Danyeli 6
6
1Daliu alitemenwe ukwikalika paŵufumu imfumu umwanda nemakumi aŵili, ati ŋgasikumane monse muŵufumu; 2napeulu pali syo imfumu sitatu isyampupo; lomba Danyeli wali imo yasyesyo syotatu; ati isyo-mfumu syonse ŋgasiŵulisisye kulisyesyo syotatu, iiŋgesa imfumu ikulu mukukatasiwa. 3Lomba uyo-Danyeli wali nempupo isyakucila napamfumu syonse nesyaŵuleme, pakuti wali-mo nemupasi uweme; nayo imfumu ikulu yalukufwayo'kumwikalika peulu paŵufumu ŵonse.
4Popele apo isyo-mfumu syampupo pamo nemfumu syonse syalukufwayafwaya ukumupinda Danyeli umulandu uwakuŵufumu; sombi tasyabwene-po umulandu neli cisendeme neli cimo; pakuti ye walitekenye, kaŵili muli ye tamwabwenekele icakmŵifya neli cisendeme neli cimo. 5Peŋka aŵo-ŵantu kaŵalaŵila ati, Tekuti tuŵone umulandu uwakuli wuyu-Danyeli, apakuŵulo'kumusinina ifyamafunde aŵaLesa ŵakwe. 6Peŋka isyo-mfumu syampupo nemfumu syonse kasiwuŋgana pamo kumfumu ikulu, kasilaŵila kuli yo ati, Mwemfumu Daliu, kamulukwikalilila nemweo! 7Imfumu syonse isyampupo isyamuŵufumu nefilolo nemfumu nempemba naŵamukatamwene ŵaalika pamo mukwikalika ifunde lyaŵufumu, nekuleŋga umusiliko ukosele, ati aŵantu ŵonse ukalombe'cintu kuli lesa umbi neli ŋganikumuntu umbi, utaali nimweŵo, mwemfumu, pansiku amakumi atatu, akaposwe mwiceŋgo lyaŋkalamu. 8Pano, mwemfumu, kamwikalika umusiliko, mulembe nekesiŵilo kenu pamalembo, eŋgesakwalulwa, koti mafunde aŵaMadai neŵaPasai ataaluka-po. 9Pakuti pali fyefyo imfumu Daliu yalilembele nekesiŵilo pamalembo napamusiliko.
10Popele Danyeli, ili aisiŵile ati amalembo aliŵicilwe-po nekesiwilo, aliinjile muŋanda yakwe; (lomba netumbeluka twakwe utwamuŋanda yakwe twaliisucile-po ati kololesya kuJelusalemi); popele alukufukama impindi sitatu pakasuŵa nekulukutembela nekulukutota pamenso aŵaLesa ŵakwe, koti nifyopele'fyo ifi walukucita nekale. 11Popele apo aŵoŵantu ŵaliŵuŋge'ne nekumusaŋga Danyeli alukulomba nekulukukombetela pamenso aŵaLesa ŵakwe. 12Eli waŋgapalamina nekulaŵila pamenso amfumu ifyamusiliko wamfumu, ati, Kansi tamwalembele-po nekesiŵilo kenu pamusiliko, ati aŵantu ŵonse ukalombe'cintu kuli lesa umbi neli ŋganikumuntu umbi, utaali nimweŵo, mwemfumu pansiku amakumi atatu, akaposwa mwiceŋgo lyaŋkalamu? Imfumu nayo nekwasuka ati, Ifyo fyacine koti mafunde aŵaMadai neŵaPasai, ataaluka-po, 13Popele ŵaliasucile nekulaŵila pamenso amfumu ati, Uyo-Danyeli, uli waŵana ŵaŵukaili bwaŵaJuda taalukumulaŋgulukeni, mwemfumu, neli kulaŋguluka umusiliko uyo mwaŵicile-po nekesiŵilo kenu, sombi alalomba pakasuŵa kamo impindi sitatu.
