Matayo 14

1Impindi iyo Elode impemba ikulu yaliumfwile impupo syakuli ŵaYesu, 2nekulaŵila kuŵantu ŵaiyo ati: Uyo niYoane uwakuŵatisya; waŵuka pamfwa; pakuti pali fyefyo eyeyo-milimo yamakosa ilukucitwa muli ye. 3Pakuti Elode kale amwikete Yoane, nekumukaka, nekumuposa mwikati pakuti pali Elodya, umukasi wakwe Filipo umukwaŵo. 4Pakuti Yoane alilaŵile kuli ye ati: Tekwelelwa weŵo ukumupoka. 5Peŋka pakufwayo'kumwipaya, alitinine iŵumba lyaŵantu, pakuti ŵo ŵalukumweŵa Yoane ati wakusimika. 6Sombi pakufika akasuŵa ako afyelwe-mo Elode, lomba umwana umwanakasi wakwe Elodya alukusyana pakati paŵantu, nekutemwesya Elode. 7Peŋka'po alilayene nakwe, nekulapaati: Nakukufupa fyonse ici wakutamina. 8Peŋka ye, pakuti pakumufunda ŵanyina, alilaŵile ati: Mumpele pambale umutwi wakwe Yoane uwakuŵatisya. 9Peŋka imfumu yaliŵele nensoni; sombi pakuti pafilapo ifyo yalapile, napakuti pali ŵaŵo aŵasamine ukulukulya nayo, yaliŵaŵulile aŵantu ati ŋgaupelwe. 10Nayo yaliŵatumine, mukumuteto'mutwi Yoane mwikati. 11Nemutwi wakwe ŵaliuletele pambale nekumupela moye uyo: naye aliutwite kuli ŵanyina, 12Peŋka aŵasambile ŵakwe ŵaliisile nekuŵule'cimpilinte cakwe, nekumusika; eli ŵaile nekuŵaŵula ŵaYesu.

13Peŋka ŵaYesu, pakumfwe'fyo, ŵalifumine-ko'ko mubwato, nekuya kumbi kumpaŋga lukoso: sombi amaŵumba aŵantu, pakumfwe'fyo, alifumine mumisi nekuwakoŋka pansi. 14Naŵo ŵaYesu ŵalifumine mubwato, nekusaŋga iŵumba ilikulu, lomba ŵaliŵele neŋkumbu kuli ŵo, nekuŵaŵusya aŵalwele ŵaŵo. 15Lomba pakuteyama akasuŵa, aŵasambile ŵaliisile kuli ye ati: Pano nipampaŋga lukoso, nekasuŵa kale kaya; ŵatumeniaŵantu, ŵalukuyamuli tumisi, ŵakaliulile aŵene ifyakulya. 16Sombi ŵaYesu ŵalilaŵile kuli ŵo ati: Pape'ceŵo icakwila ŵo; mweŵo muŵapele ukulya! 17Naŵo ŵaliŵaasucile ati: Tuli nawasiŋkwa ŵasanu weŋka nesaŵi linini liŵili. 18Naŵoati: Filetenikuno kuli neŵo. 19Peŋka ŵaliaŵulile amaŵumba aŵantu ati ikaleni pansi pacani; naŵo ŵaliŵulile wasiŋkwa aŵo ŵasanu nesaŵi ilyo liŵili, nekulakamina mwiulu, nekucindika; lomba nekufikumala, naŵasiŋkwa nekuŵapela awasambile, naŵo aŵasambile nekwaŵila amaŵumba ayo. 20Lomba ŵonse ŵalilile nekwikuta. Peŋka'po ŵalitolele ifyakumacile-ko ifyasyele-po ututundu ikumi natuŵili. 21Aŵo aŵalile aŵalalume ŵalikumene koti masausande asanu, neŵanakasi neŵanice peulu.

22Impindi iyo yopele, ŵaliŵakakatisye aŵasambileati, Injileni mubwato, muntanjilile ukuya kwisilya, ili nsiŋgatuma amaŵumba awantu. 23Peŋka, pakwatuma amaŵumba aŵantu, ŵalininine kulupili kumpelo mukutembela: lomba, pakuwe'ciŋgulo, ŵali ŵeŋka uko. 24Sombi impindi iyo ubwato bwali pakati kacisiŵa, bwalikatele kumaŋkapa, pakuti icipupu caliciliŋgene. 25Peŋka kucinyamaca ŵaliisile kuli ŵo, ili ŵenda peulu pacisiŵa. 26Naŵo aŵasambile, ili ŵaŵabwene ŵalukwenda peulu pacisiŵa, ŵalitinine, nekulaŵila ati: Mipisi! lomba ŵaliaucile pakuti pamwenso. 27Sombi impindi yopele'yo ŵaYesu ŵalilaŵile kuli ŵo ati: Tekeniimitima! Nineŵo; mwitina! 28Naye Petilo aliŵaasucile ati: Sikulu, kani nimweŵo, njiteni neŵo, njise uko uku muli peulu pamenda. 29Naŵo nekulaŵila ati: Jsa! Peŋka'po Petilo alifumine-mo mubwato nekwenda peulu pamenda ukulukuya kuli ŵaYesu. 30Sombi, pakumfwe'cipupu icikulu, alitinine; lomba, ili ataticile ukwiŵila epakwauka ati: Sikulu, mumpulusye! 31Peŋka'po ŵaYesu ŵalitambicile bwaŋgu ukuŵoko, nekumwikata, nekulaŵila kuli ye ati: Wewakucetekela kunini, mbanindo wakanicila? 32Lomba, pakwinjila ŵo mubwato, necipupu nekucileka. 33Peŋka aŵo, aŵali mubwato, ŵaliŵalambile, nekulaŵila ati: Icinenene muli Ŵana ŵaŵaLesa!

34Peŋka'po, pakwaŵuka, ŵalificile kumutunta kuGenesaleti. 35Aŵantu aŵakoko, pakuŵesiŵa ŵalitumine aŵantu mumitala yonse, nekuleta kuli ŵo ŵonse aŵalukutenda; 36naŵo ŵaliŵakombetele ati ŵakume-ko lukoso kumpelo yacakufwala caŵo: naŵo ŵonse aŵakumine-ko ŵalipulucile.

Currently Selected:

Matayo 14: AAL59

Highlight

Copy

Compare