Danyeli 8
8
1Pamwaka waŵuitatu uwakwikalika kwamfumu Belisyasa, ukuŵoneka kwalibwenekele kuli neŵo, ekuli neŵo neDanyeli, panuma yakoko ukwabwenekele kuli neŵo pakutaŋga.
2Lomba kambona pakuŵoneka; lomba paliŵele ati, ili nabwene, nali muSyusyani mukasaŵa, akali mukalo kaElami; kaŵili kambona pakuŵoneka, lomba kandi panika yaUlayi. 3Telyo niŋgacewuka, niŋgawona, lomba nikumbelele iyalalume iyali nemaseŋgo aŵili, iliimakene pamenso anika; kaŵili ayo-maseŋgo oŵilo atali; sombi limbi kalicila uŵutali napaliŵyakwe; lomba ilyo ilitali kalimena panuma. 4Nalibwene imbelele ilukusindika kumbonsi nakunofu nakusaufu: lomba pape'filwani ifiŋgemakana pamenso aiyo; kaŵili tapali-po uwakupulusya muminwe yaiyo neli umo; sombi ilukucita koti kufwaya kwaiyo nekulukulikusya.
5Popele pakulukwalakanya neŵo, lomba pepe wambusi walitulile kumbonsi pamenso pacalo conse, taakumine-ko nakumusili pansi: kaŵili iyo-mbusi yali neseŋgo lyampupo pakati pamenso aiyo. 6Nayo kaifika nakumbelele iyalalume iyali nemaseŋgo ayo aŵili, iyo nabwene iliimakene pamenso anika, kaiiŵutucila nekukalipa kwamakosa aiyo. 7Lomba nalibwene ilukupalamina apepipepi nakumbelele, nekwiŵela neŵukali uŵukulu, nekwipama imbelele, nekwitoŵa amaseŋgo aiyo oŵilo; lomba tapali-po amakosa mumbelele akwimakana pamenso aiyo; sombi yaliiwisisye napansi, nekwinyantalo'musyele; tapali-po neli umo uŋgaipulusya imbelele muminwe yaiyo. 8Popele pepe walilikusisye ukwakuti; lomba pakukosa ye, iseŋgo ilyo ilikulu nekukonoka; peŋka pamupunda waliko palimenene amaseŋgo ane ampupo alukulola kufipupu ifyamwiulu fyonane. 9Popele muli limo lyapali o mwalifumine akaseŋgo kanini, akakulile nekuŵa kakulu ukwakuti kusaufu nakumutulesuŵa nakucalo caŵuleme. 10Nako kalikulile ukwakuti, nakwiŵumba lyamwiulu; peŋka fimbi ifyeŵumba nefyatuwaŋgawaŋga kakafiposa napansi nekufinyantala. 11Icine, kakalikusya, nakumfumu yeŵumba; kakaipokolola umulambu wansiku syonse, kaŵili umupunda waiyo uswetelele kauwisiwa. 12Neŵumba nalyo nekupelwa kuli ko pamo nemulambu wansiku syonse pakuti pakupulaisya; nako nekuciposa pansi icine, nekuficita nekusyuka.
13Popele apo kanumfwa nikuli umbi uswetelele alukulaŵila; lomba naumbi naye uswetelele nekulaŵila kuli woyo uwalaŵile ati, Impindi yasyani pakalukuli ukuŵoneka kwamulambu wansiku syonse, nekwakupulaisya ukonala, mukuposa nemupunda uswetelele neŵumba mukunyantalwa pansi pamakasa? 14Lomba kaalaŵila kuli neŵo ati, Ukufika kufiŋgulo nencelo imyanda amakumi aŵili naitatu; telyo uŋgaswesiwa umupunda uswetelele.
15Popele paliŵele ati neŵo eneDanyeli, ili nabwene ukuŵoneka, naliesesye ukukwisiŵisya; lomba paliimakene pamenso anji koti mekalilo amuntu. 16Kaŵili naliumfwile isiwi lyamuntu pakati paUlayi lilukuŵilicisya ati, Gabiliyeli, mwisiŵisye uyu-muntu ukuŵoneka. 17Fyopele'fyo walipalamine-po apo naimakene; sombi, pakwisa ye, kantilimuka, kaŋgwila pansi pamenso anji; sombi kaalaŵila kuli neŵo ati, Wisiŵe, wemwana wamuntunsi, pakuti ukuŵoneka kwampindi yakupela-ko. 18Lomba, ili acilaŵila kuli neŵo naliile mutulo utwakuti napamenso panji pansi; sombi ye waliŋkumine-ko nekunjimika, 19Naye ati, Ŵona-ko, ndukukwisiŵisya ifikaŵa-po pampindi yakupela kwakufitwa, pakuti kwampindi yakupela-ko iyansicilwe.
20Imbelele iyalalume iyo waŵona, iyali nemaseŋgo ayo aŵili, o nimfumu syakuMadai nakuPasai. 21Kaŵili uyopepe uwawuŋgwa nimfumu yaŵaEla: neseŋgo ilyo ilikulu ilili pakati pamenso akwe nalyo nimfumu yakutaŋga. 22Kaŵili ifyalyelyo ilyakonokele, pamupunda waliko nekwima ane, lomba uŵufumu ŵune ŵukema pamukoka waŵantu uyo, sombi apakuŵula uŵukulu bwaiyo. 23Popele pampindi yakupela-ko kwaŵufumu bwaŵo, pakukumana lukoso aŵakupulaisya, lomba imfumu ikali pamenso, iyakwisiŵa amasiwi amfinsi, ikemakana. 24Neŵukulu bwaiyo naŵo ŵukalukuli nemakosa, sombi uŵo taŵukalukuli kuŵukulu bwaiyo iyine; akonala ukwakukaŋkamana, nekusyuka nekulukuficita lukoso; kaŵili akonala aŵamakosa neŵantu awaluŋgeme. 25Koti kulandakanya kwaiyo ikasyucisya ukucenjela muminwe yaiyo; ikalukulikusya mumutima waiyo, nekuŵonala aŵenji pakwikala ŵo muŵutende; nakaŵili ikaimina imfumu yamfumu; sombi ikakononwa apakuŵula-minwe. 26Lomba ukuŵoneka kwafiŋgulo nencelo ukwalaŵilwa kwacine; sombi kawisala-ko kukuŵoneka, pakuti kwansiku isikesa pantanjile apatali.
27Popele apo neŵo neDanyeli kansensuka nekulukutenda simbi insiku; telyo niŋgawuka, niŋgacite'milimo yamfumu; kawili nalukukaŋkamana pakuti pakuŵoneka; sombi papo'muntu uwakukwisiŵisya.
Currently Selected:
Danyeli 8: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
