Ifyakufuma 2
2
1Popele lomba umbi umwalalume uwamucikoto cakwe Lefai, waliile nekuupo'mwanakasi umwina-Lefai. 2Popele umwanakasi waliimitile nekufyalo'mwana umwalalume; peŋka pakuŵona ati mwana uweme, walimufisile imyensi itatu. 3Popele, pakuŵulo'kuŵona imfisilo naimbi, walimuŵulile icamuseke icamatete, nekusiŋga-ko nematipa amafuta nefinaŋana, nekuŵikamo umwana, nekuciŵika mumbali yanika mufipepetu. 4Kaŵili iŋkasi yawoyo-mwanice yaliimakanine ukutali, kuleŋga ŵakumucite'ndo. 5Popele umwana wakwe Falo umwanakasi waliisile kunika mukusamba; kaŵili aŵasyakasi ŵakwe ŵaliendele mumbali yanika; popele naye kaaŵone'camuseke pakati pafipepetu, kaatumo'musya wakwe mukucileta. 6Popele waliciifunwine, nekuŵono'mwana: popele kuŵona, ulucece kai uli la. Peŋka waliluwelele neŋkumbu, nekulaŵila ati: Uyu mwana waŵaEbeya. 7Popele apo iŋkasi yamwanice uyo yalilaŵile kumwana wakwe Falo ati: Kani nje, ŋkamwitileni umulelesi umbi uwapawanakasi aŵaEbeya, ati alukumuleleleni-ko umwano'yu? 8Kumfwa umwana wakwe Falo umwanakasi walaŵila kuli yo ati: Koya. Popele moye uyo waliile nekuŵeta ŵanyina umwano'yo. 9Popele umwana wakwe Falo umwana kasi walilaŵile kuli ŵo ati: Utwale umwano'yu, ulukundelela-ko, ŋkakulambula. Peŋka umwanakasi uyo walimutwite umwana, nekulukumulela. 10Po pele umwano'yo nekukula, lomba ŵanyina walimutwite kumwana wakwe Falo, naye umwanice waliŵele koti mwana wakwe. Naye walimwilicile isina lyakwe ati niMose, nekulawila ati: Nipakuti nalimwabwile mumenda.
11Popele apo pansiku isyo, ili akulile Mose, alifumine mukulukuya kuŵakwaŵo, nekucete'fipinto fyaŵo; po pele kaaŵono'muIjipiti alukumupamo'muEbeya, umukwaŵo umbi. 12Popele naye kaacencenta; peŋka, pakuŵona ati tapali-po neli muntu, kaamwipayo'muIjipiti, kaamufisa mumuseŋga, 13Kaŵili walifumine napakasuŵa kaŵusiŵili, popele, kuŵona nikuwalalume aŵaEbeya ŵawili ŵalukulwa; naye walilaŵile kuli woyo uwaŵifisye ati: Mbanindo ulukupumino'muwyowe? 14Naye ati: Weŵo nawe ninani ukwikalicile ati uli nimfumu iyakusololola nafweŵo? Kani ulukufwayo'kuniipaya neŵo fyopele'fyo ifi waipeye umuIjipiti? Popele Mose walitinine, nekulawila ati: Cine cilya-ceŵo catulika.
15Popele apo Falo, pakumfwe'cewo ico, walukufwayo'kumwipaya Mose; sombi Mose waliwutucile ukufyuka pamenso akwe Falo, nekuya kwikala mucalo caMidyani: naye kaekala pamukalo. 16Lombo'mupapatilisi uwamucalo caMidyani wali neŵana aŵanakasi ŵasanu naŵaŵili: naŵo ŵaliisile nekuta pa amenda nekwisusya amaŋkuwala akunwina-mo itaŋga lyaŵawisiŵo. 17Popele kwaliisile aŵembesi nekuŵatamfya: sombi Mose waliimine nekuŵofwa-ko, nekulipele'taŋga lyaŵo amenda. 18Popele, ili ŵaficile kuli Leweli wisiŵo, alilaŵile ati: Mbasyani mwabwela fino bwaŋgu lelo? 19Kumfwa naŵo ati: UmuIjipiti ewatupulwisye muminwe yaŵembesi, nakaŵili wali tu tapile amenda, nekulipele'taŋga amenda. 20Naye kaalaŵila kuŵana ŵakwe aŵanakasi ati: Mbaali kulipi? Mbanindo mwamusila umuntu? Mwitoni, ati alyepo ifyakulya, 21Popele apo Mose walisumine ukulukwikele nemuntu uyo: naye kaamupela Mose Sipola umwana wakwe ati ope. 22Naye Sipola walifyele umwana umwalalume; po pele Mose walimwilicile isina lyakwe ati niGesyomi; pakuti walilaŵile ati: Nalukwikalo'mwensu mucalo icitacili cakwesu.
23Popele apo, pakupite'nsiku isyo isinji, lomba imfumu yawa Ijipiti yalifwile: kaŵili aŵaIsilaeli ŵalukusisimuka pakuti pali ŵukalume bwawo; naŵo kaŵalukulila, nekulila kwaŵo nako kakufika kwiulu kuli ŵaLesa pakuti pali ŵukalume bwaŵo. 24Peŋka ŵaLesa kawomfwo'kutoŋgela kwaŵo, naŵo ŵaLesa kawalaŋguluko'kulayana kwaŵo ukwakuli Ablaamu nakuli Isaci nakuli Yakobi. 25Po pele ŵaLesa ŵalibwene aŵaIsilaeli, naŵo ŵaLesa ŵaliŵesiŵile.
Currently Selected:
Ifyakufuma 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
