Matayo 13

1Akasuŵa ako ŵa Yesu ŵalifumine muŋanda, nekwikala kumbali yesiŵa. 2Peŋka aliwuŋgene kuli ŵo amaŵumba akulu, fyopele'fyo ŵaliicile mubwato, nekwikala; neŵumba lyonse lyaliimakene kumbali yesiŵa.

3Eli ŵaŋgalaŵila naŵo ifintu ifinji ifyakupalanya, ati: Ŵoneni! Uwakuminse'mbuto waliile mukuminsa; 4peŋka, ili alukuminsa, simbi syalitolokele pansila, nefyuni fyaliisile nekusilya; 5simbi nasyo syalitolokele apali amabwe apakuŵula ilowa ilinji; peŋka syalipulilile ukumena, pakuti pakuŵulo'ŵutali bweloŵa; 6peŋka pakutula'kasuŵa syalipile; peŋka, pakuti pakuŵule'misyu syaliuminine.

7Nasimbi nasyo syalitolokele pamyuŋga; nayo imyuŋga yalimenene nekusitaŵilisya; 8simbi nasyo syalitolokele peloŵa iliweme, nekusakamuna; lumbi uluŵuto kalusaŋguka umwanda, lumbi nalo amakumi asanu nalimo, nalumbi nalo amakumi atatu. 9Uyo uli nematwi ŋgaomfwe!

10Peŋka'po aŵasambile ŵaliisile nekulaŵila kuli ŵo ati: Mbanindo mulukulaŵilila kuli ŵo ifyakupalanya? 11Naŵo ŵaliŵaasucile ati: Kuli mweŵo kulipelwe ukwisiŵa ifyamfiso ifyaŴufumu bwaKwiulu, sombi kuli ŵaŵo takupelwe. 12Pakuti aŵantu ŵonse uli nafyo, kuli ye eko fikapelwa, naye akalukuli nefinji: sombi aŵantu ŵonse utaakwete, kuli ye fikapokololwa nafyefyo ifi ali nafyo. 13Pakuti pali fyefyo ndalaŵila kuli ŵo ifyakupalanya; pakuti pakuŵona taŵaŵona-po, napakumfwa taŵomfwa-po neli kwisiŵa. 14Nakaŵili kuli ŵo filikonsiwe koti kusimika kwakwe Yisaya, ukwalaŵile ati:

Ukumfwa mukomfwa, sombi tamukomfwisya neli panini;

Kaŵili ukuŵona mukaŵona, sombi tamukabwenesya neli panini:

15Pakuti imitima yaŵantu aŵa iliŵele ikosele,

Nematwi aŵo nao alisincile,

Nemenso aŵo nao ŵaliasiŵaticile;

Weŋgesa-kuŵona kumenso aŵo,

Nekumfwa nakumatwi aŵo.

Nekwisiŵa nakumitima yaŵo,

Peŋka nekwaluluka,

Naneŵo nekuŵaŵusya.

16Sombi alisyucile amenso enu, pakuti alaŵona; nematwi enu nao, pakuti alomfwa. 17Pakuti icinenene ndukumuŵuleni ati aŵakusimika aŵenji neŵantu awaluŋgeme ŵalukufwayisyo'kuŵona ifintu ifi ifi mulukuŵona, sombi taŵafibwene-po; nekumfwisya ifintu ifi ifi mulukumfwa, sombi taŵafiumfwile-po. 18Umfweni mweŵo lomba ukupalanya kwawakuminse'mbuto! 19Pakulyumfwa umuntu lsiwi lyaŴufumu, nekuŵulo'kuliisiŵisya, uwakuŵifya alesa, nekusompola-mo ico icaminsilwe mumutima wakwe. Uyo ewoyo uwaminsilwe-po pansila. 20Kaŵili uyo uwaminsilwe-po apali amabwe, uyo ewoyo uumfwe'Siwi, nekupulilila ukulipokelela nekutemucila; 21sombi umwine taakwete imisyu, alekala impindi ice lukoso; peŋka pakuŵuka ifyakupensya nefyakukululusya pakuti peSiwi, alapulilila ukulitutula. 22Kaŵili uyo uwaminsilwe-po pakati pamyuŋga, uyo ewoyo uumfwe'Siwi, peŋka ifyakuŵamba mumitima ifyapampindi ino, nekutumpaika ukwamaŵoni, filataŵilisye'Siwi, nalyo nekuŵa cilusya. 23Nawoyo uwaminsilwe-po peloŵa iliweme, uyo ewoyo uumfwe'Siwi, nekuliisiŵisya, nekusakamuna icinenene, nekwikata pambi umwanda, pambi napo amakumi asanu nalimo, napambi napo amakumi atatu.

