Matayo 17

1Pakupite'nsiku sisanu nakamo, ŵaYesu ŵalitwite Petilo najakobo naYoane, umukwaŵo Jakobo, nekuŵaninika kulupili ulutali kumpelo. 2Peŋka ŵalisaŋgwilwe pamenso aŵo; lomba pacinso caŵo palisasamucile koti kasuŵa, nefyakufwala fyaŵo fyalituŵile tuu. 3Popele lomba ŵalibwenekele kuli ŵo Mose naElaija, ukulukwambala naŵo. 4Peŋka Petilo aliasucile nekulaŵila kuli ŵaYesu ati: MweŵaSikulu, cawama ati tulukuli kuno: kani mulukufwaya, nakwiŵaka pano imitanda itatu, umo wenu, umbi waŵaMose, umbi nawo waŵaElaija. 5Lomba, ili acilaŵila, ikumbi ilituŵile lyaliŵasesemucile: lomba nesiwi ilyafumine mwikumbi ati: Uyu Mwana wanji untemenwe, muli ye emu ndukusaŋgalala; mulukumumfwa. 6Peŋka aŵasambile, pakulyumfwile'fyo, ŵaliwilile pansi ubwifuneme, nekutino' kwakuti. 7Peŋka ŵa Yesu ŵaliisile, nekuŵatintila-po, ukweŵa'ti: Ŵukeni, mwitina! 8Naŵo, pakuceŵuka, taŵabwene-po umbi, sombi niŵaYesu ŵeŋka.

9Lomba ili ŵalukuseluka kulupili, ŵaYesu ŵaliŵafundile ati: Tekuŵaŵula neli muntu umo, ifyo ifi mwaŵona, ili taaŋgawuka paŵafwile Umwana waMuntunsi. 10Peŋka aŵasambile ŵaŵo ŵaliŵepwisye ati: Mbanindo lomba ŵalaŵilila aŵalembesi ati: Elaija euŋgataŋgo'kwisa? 11Naŵo nekwasuka ati: Icine Elaija eulukwisa, nekufiŵusya liŵili ifintu fyonse. 12Sombi ndukumuŵuleni ati Elaija kale esile; popele aŵantu taŵamwisiŵile, sombi ŵalicitile kuli ye koti kufwaya kwaŵo. Koti nifyopele' fyo neMwana waMuntunsi naye akasomenwa kuli ŵo. 13Eli ŵaisiŵile aŵasambile ati ŵalukweŵa ifyakwe Yoane uwakuwatisya.

14Lomba, ili ŵaficile kwiŵumba lyaŵantu, peŋka waliisile kuli ŵo umbi umuntu, nekufukama kuli ŵo, ati: 15Sikulu, mumucitile'ŋkumbu umwana wanji umwalalume; pakuti mulwele Iciŋkoniŋkoni, alukusomenwo'kwakuti: pakuti liŵili liŵili alukuponena mumulilo, liŵili liŵili namumenda. 16Peŋka nali namuleta kuŵasambile ŵenu, sombi ŵo taŵesiŵile ukumuŵusya. 17Peŋka ŵaliasucile ŵaYesu ati: Wecitentekwa icakuŵulo'kucetekela, mweŵacikaka, impindi syani ŋkalukwikala nenu, nekulukumusumineni? Mumulete kuno kuli neŵo. 18Lomba ŵaYesu ŵalicikenye, peŋka iciŵanda nekufuma-mo muli ye; nemusaŋkwo'vo waliŵusiwe nekukosa ukufuma kumpindi iyo.

19Popele apo aŵasambile ŵaliisile kuli ŵaYesu kumpelo, nekwipusya ati: Mbanindo tatwaisiŵile ukucifumya? 20Naŵo nekuŵaŵula ati: Nipakuti pakucetekela kwenu kunini; pakuti icinenene ndukumuŵuleni ati, kani muli nekucetekela koti lusaŋgu lwasinapi, mwakulaŵila kulupili ulu ati: Telela kulya! peŋka lwakutela. Nakaŵili tapakalukuli-po cintu neli cimo cakumukaŋgeni. 21Sombi umukoka uyo taufuma-mo kufintu fimbi, sombi nikukutembela kweŋka nakukulikanya ukulya.

22Lomba, ili ŵaciikele muGalili, ŵaYesu ŵalilaŵile kuli ŵo ati: Umwana waMuntunsi akaloŵelwa kuminwe yaŵantu; 23naŵo ŵakamwipaya; lomba, pakupite'nsiku sitatu, akaŵusiwa. Popele naŵo ŵaliŵele nensoni syakuti.

24Pakufika ŵo kuKapanaumi, aŵalukupoke'ndalama isyamilambu yakwitempuli ŵaliisile kuli Petilo, nekwipusya ati: Aŵasambisi ŵenu taŵalapela indalama syakwitempuli? 25Kumfwa nave ati: Ŵalapela. Pakwinjila ye muŋanda, lomba ŵaYesu ŵalitanjile ukulaŵila kuli ye ati: Ulukulaŋguluke'ndo, Simoni? Imfumu syapansi silapoka kuli ŵani imisoŋko neli tulambu? Kani nikuŵana, kani nikuŵensu? 26Pakwasuka Petilo ati, Nikuŵensu, peŋka ŵaYesu ŵalilaŵile kuli ye ati: Aŵana lomba ŵo kansi ŵana-ŵaŵene! 27Sombi twiŋgawatutwisya ŵo, uye kucisiŵa, uteye indoŵo, ukaŵule isaŵi ilyo ilyakutaŋgo' kwikatwa; popele, pakulicenamuna mukanwa, wakusaŋge'syekeli; uliŵule; uŵapele pakuti pali neŵo naweŵo.

Currently Selected:

Matayo 17: AAL59

Highlight

Copy

Compare