Danyeli 3
3
1Nebukadinesa imfumu waliŵumbile iciŵumbwaŵumbwa cegolide, icali neŵutali bwakukumana amakubita amakumi asanu nalimo, neŵupamfi bwakukumana amakubita asanu nalimo; lomba waliciimicile paciseleŵele icakuDula, mukalo kakuBabiloni.
2Popele apo Nebukadinesa imfumu yalitumine aŵantu mukuwuŋganya imfumu nefilolo naŵamukatamwene naŵakampeŋga naŵakalama nempemba newamilaŋgwe neŵakulu ŵonse aŵalukuŵekalika aŵamutwalo, ati ŵese pampindi yakupapatila kuciŵumbwaŵumbwa icaimicile Nebukadinesa imfumu. 3Peŋka imfumu isyo nefilolo naŵamukatamwene nawakampeŋga naŵakalama nempemba newamilaŋgwe neŵakulu ŵonse aŵalukuŵekalika aŵamutwalo, ŵaliŵuŋgene pamo pakupapatila kuciŵumbwaŵumbwa icaimicile Nebukadinesa imfumu; aŵo kaŵemakana pamenso aciŵumbwaŵumbwa icaimicile Nebukadinesa.
4Popele iŋkalamba nekuŵilicisya ati, Kuli mweŵo, mweŵantu ŵamikoka namikoka, mwemupusene imilaka, pafundwa, 5ati impindi isyo syopele isi mukalukumfwa ukulila kwalupeŋga nemusembe nebwesela namanyema nekaŋkoto nemuloli nemalimbaamikokayonse, mukalukuwila pansi nekulukucindika iciŵumbwaŵumbwa cegolide icaimika Nebukadinesa imfumu; 6lomba aŵantu ŵonse uyo utakawila pansi ukulukucindika, impindi iyo yopele akaposwa mukati kesiko lyamulilo ukulu. 7Pakuti pali fyefyo pampindi iyo, aŵantu ŵonse, ili ŵaumfwile ukulila kwalupeŋga nemusembe nebwesela namanyema nekaŋkoto nemalimba amikoka yonse, lomba aŵantu ŵonse aŵamikoka namikoka neŵapusene imilaka ŵaliwilile pansi nekulukucindika iciŵumbwaŵumbwa cegolide icaimicile Nebukadinesa imfumu.
8Pakuti pali fyefyo pampindi iyo, ŵambi aŵaKalidaya ŵalipalamine nekuŵaŵusisya aŵaJuda umulandu. 9Naŵo ŵaliasucile kuli Nebukadinesa imfumu ati, Mwemfumu, kamulukwikele nemweo insiku syonse lukoso. 10Mwemfumu, mwalifundile ati, Aŵantu ŵonse ukomfwa ukulila kwalupeŋga nemusembe nebwesela namanyema nekaŋkoto nemuloli nemalimba amikoka yonse, akawile pansi nekulukucindika iciŵumbwaŵumbwa cegolide; 11nakaŵili ati aŵantu ŵonse utakawila pansi ukulukucindika eukaposwa mukati kesiko lyamulilo ukulu. 12Lomba epo ŵali aŵaJuda ŵambi, ŵopele mwaikalicile neŵukulu pafyeŵo ifyamukalo kakuBabiloni, Syadilaci naMesyaci naAbedinego; aŵo-ŵantu, mwemfumu, tawamulaŋgulucileni mweŵo: taŵaŵapyunjila ŵalesa ŵenu neli kucicindika iciŵumbwaŵumbwa cegolide ici mwaimika.
13Peŋka Nebukadinesa nekukalipa nekufitwo'kwakuti, nekuŵaŵula aŵantu ati ŋgaŵalete Syadilaci naMesyaci naAbedinego. Naŵo nekuŵaleta aŵantu aŵo pamenso amfumu. 14Nebukadinesa nekwasuka nekulaŵila kuli ŵo ati, Syadilaci, Mesyaci, Abedinego, kani mulukucito'mumbo pakuŵulo'kumupyunjila lesa wanji neli kucindika iciŵumbwaŵumbwa cegolide ici naimika? 15Lomba mweŵo, pampindi yakumfwa ukulila kwalupeŋga nemusembe nebwesela namanyema nekaŋkoto nemuloli nemalimba amikoka yonse, kani musumine ukuwila nekulukucindika iciŵumbwaŵumbwa ici naŵumba, ciweme; sombi kani tesi mucindike, mukaposwa impindi iyo yopele mukati kesiko lyamulilo ukulu; lomba ni nani uyo-lesa uŋgamupulusyeni namuminwe yanji?
