Danyeli 9
9
1Pamwaka wakutaŋga wakwe Daliu, umwana wakwe Ekasyuilusi, uwapaŵana ŵaŵaMadai, uwaikalicilwe ati nimfumu yapaŵufumu bwaŵaKalidaya; 2pamwaka wakutaŋga wakwikalika kwakwe, neŵo neDanyeli kanjisiŵisya kumabuku ukupenda kwamyaka, ifyakuli yo isiwi lyaŵaYawe lyaisile kuli Jelemiya umupapatilisi, iyakukonsya ukonalwa kwa Jelusalemi, ati myaka amakumi asanu naŵili. 3Popele nalilolesye amenso anji kuli ŵaSikulu Lesa, mukufwaya-fwaya kukutembela nekulukulomba pamo nekulifina nefikundulu nematoi. 4Peŋka kantembela kuli ŵaYawe Lesa wanji, nekulukufisulula, nekulaŵila ati:
MweŵaSikulu, mweŵaLesa aŵakulu aŵakutinisya, aŵacita koti kulayana neŋkumbu kuli ŵaŵo aŵalukuŵatemwa nekulonda amafunde aŵo; 5twaŵifya, twacita Ifyakuleŋgulula, twacite'fisendeme, twaaluka, ili tupasucila ukufuma kumafunde enu nakufyakusololola fyenu; 6kaŵili tatwakuticile aŵapyunjisi ŵenu aŵapapatilisi, aŵalukulaŵila mwisina Iyenu kumfumu syesu nakufileme fyesu nakuli ŵawisifwe nakuŵantu ŵonse aŵamucalo. 7MweŵaSikulu ukuluŋgama kuli kuli mweŵo, sombi kuli fweŵo nikukufuluŋgana kwapamenso, koti nipakasuŵa kalelo; kuŵantu ŵaŵaJuda, nakuŵalukwikala mujelusalemi, nakuŵaIsilaeli ŵonse, aŵali apepi, neŵali ukutali, monse mufyalo umo mwaŵatamfya, pakuti pakupulaisya kwaŵo uko ŵamupulaisisyeni. 8MweŵaSikulu, kuli fweŵo kuli ukufuluŋgana kwapamenso, kumfumu syesu nakufileme fyesu nakuli ŵawisifwe, pakuti twaŵifya nakuli mweŵo. 9Kuli ŵaSikulu, Lesa wesu, kuli iŋkumbu nekufitulula; pakuti twaŵaalucila; 10kaŵili tatwaumfwile isiwi lyaŵaYawe, Lesa wesu, mukwenda mumafunde aŵo, ayo ŵatekele pamenso esu muminwe yaŵapyunjisi ŵaŵo aŵapapatilisi. 11Icine, aŵaIsilaeli ŵonse ŵapulaisya ifunde Iyenu, ili ŵapasuka-mo, ŵeŋgesa-kukutika isiwi lyenu; pakuti pali fyefyo ukufiŋga kwaitulwilwa pali fweŵo, pamo necilapo, icilembelwe mwifunde lyakwe Mose umupyunjisi waŵaLesa; pakuti twaŵifya kuli ŵo. 12Popele ŵalunduŵika amasiwi aŵo, ayo ŵatulaŵilile fweŵo neŵasololwesi ŵesu aŵalukusololola nafweŵo, ili ŵatuletele ŵumbifi uŵukulu; pakuti, pansi peulu lyonse, tapacitilwe ifyacitilwe paJelusalemi, 13Koti nifyefyo ifilembelwe mwifunde lyakwe Mose, ŵumbifi uŵu ŵonse bwaisa pali fweŵo; naŋgawe'fyo tatulombele uluse lwaŵaYawe Lesa wesu, ati ŋgatwalulule tufume kukusendama kwesu, tuŵe nekwisiŵisya ŵucine bwenu. 14Pakuti pali fyefyo ŵaYawe ŵalukuŵuceta ŵumbifi nekuŵuleta pali fweŵo; pakuti ŵaYawe Lesa wesu ŵaliluŋgeme kumilimo yaŵo yonse'yo ŵalukucita, sombi tatwakuticile isiwi lyaŵo. 15Lomba pano, mweŵaSikulu Lesa wesu, aŵafumisye aŵantu ŵenu mucalo caIjipiti kukuŵoko kwamakosa, nekulipokela impupo, koti nipakasuŵa kalelo; twaŵifya, twacite'fisendeme. 