Matayo 12

1Impindi iyo ŵaYesu ŵalipitile mumaŵala atiligu pakasuŵa kasabata; neŵasambile ŵaŵo ŵaliumfwile insala, nekutatika ukukonona ifikola fyatiligu, nekulya. 2Sombi aŵaFalisi, pakuŵone'fyo, ŵalilaŵile kuli ŵo ati: Ŵoneni, aŵasambile ŵenu ŵalukucite'fyo ifitafyelelwe ukucita pali sabata. 3Sombi naŵo ŵalilaŵile kuli ŵo ati: Kani tamuŋgapenda ifyafyefyo ifi acitile Dafidi, ili aumfwile insala naŵaŵo aŵo ali naŵo? 4Ati aliinjile muŋanda yaŵaLesa, nekulya wasiŋkwa ŵaŵumboni, ifyo tafyaelelwe ye ukulya, neli niwawo aŵo ali naŵo, sombi aŵapapatilisi ŵeŋka? 5Kaŵili tamuŋgapenda mumafunde ati pakasuŵa kasabata aŵapapatilisi aŵamwitempuli ŵalapusyanya sabata, sombi taŵakwete-mulandu? 6Sombi ndukumuŵuleni ati: Uwakucile'tempuli uŵukulu epwali. 7Sombi ŋga mwaliisiŵile iceŵo ici ati: Ndukufwave'ŋkumbu, nsilukufwaye'milambu, ŋga tamwaŵasinine aŵakuŵule' milandu. 8Pakuti Umwana waMuntunsi eMwine wasabata.

9Naŵo ŵalifumine-ko'ko, nekwinjila mwisunagoge lyaŵo; 10peŋka ŵoneni, umo mwali neupapile ukuŵoko. Naŵo waliŵepwisye ŵaYesu ati: Kani ukwelelwa ukuŵusyo'muntu pakasuŵa kasabata? Ifyo ŵati ŵakaŵasinine. 11Peŋka walilaŵile kuli ŵo ati: Apa pali mweŵo, mbaninani, uwakulukuli nembelele imo, iyo nekuponena mucilindi pakasuŵa kasabata, utakaikata nekwiaŵula-mo? 12Mbo'muntu taacilile amakweŵo napambelele! Pakuti pali fyefyo ukwelelwa ukucite'fiweme pakasuŵa kasabata. 13Eli waŋgalawila kumuntu uyo ati: Tambiko'kuŵoko koŵe! Naye alikutambicile; nako nekukosa pamo nekuŵyakwe. 14Sombi aŵaFalisi ŵalifumine nekuŵafundanina umwakuŵonawila.

15Popele ŵa Yesu, pakwisiŵe'fyo, ŵalifumine-ko'ko, neŵantu aŵenji naŵo nekuŵalonda; naŵo ŵaliŵaŵusisye ŵonse, 16nekuŵacenjesya ati: Tekuntulisya! 17ati fipelelwe pamo nafyefyo ifyalaŵilwe kuli Yisaya uwakusimika, ati:

18Ŵoneni umuntu wanji uyu nsalulwile, untemenwe,

Muli ye emulukusaŋgalalila umutima wanji:

Ŋkaŵika pali ye Umupasi wa nji,

Peŋka akasimika ukusolololo'kuweme kuŵenafyalo.

19Taakacite'cikaka neli kulaŵilisya;

Aŵantu ŵonse neli umo taŵakomfwa isiwi lyakwe mumiseŵo.

20Itete ilisansaicile taakalikonona-po, tau;

Neŵutonje uŵulukufutuma icusi munyale taakaŵusimya, koku;

Ili taaŋgatuma ukusolololo'kuweme ukuficila ukucilo'ŵukali.

21Mwisina lyakwe emo ŵakalukucetekela aŵenafyalo.

22Peŋka ŵaliletele kuli ŵo umuntu uwaiketwe kuciŵanda, impofu iyasincile nesiwi: naŵo nekumuŵusya; fyopele' fyo umuntu uyo uwasincile isiwi walilaŵile nekulaŵa. 23Popele amaŵumba aŵantu onse alikaŋkamicilwe, nekulaŵila ati: Kani aŵa ŵana ŵakwe Dafidi? 24Sombi aŵaFalisi, pakumfwe'fyo, ŵalilaŵile ati: Uyu-muntu taatamfye'fiŵanda apakuŵulo'ŵukulu bwakwe Balasebubi, imfumu yafiŵanda. 25Sombi ŵaliisiŵile ukulaŋguluka kwaŵo, nekulaŵila kuli ŵo ati: Uŵufumu ŵonse uŵuli nemupaka uwakulukulwa ŵulaŵa nekonalwa; nemisi yonse nemananda onse, aali nemipaka iyakulukulwa, taakekala. 26Sombi kani Satana nekutamfya Satana, alukulileŋgelo'mupaka uwakulukulwa: mboŵufumu bwakwe lomba ŵukalukwikala syani? 27Kani neŵo ndafifumya ifiŵanda kuŵukulu bwakwe Balasebubi, mbanikuŵukulu bwakwe nani ŵafifumya aŵana ŵenu? Pakuti pali fye fyo, ŵo eŵakaŵa ŵakusololola ŵenu. 28Sombi kani neŵo ndafitamfya ifiŵanda kuŵukulu bwaMupasi waŵaLesa, Uŵufumu bwaŵaLesa bwaisa pali mweŵo. 29Kaŵili umuntu aliisi syani ukwinjila muŋanda yamuntu ukosele, nekutapa amaŵoni akwe, ili taaŋgataŋgo'kumukaka uyo ukosele? eli aŋgatapa ifyamuŋanda yakwe. 30Uyo utaali naneŵo, mupate wanji; nawoyo utaalukuloŋgela naneŵo, alukupalaya, 31Pakuti pali fyefyo ndukumuŵuleni ati: Ifyakuŵifya fyonse nefyamucobwe ifyaŵantu fikafitulucilwa; sombi ukucoŵola Umupasi waŵaLesa takukafitulucilwa. 32Kaŵili aŵantu ŵonse, ukaleŋgulula Umwana waMuntu nsi, fikafitulucilwa kuli ye; sombi aŵantu ŵonse ukaleŋgululo'Mupasi Uswetelele tafikafitulucilwa kuli ye, neli nipampindi ino, neli nipampindi iyo ikesa.

