Ifyakufuma 3
3
1Lomba Mose walukwembele'taŋga lyakwe Yitilo wisifyala, umupapatilisi uwamucalo caMidyani. Popele alitanjilile itaŋga ukulitwala ku numa yampanta, nekufika nakulupili lwaŵaLesa, ulupili lwaOlebi. 2Popele lomba iŋkalamba yaŵaYawe yalibwenekele kuli ye mumulilo mukati kacinsokela cimbi; popele alitontomekele, lomba kuŵona nikucinsokela icilukwako'mulilo, sombi ukupya ceci. 3Popele Mose ati: Tanje mpasuke munsila, mbone iciŵonwaŵonwa ici icakukaŋkamana, ati icinsokela tacipile. 4Popele ili ŵabwene ŵaYawe ati apasuka-mo mukuŵona, ŵaLesa ŵalimwitile pakati kacinsokela, nekulaŵila ati: Mose! Mose! Naye ati: Nineŵo ŋkuno. 5Kumfwa ŵaLesa ati: Wipalamina kuno; ufule insapato syoŵe kumakasa oŵe, pakuti apo apo wimakene pali uŵuleme. 6Kaŵili ŵalilaŵile ati: Neŵo nineŵaLesa ŵaŵawiso, ewaLesa ŵaŵaAblaamu, eŵaLesa ŵaŵaIsaci, eŵaLesa ŵaŵaYakobi. Peŋka Mose kaafimba napamenso; pakuti alitinine uku tamba pali ŵaLesa.
7Popele ŵaYawe ati: Icine naŵono' kupeŋga kwaŵantu ŵanji aŵali muIjipiti; naumfwo'kulila kwaŵo pakuti pakuŵakatasya kufilolo ifilukuŵatuma; pakuti ndiisiŵile insoni syaŵo; 8lomba ndiselucile mukuŵapulusya muminwe yaŵaIjipiti, nekuŵafumya mucalo ico mukuŵafisya kucalo iciweme icikulu, kucalo umulukukuŋka amandili newuci, kwaŵo aŵaKanani neŵaYeti neŵaAmoli, neŵaPelisi, neŵaYifi, neŵaJebusi. 9Popele ŵukumo ŵona, ukulila kwaŵaIsilaeli kulificile kuli neŵo: kaŵili naŵono'kupensyo'ko uku ŵalukuŵapensya kuŵaIjipiti. 10Isa lomba pano, ŋkutume kuli Falo, ati ukaŵafumye mucalo caIjipiti aŵantu ŵanji a ŵa Isilaeli.
11Peŋka Mose kaalaŵila kuli ŵaLesa ati: Mbaneŵo ninenani, ati nje kuli Falo, ati ŋkawafumve aŵaIsilaeli mucalo caIjipiti? 12Naŵo ŵaLesa ati: Cine cine ŋkalukuli naweŵo; kaŵili akesiŵilo akakuli weŵo ati ndikutumine kakalukuli nikaka: Ili ukaŵafumya aŵantu mucalo ca Ijipiti, mukalukuŵapyunjila ŵaLesa palupili ulu.
13Popele Mose walilaŵile kuli ŵaLesa ati: Ŵoneni, ili ŋkafika kuŵaIsilaeli, nekulaŵila kuli ŵo ati: ŴaLesa ŵaŵawisinwe eŵantumine kuli mweŵo; naŵo ili ŵakalaŵila kuli neŵo ati: Mbesina lyaŵo niŵanani? mbaŋkalaŵile'ndo kuli ŵo?
14Popele ŵaLesa ŵalilaŵile kuli Mose ati: NDI ŴAŴO AŴA NDI! Kaŵili ati: Ukalaŵile'fi kuŵaIsilaeli ati: ŴANDI eŵantumine kuli mweŵo.
15Nakaŵili ŵaLesa ŵalilaŵile kuli Mose ati: Ukalaŵile'fi kuŵaIsilaeli ati: ŴaYawe, Lesa waŵawisinwe, eŵaLesa ŵakwe Ablaamu, eŵaLesa ŵakwe lsaci, eŵaLesa ŵakwe Yakobi, eŵantumine kuli mweŵo. Ilyo esina lyanji ilyamuyayaya, ico ecakwanuka canji icakufitentekwa fyonse. 16Koya, ukaŵaŵuŋganye aŵakulu ŵaŵaIsilaeli, ukalaŵile kuli ŵoati: ŵaYawe, Lesa waŵawisinwe, eŵaLesa ŵakwe Ablaamu, eŵakwe lsaci, eŵakwe Yakobi, ŵalibwenekele kuli neŵo, nekulaŵila ati: Icine naisa kuli mweŵo; naŵone'fyo ifi ŵalukumuciteni mucalo caIjipiti. 17Kaŵili nalaŵila ati: Ŋkamufumyeni kukukululuka ukwamucalo caIjipiti, ukumufisyeni kucalo caŵaKanani necaŵaYeti, necaŵaAmoli, necaŵaPelisi, necaŵaYifi, necawajebusi, kucalo umulukukuŋka amandili neŵuci. 18Popele ŵakomfwisye'siwi lyoŵe; lomba ukafike, weŵo pamo neŵakulu ŵaŵaIsilaeli, kumfumu yaŵaIjipiti, eli mukalaŵile kuli yo ati: WaYawe, Lesa waŵaEbeya, ŵaliisile kuli fweŵo; popele tulukumukombeteleni ati musumine ŵukumo ati tuye mumpaŋga umusinso wansiku sitatu, ati tukepaye imilambu iyakuli ŵaYawe Lesa wesu. 19Popele ndiisi ati imfumu yaŵaIjipiti tesi ikasumine ati muka ye, koku neli nipakukatasiwa kukuŵoko ukwamakosa. 20Popele ŋkatambiko'kuwoko kwanji, nekucipame'calo caIjipiti kufimpelampela fyanji fyonse, ifyo ifi ŋkacita pakati pali co; popele panuma yafyefyo epo ikamulekeni ati mulukuya. 21Kaŵili ŋkaŵasyucisya aŵantu aŵa pamenso aŵaIjipiti; popele apo lomba, ili mukaya, tesi mukaye minwe lukoso; 22sombi aŵanakasi ŵonse ŵakalomba kuŵaŵyaŵo aŵaIjipiti nakuli ŵaŵo aŵalukwikala mumananda aŵo, ifintu fyamataŋgalo ifyesilifa, nefyamataŋgalo ifyegolide, nefyakufwala; popele mukafwika aŵana ŵenu aŵalalume neŵanakasi; fyopele'fyo mukaŵatapila aŵaIjipiti.
Currently Selected:
Ifyakufuma 3: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