24Nekupalanya kumbi nako ŵaliŵaŵulile ati: Uŵufumu bwaKwiulu ŵulipalene nemuntu uwaminsile imbuto isiweme mwiŵala lyakwe. 25Sombi ili ŵalele aŵantu, umupate wakwe waliisile, nekuminsa-mo iŵamba pakati pali tiligu; lomba nekukumbuluka. 26Sombi pakumena imisoŋgo, nekufyala, epakusaluluka neŵamba. 27Peŋka aŵantu ŵamwine wananda ŵaliisile, nekulawila kuli ye ati: Sikulu kansi tamwaminsile imbuto isiweme mwiŵala lyenu? Mbeŵamba ilyo ilili-mo lyalifumine kuJipi? 28Naye alilaŵile kuli ŵo ati: Mupate uyo ewacitile'fyo. Peŋka aŵantu nekulaŵila ku li ye ati: Lomba kani mulukufwaya ati tuye, tukafiimale-mo? 29Sombi ye ati: Koku, pakwimala-mo iŵamba, mwiŋgesa-kwimawila kumo natiligu. 30Filekeni, fikulile pamo fyoŵilo ukufika nakumpindi yakuloŋgela: peŋka, pampindi yakuloŋgela, ŋkalawila kuŵakuteŵula ati: Mutaŋge musalulule-mo ifyeŵamba, mufikake'mipo, mukafyoce; sombi tiligu muloŋgele muŵutala bwanji!

31Ukupalanya kumbi nako ŵaliŵaŵulile ati: Uŵufumu bwaKwiulu ŵulipalile ulusaŋgu lwasinapi, ulu awulile umuntu, nekuŵyala mwiŵala lyakwe. 32Ulo cine luce lukoso napali syo syonse imbuto; sombi pakumena, lulacilo'ŵukulu napansaŋgu syonse, nekwaluka muti ukulu, ifyo nefyuni fyamwiulu filesa nekwikala pamitano yauo.

33Ukupalanya nakumbi nako ŵalilaŵile kuli ŵo ati: Uŵufumu bwaKwiulu ŵuli koti musuŋga, wopele umwanakasi aŵulile, nekutisa mufyakwesya fitatu ifya wuŋga, ili tafiŋgafimba fyonse.

34Ifintu ifyo fyonse ŵaYesu ŵalifilaŵile ukupalanya kumawumba aŵantu; taŵalukulaŵila-po kuli ŵo neli panini apakuŵulo'kupalanya: 35ati fipelelwe pamo nafyefyo ifyalaŵilwe kuwakusimika ati:

Ŋkaasamuna pakanwa kanji ukwakupalanya;

Ŋkalaŵila ifyafiseme ukufuma kumpindi yakuleŋgwa kwacalo.

