Danyeli 7
7
1Pamwaka wakutaŋga uwaŵufumu bwakwe Belisyasa, imfumu yakuBabiloni, lomba Danyeli walilotele paŵulo bwakwe nekuŵone'fintu; peŋka alilembele umuloto nekuŵulisisya iceŵo conse.
2Danyeli alilaŵile ati, Nalibwene pakuŵona kwanji uŵusiku, lomba nefipupu fyonane ifyamwiulu fyalitukawile pacisiŵa icikulu. 3Popele ifilwani fine ifikulu fyalituntucile ukufuma mucisiŵa ifyapusene ifine nafine. 4Icakutaŋga cali koti niŋkalamu, cali nemapindo apuŋgwa; kambona, lomba nemapindo aciko nekunukulwa, naco nekusuntulwa kucalo nekwimikwa pamakasa aŵili koti muntu, kaŵili nemutima wamuntu nekupelwa kuli co. 5Lomba necilwani cimbi, icaŵufiŵili, icapalile beya, calisuntwilwe koti kweyamina kumbafu, namukanwa kaciko pakati pameno mwali nembafu sitatu; popele kaŵalaŵile'fi kuli co ati, Ima, ulukulya umunefu ubwinji. 6Panuma pali fyefyo kambona, lomba nikuli cimbi icapalile incense, icali nemapindo ane acuni pamusana; kaŵili ico-cilwani cali nemitwi ine; lomba uŵukulu bwalipelwe kuli co. 7Panuma pali fyefyo kaŵili kambona pakuŵona kwaŵusiku, lomba nikucilwani icaŵufine, icakutinisya, icamakosa, ecikosele ukwakuti; kaŵili cali nemeno amfitwe akulu; calukulya nekulukusansala nekututula umusyele pafyakusyala-po; kaŵili calipusene nefilwani fyonse ifyacitanjilile; naco cali nemaseŋgo ikumi. 8Nalukwalakanya ifyamaseŋgo ayo, popele palimenene pakati pali o iseŋgo limbi, linini; pamenso aliko amaseŋgo atatu atanjile-ko alinukucile; lomba mwiseŋgo ilyo mwali amenso koti menso amuntu nekanwa akalukulaŵila ifintu ifikulu.
9Kaŵili kambona, lomba nekuŵikwa amateŵe, nekwikala umbi umucekulu uwakalekale, ifyakufwala fyakwe fyali tuu koti candwa, nemisisi iyamumutwi wakwe yali koti masako ambelele aswetele; iteŵe lyakwe kuŵyataka kwamulilo, nemikoŋko yaliko nayo yamulilo ulukwaka. 10Umuloŋga wamulilo walifumine nekutulila pamenso akwe; amasausande namasausande alukumupyunjila, neŵantu mpaŋgana mpaŋgana nekwimakana pamenso akwe; isolololo lyaliikalicilwe, nemabuku nao nekwisulwa. 11Lomba kambona pampindi iyo pakuti pakusimbula kwamasiwi akulu ayo lyalaŵile iseŋgo; kambwenesya ukufika napapo caipailwe icilwani, nemuŵili waciko nekonalwa, naco icine nekuposwa mukucoca mumulilo. 12Kaŵili ifyafilwani ifyo fimbi, uŵukulu bwafiko bwalifumisiwe; naŋgawe'fyo imyeo yafiko nekutalimfiwa ukufika impindi, nempindi yamwaka.
13Kambona pakuŵona kwaŵusiku, lomba paliisile nemakumbi amwiulu umbi upalene nemwana wamuntunsi, naye nekufika kuli woyo umucekulu uwakalekale, lomba ŵalimupalamisye napamenso akwe. 14Peŋka kwalipelwe kuli ye uŵukulu neŵuleme neŵufumu, ati aŵantu ŵonse aŵamikoka yonse nemilaka yonse ŋgaŵalukumupyunjila: uŵukulu bwakwe ŵukulu bwamuyayaya uwutawukapitilila ŵoŵu; uŵufumu bwakwe ebwakuwulo'konalwa.
15Sombi neŵo neDanyeli, umupasi wanji waliŵele nensoni mukati mumuŵili wanji, kaŵili ukuŵona ukwamumutwi wanji kwalukuŋkatasya. 16Peŋka kampalamina kuli umbi waŵaŵo aŵemakene-po, nekumwipusya icine icafyefyo fyonse. Lomba walimbulile nekunjisiŵisya ukuŵulisisya kwafintu ifyo. 17Ifilwani ifyo ifikulu, ifili fine, nimfumu sine isikema ukufuma mumusili, 18Sombi aŵaluŋgeme ŵaŴaŵo Aŵacilile eŵakaŵupoka uŵufumu, nekulukuli neŵufumu insiku pee, ensiku syamuyayaya.
19Popele apo nalifwaile ukwisiŵa ifyacine ifyaceco-cilwani icaŵufine, icapusene nafyo fyonse, icakutinisya ukwakuti, icali nemeno amfitwe nemala aluŵemba, icalukulya nekulukusansala, nekututula umusyele pafyakusyala-po; 20nefyamaseŋgo ayo ikumi ali pamutwi waciko, neseŋgo ilyo limbi ilyaimine, ilyo awile ayo atatu pamenso aliko; iseŋgo ilyo ilyali nemenso nekanwa akalukulaŵila ifintu itikulu, ilyali necinso icakucila ukukosa napaaŵyakwe. 21Kambona, lomba iseŋgo ilyo lyopele nekulwa neŵaluŋgeme nekucila napali ŵo; 22ili taaŋgesa uyo umucekulu wakalekale, nekuŵapela awaluŋgeme ŵaŴaŵo Aŵacilile ukusololola; nekwisa impindi yakuŵa neŵufumu awaluŋgeme.
23Fyopele'fyo ye ati, Ieilwani caŵufine cikalukuli ŵufumu bwaŵuŵune pacalo, uŵukapusana neŵufumu uŵo ŵonse, nekulya icalo conse, nekututula umusyele pali co, nekucisansala. 24Kaŵili ifyamaseŋgo ayo ikumi, muŵufumu uŵo mukema imfumu ikumi; lomba naimbi ikema panuma yasiko; yo ikapusana nasyesyo isyakutaŋga, nayo ikawisya imfumu sitatu. 25Kaŵili yo ikalaŵila amasiwi akuŵasensa Aŵo Aŵacilile, nekuŵakatasya awaluŋgeme ŵaŴaŵo Aŵacilile; kaŵili yo ikesya ukwalula impindi nemafunde, nao akapelwa namuminwe yaiyo ukufika impindi nemapindi neyafu lyampindi. 26Sombi pakasolololwa, lomba ŵakafumya uŵukulu bwaiyo, mukuŵulya nekuŵonala ukufika kukupela-ko. 27Popele uŵufumu nekwikalika neŵukulu bwaŵufumu ŵonse uŵuli pansi yeulu lyonse ŵukapelwa kuŵantu ŵaŵaluŋgeme ŵaŴaŵo Aŵacilile; uŵufumu bwaŵo ŵufumu bwamuyayaya; kaŵili ifyakwikalikwa kuli ŵo efikaŵapyunjila nekuŵomfwisya.
28Ukupela kwaceŵo mpa. Sombi neŵo neDanyeli, ifyakulaŋguluka fyanji fyalukuŋkatasyo'kwakuti; kaŵili napamenso panji nekwaluka muli neŵo: sombi nalukucilama iceŵo mumutima wanji.
Currently Selected:
Danyeli 7: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
