Danyeli 4
4
1NeNebukadinesa imfumu, kuŵantu ŵonse, aŵamikoka yonse nemilaka yonse, aŵalukwikala ponse pacalo capansi, uŵutende ŵufule kuli mweŵo. 2Nalaŋguluka ati ukwelelwa neŵo ukubwenesya utwisiŵilo nefimpelampela ifyacitile kuli neŵo ŵaLesa aŵacilile lukoso. 3Utwisiŵilo twaŵo tukulu! Ifimpelampela fyaŵo fyamakosa! Uŵufumu bwaŵo bwamuyayaya, nekwikalika kwaŵo nako kwakuŵantu ifitentekwa nafitentekwa.
4Neŵo neNebukadinesa nalukwikala neŵutende muŋanda yanji, nekulukusyuka mukatanino kanji. 5Lomba nalibwene iciloto icantinisye; kaŵili ifyakulaŋguluka ifyapaŵulo bwanji nekuŵona ukwamumutwi wanji kwalukuŋkatasya. 6Pakuti pali fyefyo nalifundile ati ŵaŵenjisye pamenso anji aŵamano ŵonse aŵakuBabiloni, ati ŵanjisiŵisye ukuŵulisisya kwaciloto. 7Peŋka kaŵenjila aŵamano neŵalaye neŵaKalidaya neŵayambo; naneŵo kambaŵula ifyaciloto; sombi ŵo taŵanjisiŵisye ukuŵulisisya kwaciko. 8Sombi panuma lukoso, Danyeli, isina lyakwe niBelitesyasa, koti lisina lyakwe lesa wanji, uli-mo nemupasi waŵalesa aŵaswetelele, ewainjile umo nali; lomba kantuŵa ifyaciloto pamenso akwe, ati: 9WeBelitesyasa, wemfumu yaŵamano, pakuti ndiisi ati umupasi waŵalesa aŵaswetelele uli muli weŵo, nakaŵili ati tapali-po icamfiso icakukukatasya, umbule ifyakuŵona ifyakulota kwanji uko nabwene pamo nekuŵulisisya kwakuko. 10Ifyakuŵona ifyamumutwi wanji paŵulo bwanji fyali fyakuŵe' fi: Nalibwene, lomba nikumuti mukati kacalo capansi, neŵutali bwauo naŵo ŵukulu. 11Uyo-muti walimenene nekukosa, lomba uŵutali bwauo nekukumana kwiulu lukoso nekuŵoneka kwauo nekukumana monse mucalo nemupelele lukoso. 12Kaŵili amaŵula auo aweme, nefisepo fyauo nafyo finji, nakaŵili muli wo mwali ifyakulya ifyakukumana ŵonse; inama syamumpaŋga syali necinto munsi muli wo, nefyuni ifyamwiulu nafyo nekwikala pamitano yauo; kaŵili ifyamunefu fyonse nekulukulya ifyauo. 13Popele nalibwene pafyakuŵona ifyamumutwi wanji ili nali paŵulo, lomba nikuwakupembelela uswetelele waseluka kwiulu. 14Naye waliŵilicisye ati, Kamutemo'muti, mupinike imitano yauo, mulukukunta-ko ukulukufumya amaŵula auo nekulukupalaŋganya nefisepo fyauo: inama ŋgasitume-mo munsi muli wo, nefyuni nafyo fifume-po pamitano yauo. 15Naŋgawa nifyefyo kamuleka icisiŋga camisyu yauo cisyale mumusili, mukakeko nemuŋkoŋka wamfitwe neluŵemba pakati pali kampumpwe uwamumpaŋga; kaŵili ŋgacilukutontoja kucime icakwiulu, nekulukwikala nenama mucani icamucalo. 16Kaŵili umutima waciko ŋgawalulwilwe ukuleko'kwikala koti wamuntu, umutima wanama ŋgaupelwe kuli co; popele impindi sisanu nasiŵili ŋgasikapite pali co. 17Ukusinina uko kuli koti lifunde lyaŵakupembelela; ukukomeka uku kuli koti masiwi aŵaŵo aŵaswetelele; ati aŵalaŵi ŵakesiŵe ati Aŵo Aŵacilile lukoso ŵalukuŵekalika paŵufumu bwaŵantu, nekuŵupela kuli woyo uŵalukufwaya, nekupyanika peulu pali ŵo nemuntu uwakucepa lukoso uŵuleme. 18Iciloto ico neŵo neNebukadinesa nalicibwene; lomba weŵo weBelitesyasa kamuciŵulisisya, pakuti aŵamano ŵonse awamuwufumu bwanji taŵesi-po ukunjisiŵisya ukuŵulisisya; sombi weŵo uliisi, pakuti umupasi waŵalesa aŵaswetelele uli muli weŵo.