36Peŋka'po ŵaliasile amaŵumba aŵantu, nekwinjila muŋanda: peŋka aŵasambile ŵaŵo ŵaliisile kuli ŵo, nekulaŵila ati: Mutuŵulisisye ukupalanya kweŵamba mwiŵala. 37Naŵo ŵaliasucile ati: Uyo uminsa imbuto isiweme eMwana waMuntunsi; 38iŵala ecalo capansi; imbuto isiweme eŵana ŵaŴufumu; iŵamba nalyo eŵana ŵakuŵifya; 39umupate uyo uwaminsile iŵamba musensesi; ukuloŋgela ekusila kwampindi; aŵakuteŵula eŋkalamba syaŵaLesa. 40Peŋka koti nifyopele'fyo ifi ŵaŵuŋganya iŵamba nekulyoca mumulilo, fyopele'fyo efikaŵa napakusila impindi ino. 41Umwana waMuntu nsi akatuma iŋkalamba syakwe; isyo sikaŵuŋganya ukufifumya muŴufumu bwakwe ifintu fyonse ifyakulitutula-ko, neŵantu ŵonse aŵakucito'kusendeme; 42nekuŵaposa mucaka camulilo: peŋka pakaŵa nemisowa apo, nekulukusumanya ameno. 43Impindi iyo eli awaluŋgeme ŵakalukusasamuka koti kasuŵa muŴufumu bwaŵaWisiŵo. Uyo uli nematwi, ŋgaomfwe!

44Uŵufumu bwaKwiulu ŵulipalene nemaŵoni afiseme mwiŵala, ayo atulucile umuntu, nekufisa; popele, pakuti pakutemwo'kwakuti, aŋgaya, nekuposa fyonse'fyo ifi ali nafyo, nekuula iŵale' lyo.

45Kaŵili Uŵufumu bwaKwiulu ŵuli koti muntu uwaku ula, ulukufwaya-fwaya ŵamagalite aŵaweme makosa: 46peŋka, pakuŵona magalite umo uwamakweŵo apatali, aliile mukuposa fyonse' fyo ifi ali nafyo, nekumuula.

47Nakaŵili Uŵufumu bwaKwiulu ŵulipalene nekombe ako ŵateyele mwisiŵa, nekwikata-mo amasaŵi amikoka yonse; 48ako, pakwisula, ŵalikakulumwinine kumutunta; eli ŵaŋgekala pansi, aweme nekwasalulwila mufitundu, sombi aŵipile nekwaposa. 49Fyopele'fyo efikaŵa pakusile'mpindi; iŋkalamba syaŵaLesa sikema, nekuŵafumya-mo aŵakuŵifya mwiŵumba lyawaluŋgeme, 50nekuŵaposa mucaka camulilo; peŋka pakaŵa nemisowa apo, nekulukusumanya ameno.

51Kani mwaumfwisya ifyo-fintu fyonse? Naŵo ŵaliŵasumine ati: Inya. 52Peŋka ŵalilaŵile kuli ŵo ati: Lomba aŵalembesi ŵonse uyo uwaalucile musambile waŴufumu bwaKwiulu alipalene nemuntu umwine wananda, uloŋgololamo umuli amaŵoni akwe ifintu fyaŵukumo nefyakale.

53Peŋka'po, ili ŵasilile ŵaYesu ifyakupalanya ifyo, paliŵele ati ŵalifumineko uko. 54Peŋka ŵaliinjile mucalo mwaŵo, nekuŵasambisya aŵantu mwisunagoge lyaŵo, fyopele'fyo ŵalikaŋkamicilwe, nekulaŵila ati: Mboyu-muntu aya-mano waliafumisye kwisa, nemilimo iyi yamakosa? 55Kansi uyu taali mwana wakwe kalipentala? Naŵanyina kansi taŵaliilicilwe ati niMaliya? Neŵakwaŵo kansi teŵo ŵaJakobo na Josefi naSimoni naJuda? 56Neŋkasi syakwe kansi tatuli nasyo syonse? Mbefi-fintu fyonse alififumisye kwisa uyu-muntu? 57Naŵo ŵalukulitutula pakuti pali ŵo. Sombi ŵaYesu ŵalilaŵile kuli ŵo ati: Uwakusimika taaŵula-ŵuleme, sombi mucalo cakwaŵo taakwete-ŵuleme, namwaŵo muŋanda. 58Peŋka taŵacitile-po uko imilimo iyinji iyamakosa pakuti pakukanika kwaŵo.

Currently Selected:

Matayo 13: AAL59

Highlight

Copy

Compare