Danyeli 10
10
1Pamwaka waŵuitatu wakwe Kolesi, imfumu yakuPasai, palifisulwilwe icintu kuli Danyeli, isina lyakwe niBelitesyasa; kaŵili ico-cintu cali cacine, niŋkondo ikulu; naye waliciisiŵisye, wali nekalaŋgo akamukuŵoneka. 2Pansiku isyo neŵo neDanyeli nalukulila insoni imiluŋgu itatu iŵuluŵulu. 3Nsinalilepo siŋkwa uweme, kaŵili ifinani nelufaina fyonse tafyaficile namukanwa kanji, nakaŵili nsinasuŵile neli panini, ili taiŋgapita imiluŋgu itatu iŵuluŵulu.
4Lomba pakasuwa kamakumi aŵili nasine akamwensi wakutaŋga, ili nali pambali yanika ikulu, ldekeli, 5naliceŵucile nekuŵona, lomba nikumuntu ufwite imbafuta, paluwunda pakwe palisuminwe negolide iliwaminine ilyakuUfasi: 6umuŵili wakwe kaŵili walipalene nabelulo, napamenso pakwe koti kuŵoneka kwakampesimpesi; amenso akwe ali koti ninyale syamulilo, nemaŵoko akwe nemakasa nao kumusaŋgo alipalene neluŵemba ulukutwilwe; kaŵili ukusimbulwa kwamasiwi akwe ali koti lisiwi Iyeŵumba.
7Lomba neŵo neDanyeli neŋka kambona ukuŵoneka; pakuti aŵantu aŵo nali naŵo taŵabwene-po ukuŵoneka; sombi ukututuma ukukulu kwaliponene pali ŵo, naŵo nekuŵutuka ukulukufisama. 8Fyopele'fyo neŵo kansyala neŋka, kambona ukuŵoneka uku ukukulu, lomba tamwasyele muli neŵo neli makosa onse; pakuti uŵulombe bwanji nekusaŋgulwa muli neŵo kuŵola, nsinalamine-makosa neli anini. 9Naŋgawe'fyo neŵo naliumfwile ukusimbula kwamasiwi akwe; lomba ili naumfwile ukusimbula kwamasiwi akwe, naliwilile pamenso anji mutulo utulemene, napamenso anji pansi. 10Popele lomba ukuŵoko nekuŋkuma-ko, nekunteka pamakufi anji napamapi amaŵoko anji. 11Naye nekulaŵila kuli neŵo ati, WeDanyeli, wemuntu utemiwe ukwakuti, ŋgawisiwisye amasiwi andukulaŵila kuli weŵo, wimakane; pakuti ndituminwe pano kuli weŵo. Peŋka, ili alaŵile isiwi ilyo kuli neŵo, kanjimakana ili ntutuma. 12Peŋka alilaŵile kuli neŵo ati, Witina, Danyeli; pakuti, peŋka pakasuŵa kakutaŋga ako walandakenye mumutima woŵe mukwisiŵisya nekulicefya pamenso aŵaLesa ŵoŵe, lomba amasiwi oŵe aliumfwanicile; lomba neŵo naisa pakuti pamasiwi oŵe. 13Sombi imfumu yakuŵufumu bwakuPasai yalincicile insiku amakumi aŵili nakamo; sombi ŵona, Mikayeli, imbi yapamfumu isikulu, waliisile mukuŋgofwa-ko; lomba kansyala apo pamo nemfumu syakuPasai. 14Pano naisa mukukwisiwisya ifikesa-po paŵantu ŵoŵe pansiku syakupela-ko; pakuti ukuŵoneka kuli kwansiku syapantanjile.
15Popele ili alaŵile kuli neŵo koti masiwi ayo, kantontomekela pansi nekulukusinsimene. 16Popele lomba umbi uwapalene neŵana ŵaŵantunsi walitintile-ko kumilomo yanji; peŋka kaŋgasuka, kandaŵila kuli woyo uwaimakene pamenso anji ati, Mweŵasikulu ŵanji, pakuti pakuŵoneka insoni syanji syaŋgalucila, nsisyele-po nemakosa. 17Pakuti mbasyani nemuntu wawasikulu ŵanji aŵa niŋgalawila naŵasikulu ŵanji aŵa? pakuti neŵo, impindi yopele'yo tapasyele muli neŵo neli makosa; kaŵili tapasyele muli neŵo neli kupema.
18Popele apo walintintile-po liŵili uwali nemekalilo amuntunsi, naye nekuŋkosya. 19Naye ati, Wemuntu weutemiwe ukwakuti, witina; uŵutende bwikale noŵe, uŵe nemakosa, icine uŵe nemakosa. Popele, pakulaŵila ye kuli neŵo kaŋkosa, kandaŵila ati, Ŵasikulu ŵanji ŋgaŵalaŵile; pakuti mwaŋkosya.
20Peŋka naye ati, Kani uliisi ati nakwisileni? Pano lomba ndukubwelela mukulwa nemfumu yakuPasai; popele, pakwima neŵo, imfumu yaŵaEla nayo ikesa. 21Sombi ndukukuŵula ifyo ifilembelwe mumalembo aŵucine; kaŵili tapali-po awakuŋgofwa-ko pakulwa naŵaŵa, sombi eŋka Mikayeli imfumu yenu.
Currently Selected:
Danyeli 10: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
