naŵo aŵapelele-ko eŵakatanjila.

Currently Selected:

Matayo 19: AAL59

Highlight

Copy

Compare