Ifyakufuma 1
1
1Lomba aya emasina aŵana ŵakwe Isilaeli aŵalalume, aŵainjile mucalo caIjipiti; ŵonse pamo neŵamumaŋanda aŵo ŵaliisile pamo nakwe Yakobi. 2Ŵali niLubeni, naSimyoni, naLefai, naJuda; 3nalsaka, naSebuluni naBenjamini; 4naDani, naNafitali, naGadi, naAsyali. 5Popele aŵantu aŵafumine muluŵunda lwakwe Yakobi ŵonse ŵalikumene imitima amakumi asanu naaŵili: kaŵili Josefi kale aikele mucalo caIjipiti.
6Peŋka Josefi kaafwa, neŵakwaŵo ŵonse naŵo kaŵafwa pamo necitentekwa ico conse. 7Lomba aŵaIsilaeli ŵalukufyalisya, nekufulo'kwakuti, nekufunuka, nekukoso'kwakuti; namucalo lomba kaŵakumana monse.
8Popele apo paliimine nemfumu yaŵukumo mucalo caIjipiti itayamwisiŵile Josefi. 9Nayo yalilaŵile kuŵantu ŵaiyo ati: Ŵoneni, aŵantu aŵaIsilaeli ŵalitucilile ubwinji nekutucila nemakosa: 10twendeni, ŋgatuŵacenjelele, ŵeŋgesa kufula, kaŵili pakuŵuke'ŋkondo imbi, ŵekesa kusaŋkana netupondo twesu, nekulwa nafweŵo, lomba nekwima mukulukufuma mucalo. 11Pakuti pali fyefyo ŵaliikalicile pali ŵo ŵasikulu aŵamilimo mukuŵapensya kumilimo ikatesye. Naŵo aŵaIsilaeli kaŵamwiŵacila Falo imisi yama tala, Pitomo naLamese. 12Sombi pakuŵakatasyo'kwakuti kuŵaIjipiti, kaŵafulo'kwakuti, kaŵakumana ponse. Kaŵili aŵaIjipiti ŵaliŵele nensoni pakuti paŵaIsilaeli. 13Lomba aŵaIjipiti ŵaliŵapanjilisye aŵaIsilaeli ati ŵalukupyunjisya makosa: 14naŵo ŵaliŵaleŋgesye imyeo yaŵo ukulula kumilimo ilemene, iyakuli syamende neyancelwa, nakumilimo yonse iyamwiŵala, kumilimo yaŵo yonse, iyo ŵaŵapanjilisye ukupyuŋga nemakosa.
15Popele apo imfumu yaŵaIjipiti yalilaŵile kufimbela fyaŵaEbeya, isina lyacico cimbi niSifila, nesina lyacico nacimbi niPuwa: 16kailaŵila ati: Mweŵo, pakuŵacitile'milimo yaŵucimbela aŵanakasi aŵaEbeya, pakuŵona ati ŵalukufyala, kani ali mwana umwalalume eli mukamwipaye, sombi kani ali mwana umwanakasi eli akalukwikele nemweo. 17Sombi ifimbele'fyo fyalukuŵatonda ŵaLesa; tafyacitile koti nifyefyo ifi yafifundile imfumu yaŵaIjipiti; sombi fyaliŵapulwisye nemweo aŵana aŵalalume. 18Popele imfumu yaŵaIjipiti yalifiitile ifimbela, nekulaŵila kuli fyo ati: Mbanindo mucitile'fi, nekuŵapulusya nemweo aŵana aŵalalume? 19Kumfwa ifimbela kafilaŵila kuli Falo ati: Nipakuti aŵanakasi aŵaEbeya taŵapalene neŵanakasi aŵaIjipiti; pakuti ŵalisantucile, ŵalafyala lomba taciŋgafika kuli ŵo icimbela. 20Popele apo ŵaLesa ŵalificitile bwino ifimbela: lomba aŵantu kaŵafula, kaŵaŵa nemakosa ukwakuti. 21Popele lomba, pakuti ifimbela fyaliŵatondele ŵaLesa, epo ŵafileŋgesye ukuŵa neŵamumaŋanda afifyo.
22Popele Falo walifundile aŵantu ŵakwe ŵonse ati: Aŵana aŵalalume aŵakafyalwa ŵonse mukaŵapose munika, sombi aŵana aŵanakasi ŵonse mukaŵapulusye nemweo.
Currently Selected:
Ifyakufuma 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