16MweŵaSikulu, koti kuluŋgama kwenu konse, ndukumukombeteleni ati ukufitwa nekukalipa kwenu ŋgakwalulwe kufume kumusi wenu Jelusalemi, ulupili Iwenu uluswetelele; pakuti Jelusalemi neŵantu ŵenu ŵaŵa cakutoŋgalwa kuli ŵo ŵonse awatusiŋgulucile, pakuti pakuŵifya kwesu nekusendama kwaŵawisifwe. 17Pakuti pali fyefyo, mweŵaLesa ŵesu, kutikeni ukutembela kwamupyunjisi wenu, nekulomba kwakwe, muleŋgesye ati pamenso penu patule pamupunda wenu uswetelele uwaŵa nekonalwa, pakuti pali ŵaSikulu. 18MweŵaLesa ŵanji, kutikeni, mumfwe; tapukeni, muŵone ukonalwa kwesu nemusi uwilicilwe kwisina Iyenu; pakuti tatuleta pamenso enu ukulomba-lomba kwesu pakuti pakuluŋgama kwesu, sombi nipakuti paŋkumbu syenu isikulu. 19MweŵaSikulu, ŋgamumfwe; mweŵaSikulu, mufituluke; mweŵaSikulu, mukutike, mucite; tekukokola; pakuti pali mweŵo mweŵene, mweŵaLesa ŵanji, pakuti umusi wenu neŵantu ŵenu ŵaliilicilwe kwisina Iyenu.
20Lomba ili ncilaŵila, nekutembela, nekufisulula ukuŵifya kwanji nekuŵifya kwaŵantu ŵanji aŵaIsilaeli, nekupela ukulomba-lomba kwanji pamenso aŵaYawe Lesa wanji pakuti palupili lwaŵaLesa ŵanji uluswetelele; 21icine ili ncilaŵila ukutembela, uyo-muntu Gabiliyeli, uyo nabwene pakuŵoneka pakutaŋga, walileŋgesiwe ukupalala uluŵilo, nekuŋkuma-ko pampindi yamulambu waciŋgulo. 22Naye nekumfunda, nekulaŵila naneŵo, ati, WeDanyeli nafuma pano mukukuleŋgesya nimfundi wakwisiŵisya. 23Pakutatika kwakulomba-lomba koŵe ifunde lyaima, lomba naisa mukukuŵula; pakuti ulitemiwe ukwakuti; pakuti pali fyefyo alakanya bwino iceŵo, wisiŵisye ukuŵoneka.
24Imiluŋgu amakumi asanu naaŵili ilifundilwe paŵantu ŵenu napamusi wenu uswetelele, mukusilisya ukupulaisya, nekupesya ukuŵifya, nekulamwina ifyakusendama, nekufisya-mo ukuluŋgama kwamuyayaya, nekwisala-ko kukuŵoneka nakuŵusimicisi, nekusufya-ko kuli Woyo Uswetelele. 25Pakuti pali fyefyo wisiŵe ubwenesye ati, ukufuma kukwima kwefunde lyakuŵusya nekwiŵakulula Jelusalemi ukufika kuli Masaya, imfumu, pakalukuli imiluŋgu isanu naiŵili; nemiluŋgu amakumi asanu nalimo naiŵili, ukeŵakululwa nensila nemufolwa, epampindi syakukatasya. 26Popele pakusila iyo-miluŋgu amakumi asanu nalimo naiŵili, Masaya akapinikwa nekusyala uwakuŵula neli kantu; lomba aŵantu ŵamfumu iyo ikesa ŵakonala umusi nemupunda uswetelele; ukupela kwaiyo kukalukuli neŵuloŵe, nakukupela-ko nako kukalukuli iŋkondo; ifyakonala filifundilwe. 27Nayo ikacito'kulayana ukukosele neŵenji pamuluŋgu umo; kaŵili ukufika pakati pamuluŋgu ikapesya umulambu wakwipaya necakuposa; nakaŵili pepindo lyafipakaŵi pakesa uwakonala; lomba ukufika kukusilisya uku ŵalandakanya, uŵukali ŵuketululwa pawakonala.
Currently Selected:
Danyeli 9: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
