Matayo 18

1iyo-mpindi ŵaliisile kuli ŵaYesu aŵasambile, nekwipusyaati: Mbaninani ucilile uŵuleme muWufumu bwaKwiulu? 2Peŋka ŵaliitile akanice, nekukateka pakati pali ŵo, 3nekulaŵila ati: Icinenene ndukumuŵuleni ati, kani tesi mwaluluke muŵe koti ŵanice, tesi mukenjile neli kwinjila konse muŴufumu bwaKwiulu. 4Aŵantu ŵonse lomba, ukalicefya koti kanice aka, uyo wopele eucilile uŵuleme muŴufumu bwaKwiulu. 5Nakaŵili uyo, ukapokelela umwanice umo uwakuŵe'fi mwisina lyanji, ye akampokelela neŵo. 6Sombi uyo ukamututwisya umbi umwanice uwapali ŵaŵa aŵalukuncetekela neŵo, ukumweleiwa ati ye akakacilwe mumukosi necibwe icikulu icakupela-po, nekwiŵisiwa munsi mucisiŵa icitali.

7Ŵalisyeme aŵamucalo capansi, pakuti pafyakututwisya! pakuti icine ifyo filesa; sombi alisyeme uyo uyu fiisa-mo ifyakututwisya ifyo! 8Popele kani ukuŵoko koŵe kani lukasa loŵe lulakututwisya, ulupinike-ko, ulupose; ukukwelelwa weŵo ati ukenjile mumweo nekuŋkuta neli ŵulema, ukucila napakulukuli nemaŵoko aŵili neli molu aŵili nekuposwa mumulilo wamuyayaya. 9Kaŵili kani ilinso lyoŵe lilakututwisya, uliloŵolemo, ulipose; pakuti ukukwelelwa weŵo ati ukenjile mumweo nelinso limo, ukucila napakulukuli nemenso aŵili nekuposwa muGeena wamulilo. 10Cenjeleni, tekupufya aŵanice aŵakuŵe'fi neli umo, pakuti ndukumuŵuleni ati Kwiulu iŋkalamba syaŵo silatontomeka ŵaTata aŵaKwiulu pamenso aŵo insiku syonse.

11Pakuti Umwana waMuntunsi aliisile mukupulusya ifiluŵile. 12Mulukulaŋguluka syani? Kani umbi umuntu ali nembelele umwanda, imo nekuluŵapo, ye tekusisye'syo amakumi asanu naane nasisanu nasine, nekuya kumapili mukufwaya-fwaye'yo iyaluŵa-po? 13Lomba kani paŵa'ti aiŵona, icinenene ndukumuŵuleni ati alasaŋgalalo'kwakuti pakuti pali yeyo, ukucila napali syesyo amakumi asanu naane nasisanu nasine, isitasiluŵile-po. 14Fyopele'fyo takuli kufwaya kwaŵaWisinwe aŵaKwiulu ati paŵanice aŵa neli umo akonaike.

15Kaŵili, kani umukwanu aŵifye kuli weŵo, koya, umulanjisye ukuŵifya kwakwe, mweŵilo kumpelo: peŋka kani akumfwe, lomba walibwesesya umukwanu. 16Sombi kani tesi akumfwe, upinte naŵambi neli umo neli ŵaŵili, ati mutunwa twamboni siŵili neli sitatu amasiwi onse aluŋgame, 17Sombi kani akane ukuŵomfwa naŵaŵo, uŵule iceŵo kwikelesya: lomba kani akane ukuliumfwa nekelesya nalyo, pamenso oŵe aŵe koti mwinafyalo nakoti musoŋkesi.

18Icinenene ndukumuŵuleni ati fyonse'fyo ifi mukakaka pansi pano, fikakakwa nakwiulu; nakaŵili fyonse'fyo ifi mukakakulula pansi pano, fikakakululwa nakwiulu. 19Kaŵili ndukumweŵeni, ati kani peŵumba lyenu ŵambi ŵaŵili ŵali nemutima umo pansi pano uwapali fyefyo ifi ŵakalomba, ŵaTata aŵaKwiluu ŵakaŵacitile'fyo. 20Pakuti apo apa ŵaŵuŋgana ŵaŵili kani ŵatatu mwisina lyanji, popele apo epo ndi naneŵo pakati pali ŵo.

21Lomba waliisile Petilo, nekulaŵila kuli ŵo ati: MweŵaSikulu, impindi siŋga umukwasu akaŵifya kuli neŵo, naneŵo nekumufitulucila? kani ukufika impindi sisanu nasiŵili? 22Kumfwa ŵaYesu kaŵalaŵila kuli ye ati: Nsilukumuŵuleni ati ukufika impindi sisanu nasiŵili; sombi ati ukufika nakumpindi sisanu nasiŵili isifusiwe impindi amakumi asanu naaŵili. 23Pakuti pali fyefyo Uŵufumu bwaKwiulu ŵulipalene nemfumu imbi, iyalukufwayo'kupendo'ŵuŵoni neŵapyunjisi ŵaiyo. 24Peŋka, pakutatiko'kupenda, ŵaliletele kuli yo umbi umuntu uwali nemulandu kuli yo uwakukumana amatalanto amasausande ikumi. 25Sombi pakuti taakwete indalama isyakuluŵuka, ŵawisikulu ŵalieŵele ati akolwe pamo nemukasi wakwe, neŵana ŵakwe, nefintu fyakwe fyonse, nemulandu ufutwe. 26Peŋka umupyunjisi uyo aliwilile pansi ukulukuŵalambila, nekulaŵila ati: MweŵaSikulu, mbeleni neŋkumbu; ŋkamulipeni fyonse. 27Lomba ŵawisikulu umupyunjisi uyo ŵaliŵele neŋkumbu, nekumukakulula, nekumufitulucila kumulandu uyo.

28Sombi umupyunjisi uyo walifumine, nekusaŋgano'mupyunjisi umuŵyakwe, uwali nemulandu kuli ye uwakukumana indalama umwanda: peŋka walimwikete, nekumufina pamukosi ati: Futa umwapu wanji! 29Popele umuŵyakwe naye waliwilile pansi, nekumukombetela ati: Mbeleni neŋkumbu, ŋkamulipeni. 30Sombi alikene; nekuya nekumuposa mwikati, ati ekale-mo ili taaŋgafuta umulandu uyo. 31Popele apo awapyunjisi aŵaŵyakwe, pakuŵona ifyo ifyacitilwe, ŵaliŵele nensoni syakuti, nekwisa mukuŵaŵula ŵawisikuluŵo fyonse'fyo ifyacitilwe.

32Peŋka ŵawisikulu ŵalimwitile, nekulaŵila kuli ye ati: Wemupyunjisi uŵipile, nalikufitulucile kumulandu uyo wonse, pakuti waliŋkombetele neŵo; 33kani tekwelelwa naweŵo ukumucitile'ŋkumbu umuŵyoŵe, koti nifyopele'fyo ifi nakucitile'ŋkumbu weŵo? 34Lomba ŵawisikulu ŵalikalipile, nekumuposa kuŵakupensya, ili taaŋgafuta umulandu uyo wonse. 35Fyopele'fyo naŵaTata aŵaKwiulu efi ŵakacita nakuli mweŵo, kani mwense mumitima yenu tamuŵafitulucila aŵakwaŵenu.

Currently Selected:

Matayo 18: AAL59

Highlight

Copy

Compare