33Kamusumina ati umuti uwame, nefisepo fyauo fiwame; neli musumine ati umuti uŵipe, nefisepo fyauo fiŵipe; pakuti umuti ulesiŵilwa kufisepo fyauo. 34Mweŵana ŵaŵamakata, mbasyani mweŵakuŵifya mwisi ukulaŵila ifiweme? Pakuti kukufula kwamumutima akanwa ekalaŵila. 35Umuntu uweme kuŵuŵoni bwakwe uŵuweme alafiloŋgolola ifintu ifiweme; umuntu uŵipile naye kuŵuŵoni bwakwe uŵuŵipile alafiloŋgolola ifintu ifiŵipile. 36Kaŵili ndukumuŵuleni ati amasiwi alukoso onse aŵalaŵila aŵantu, ŵakaaŵulisisya pakasuwa kakusololole'milandu. 37Pakuti kumasiwi oŵe ukalunjikwa, nakumasiwi oŵe ukasininwa kaŵili.

38Peŋka'po aŵalembesi neŵaFalisi ŵambi ŵaliŵaasucile ati: Mweŵasambisi, tulukufwayo'kuŵona akesiŵilo kuli mweŵo. 39Sombi naŵo ŵaliŵaasucile ati: Icitentekwa icakuŵifya icaŵucende cilafwaya-fwaya akesiŵilo, sombi tacikapelwa akesiŵilo kambi, sombi keŋka'ko akakwe Jona uwakusimika. 40Pakuti koti nifyopele'fyo ifi aikele Jona munda yacisaŵi icikulu utusuŵa tutatu nemasiku atatu; fyopele'fyo neMwana waMuntunsi efi akekala mukatikamusili, utusuŵa tutatu nemasiku atatu. 41Aŵantu aŵakuNinife ŵakemakana mwisolololo pamo necitentekwa ici, nekucisinina: pakuti ŵo ŵalilapile pakusimika Jona; peŋka ŵoneni, uwakucila Jona uŵukulu epwali. 42Imfumu yanakasi iyakusaufu ikemakana mwisolololo pamo necitentekwa ici, nekucisinina: pakuti yo yalifumine ukupelele'calo mukumfwa amano akwe Solomoni; popele ŵoneni, uwakucila Solomoni uŵukulu epwali.

43Sombi umupasi uŵipile, pakufuma-mo mumuntu, ulapitana apakuŵula amenda, ili ufwaya-fwaya apakutusisya, sombi taupaŵona-po. 44Popele ulalaŵila ati: Ŋkabwelela muŋanda yanji umo umu nafumine; peŋka pakufika ulaisaŋga icisokololwa, ipyanjilwe, iyansicilwe. 45Peŋka kauya nekupinta nemipasi imbi isanu naiŵili iŵipile iyakucila napawine; yo nekwinjila nekwikalo'mo; eli ukwikala kwamuntu uyo kulaŵa kuŵipile ukwakucila napakutaŋga, Lombe'fyo efikaŵa kucitentekwa ici iciŵipile.

46Peŋka ili ŵacilaŵila kumaŵumba aŵantu, lomba ŵanyinaŵo neŵakwaŵo ŵaliimakene posonde, ŵalukufwaya ukulaŵila naŵo. 47Popele umbi waliŵeŵele ati: Ŵanyinenwe neŵakwaŵenu mba ŵemakene posonde, ŵalukufwayo' kulaŵila nenu. 48Sombi naŵo ŵalimwasucile uyo uwaŵaŵulile ati: Mbaniŵani ŵamama? Mbaniŵani aŵakwasu? 49Peŋka nekutambika ukuŵoko kuŵasambile ŵaŵo, nekulaŵila ati: Ŵoneni, ŵamama neŵakwasu mba! 50Pakuti aŵantu ŵonse ucita ukufwaya kwaŵaTata aŵaKwiulu, uyo emukwasu, neŋkasi yanji, naŵamama.

Currently Selected:

Matayo 12: AAL59

Highlight

Copy

Compare