16Peŋka Syadilaci naMesyaci naAbedinego nekuyasuka imfumu ati, MweŵaNebukadinesa, tacili ceŵo cesu icakumwasukeni ifyafifi. 17Kani nifyefyo, ŵaLesa ŵesu, aŵa tulukupyunjila, ŵaliisi ukutupulusya kwisiko lyamulilo ukulu; icine ŵakatupulusya muminwe yenu, mwemfumu. 18Sombi kani ifyo tefyo, ŋgamwisiŵe'fi, mwemfumu, ati, tesi tupyunjile ŵalesa ŵenu neli kucicindika iciŵumbwaŵumbwa ici mwaimika.
19Telyo aŋgakalipa fimbi Nebukadinesa, napamenso pakwe nekuwasaŋgucila Syadilaci naMesyaci naAbedinego: naye kaalaŵila, kaafunda ati ŋgaŵaukosye umulilo mwisiko ukucila impindi sisanu nasiŵili napali fyefyo ifi uŋgakosiwa insiku. 20Kaŵili waliŵafundile ŵambi aŵamakosa aŵapafita fyakwe ati, Kakeni Syadilaci naMesyaci naAbedinego, muŵapose mwisiko lyamulilo ukulu. 21Popele apo aŵo-ŵantu nekukakwa, ili ŵafwiteiminjila nemalaya nefyamumitwi nefyakufwala fyaŵo fimbi, nekuposwa mukati kesiko lyamulilo ukulu. 22Popeie apo, pakuti ifunde lyamfumu lyali lyaluŵilo, napakuti isiko lyali neciŵe icakuti, icaka camulilo caliŵepeye aŵo-ŵantu aŵaŵulile Syadilaci naMesyaci naAbedinego. 23Sombi aŵo-ŵantu ŵotatu, Syadilaci naMesyaci naAbedinego ŵaliponene pansi ili ŵacikacilwe, mukati kesiko lyamulilo ukulu.
24Peŋka Nebukadinesa imfumu walikaŋkamene ukwakuti, nekwimo'luŵilo, nekulaŵila nakumpemba syakwe ati, Kansi tatuposele-mo mukati kamulilo aŵantu ŵatatu aŵakacilwe? Nasyo kasiyasuka imfumu ati, Fyacine, mwemfumu! 25Nayo nekwasuka ati, Ŵoneni, naŵona aŵantu ŵane aŵakakulwilwe, ŵalukwenda mukati kamulilo, kaŵili taŵakwete-po neli kusomenwa; nakaŵili amekalilo awoyo uwaŵuŵane ali koti mwana waŵalesa.
26Peŋka Nebukadinesa nekupalamina kumulyaŋgo wakwisiko lyamulilo ukulu, nekulaŵila ati, Syadilaci, Mesyaci, Abedinego, mweŵantu ŵaŵaLesa aŵo aŵacilile, ŋgamufume-mo, mwise kuno. Popele Syadilaci naMesyaci naAbedinego ŵalifumine-mo mukati kamulilo. 27Lomba imfumu nasyo nefilolo naŵamukatamwene nempemba syamfumu, isyo isyawuŋgene, syaliŵabwene aŵo-ŵantu, ati umulilo taukwete-po makosa pamiŵili yaŵo, kaŵili imisisi yamumitwi yaŵo tekuŵaŵuka-po, neminjila yaŵo tekwaluka-po, neli kunuŋka kwamulilo tekupita pali ŵo.
28Popele Nebukadinesa walilaŵile ati, Ŵalicindeme ŵaLesa ŵaŵaSyadilaci naMesyaci naAbedinego, ŵopele ŵatuma iŋkalamba yaŵo nekuŵapulusya aŵapyunjisi ŵaŵo aŵalukucetekela muli ŵo, nekwalula amasiwi amfumu, nekuposa imiŵili yaŵo, ŵeŋgesa-kupyunjila neli kucindika ŵalesa ŵambi ŵonse aŵataŵali niŵaLesa ŵaŵo aŵene. 29Pakuti pali fyefyo ndukucite'funde ati, Aŵantu ŵonse aŵamikoka yonse neŵamilaka yonse, aŵakalaŵila umucobwe kuli ŵaLesa ŵaŵaSyadilaci naMesyaci naAbedinego, ŵakapinaikwa tunini tunini, kaŵili amananda aŵo akaaluka mupili wesyala; pakuti tapali-po lesa umbi uwisi ukupulusya ukwakuŵe'fi. 30Popele apo imfumu yaliŵapele uŵuleme, mukalo kakuBabiloni, Syadilaci naMesyaci naAbedinego.
Currently Selected:
Danyeli 3: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