14Popele imfumu, ili yaumfwile amasiwi ayo, yalukulifitilwa ukwakuti, nekwikalika nemutima waiyo mukumupulusya Danyeli; nayo yalipyunjile ukufika ukuwa kwakasuŵa, mukumupulusya. 15Peŋka aŵo-ŵantu waliwuŋgene kumfumu, nekulaŵila kumfumu ati, Mwisiŵe, mwemfumu, ati lifunde lyaŵaMadai neŵaPasai ati imisiliko yonse nemafunde onse afundilwe kumfumu tesi akaalukepo neli limo. 16Popele apo imfumu yalifundile; naŵo nekumuleta Danyeli, nekumuposa mwiceŋgo lyaŋkalamu. Lomba imfumu yalilaŵile kuli Danyeli ati, ŴaLesa ŵoŵe, aŵo upyunjila insiku syense, eŵakukupulusya! 17Popele nebwe lyaliletelwe nekuŵikwa pamulyaŋgo peceŋgo; nayo imfumu nekuciŋkako nekesiwilo kaiyo iyine pamo netwisiŵilo twampemba syaiyo; ifintu fyonse fiiŋgesa mukwaluka ifyakuli Danyeli.
18Popele apo imfumu yaliile kukasaŵa kaiyo nekulukukana nefyakulya uŵusiku ŵonse; kaŵili taŵaletele pamenso aiyo utulimba, ŵaŵa; utulo twaiyo nekufyuka kuli yo. 19Lomba imfumu nekwima kucinyamaca, nekuyo'luŵilo kwiceŋgo lyaŋkalamu, 20Popele, ili yapalamine kwiceŋgo kuli Danyeli, yaliŵilicisye nesiwi lyansoni; nayo imfumu nekulaŵila kuli Danyeliati, WeDanyeli, wemupyunjisi waŵaLesa, aŵo aŵali nemweo, ŵaLesa ŵoŵe, aŵo upyunjila insiku syonse, kani ŵaliisi ukukupulusya kuŋkalamu? 21Kumfwa Danyeli nekulaŵila kumfumu ati, Mwemfumu, kamulukwikalilila nemweo! 22ŴaLesa ŵanji ŵali ŵatuma iŋkalamba yaŵo, nekufumbatisya kutunwa tŵaŋkalamu; lomba tasinsomesye-po; pakuti, pamenso aŵo, palibwenekele ukufumbucilwa muli neŵo; kaŵili napamenso enu, mwemfumu, nsiŵifisye-po. 23Peŋka imfumu kaisembo' kwakuti, kaifunda ati ŋgawamwinusye Danyeli mwiceŋgo, Fyopele filya Danyeli ŵalimwinwine mwiceŋgo; lomba taŵabwene pali ye ukusomena neli kunini, pakuti alipemene-mo muli ŵaLesa ŵakwe.
24Popele apo imfumu yalifundile, naŵo nekuŵaleta aŵo-ŵantu aŵamusinine Danyeli, nekuŵaposa mwiceŋgo lyaŋkalamu, ŵo neŵana ŵaŵo neŵakasi ŵaŵo; lomba neŋkalamu nekucila pali ŵo, nekonala nemafupa aŵo onse, peŋka pakufika ŵo pansi peceŋgo.
25Popele apo imfumu Daliu yalilembele iŋkalata kuŵantu ŵonse aŵamikoka yonse nemilaka yonse, aŵalukwikala ponse pacalo capansi, ati, Uŵutende ŵufule kuli mweŵo! 26Ndukufunda ati, Monse umu bwikalika uwufumu bwanji, aŵantu ŋgawalitutumine ŵalukutina pamenso aŵaLesa ŵakwe Danyeli; pakuti ŵo niŵaLesa aŵali nemweo, aŵalukwikalilila insiku syonse; uŵufumu bwaŵo taŵukonalwa-po, uŵukulu bwaŵo ŵukalukwikele ukufika nakumpindi yakupela-ko. 27Ŵalaluŵula nekupulusya; ŵalacito'twisiŵilo nefimpelampela mwiulu napacalo capansi; niŵo aŵamupulwisye Danyeli kumakosa aŋkalamu.
28Fyopele filya uyo-Danyeli walisyucile, pakulukuŵekalika aŵantu Daliu, napakwikalika Kolesi umuPasai naye.
Currently Selected:
Danyeli 6: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