19Popele apo Danyeli, isina lyakwe niBelitesyasa, walikaŋkamene impindi, nekulaŋguluka kwakwe nako nekulukumukatasya. Kumfwa imfumu nekwasuka ati, WeBelitesyasa, tekusumina ati iciloto nekuŵulisisya kwaciko kukukatasye. Sombi Belitesyasa waliasucile ati, Mweŵasikulu ŵanji, iciloto ŋgaciŵe kuŵalukumufitilweni, nekuŵulisisya kwaciko nako ŋgakuŵe kutupondo twenu. 20Uyo-muti umwabwene, uwakulile nekukosa, uwakumene uŵutali kwiulu lukoso, nekuŵona kwauo nekufika monse mucalo; 21uwali nemaŵula aweme, nefisepo ifinji, uwali-mo nefyakulya ifyakukumana ŵonse; munsi muli wo emwalukwikala inama isyamumpaŋga, napamitano yauo epalukwikala ifyuni ifyamwiulu: 22uyo nimweŵo, mwemfumu, mwemwakula nekukosa; pakuti uŵukulu bwenu bwakula, ŵulukukumana nakwiulu; uŵufumu bwenu ŵulikumene nakucalo icipelele-ko lukoso, 23Lomba pakuti imfumu yalibwene uwakupembelela uswetelele, alukuseluka kwiulu, nekulaŵila ati, Kamutoma umuti, muwonale; naŋgawe'fyo mucileke icisiŋga camisyu yauo cisyale mumusili, mucikake nemuŋkoŋka wamfitwe neluŵemba pakati pali kampumpwe uwamumpaŋga: kaŵili ŋgacilukutontota kucime icakwiulu, nekulukwikala nenama syamumpaŋga, ili tasiŋgapita pali co impindi sisanu nasiŵili; 24lomba ukuŵulisisya nikuku, mwemfumu; kaŵili lifunde lyaŴaŵo A ŵacilile elyaisa pali ŵasikulu ŵanji imfumu: 25ati mukatamfiwa ukufuma kuwantu: lomba ukwikala kwenu kukalukuli pamo nenama syamumpaŋga; kaŵili wakaleŋga ati mukalukulya icani koti niŋombe, nekulukutontola kucime icakwiulu; lomba impindi sisanu nasiŵili sikapita pali mweŵo, ili tamuŋgesiwa ati niŴaŵo Aŵacilile eŵalukuŵekalika muŵufumu bwaŵantu nekuŵupela kuli woyo uyu ŵalukufwaya. 26Nakaŵili pakuti palifundilwe ati ŵaleke icisiŋga camisyu yamuti, lomba uŵufumu bwenu ŵukalukwikala nemakosa ati bwenu, pakweŵa'ti mukesiŵa ati fyakwiulu efilukwikalika. 27Pakuti pali fyefyo, mwemfumu, ukufunda kwanji ŋgamukusumine, mufikonone ifyakuŵifya fyenu kukuluŋgama, nefisendeme fyenu nafyo ili muŵabwenesye iŋkumbu awapeŋgele; ati cipale impindi yaŵutende bwenu ŵukatalimpe.
28Ifyo fyonse fyaliisile pamfumu Nebukadinesa. 29Pakusila imyensi ikumi naiŵili, lomba yalukwenda muŋanda yaŵufumu iyakuBabiloni. 30Peŋka imfumu yalilaŵile ati, Kansi uyu tauli niBabiloni umukulu, unaiŵeke apakwikala imfumu, kumakosa aŵukulu bwanji, pakuti pakucindika uŵuleme bwanji? 31Kansi isiwi ilyo ili licili lukoso pakanwa kamfumu, lomba kalipona mwiulu isiwi ati, Wemfumu Nebukadinesa, kuli weŵo fililaŵilwe, uŵufumu bwakumbuluka nakuli weŵo. 32Lomba wakutamfiwa ukufuma kuŵantu, nekwikala koŵe nako kwakulukuli pamo nenama syamumpaŋga: wakuleŋgesiwa ulukulya icani koti niŋombe, lomba impindi sisanu nasiwili sikapita pali weŵo; ili toŋgesiŵa ati niŴaŵo Aŵacilile eŵalukuŵekalika muŵufumu bwaŵantu, nekuŵupela kuli woyo uŵalukufwaya.
33Impindi iyo yopele ifintu ifyo fyalicitilwe kuli Nebukadinesa, naye nekutamfiwa ukufumiwa kuŵantu, nekulukulya necani koti niŋombe, nemuŵili wakwe nawo nekulukutontola kucime icakwiulu, ili imisisi yakwe yakulile koti masako alukosi nemala akwe koti afyuni.
34Popele apo, pakusile'nsiku isyo, neŵo neNebukadinesa naliceŵucile kwiulu, lomba nekalaŋgo kanji nekubwelela kuli neŵo, peŋka kambacindika A ŵo A ŵacilile, nekuŵalemya nekuŵatota Aŵo aŵekalilila insiku pee; pakuti ukwikalika kwaŵo kwikalika kwamuyayaya, uŵufumu bwaŵo bwakuŵantu aŵafitentekwa nafitentekwa. 35Kaŵili aŵalukwikala pacalo capansi ŵalieŵelwe ati ŵalukoso; lomba A ŵacilile ŵo ŵalacita koti kufwaya kwaŵo kufita fyakwiulu nakuŵantu aŵapacalo capansi; tapali-po neli umo uwisi ukukanya iminwe yaŵo, neli kulaŵila kuli ŵo ati, Mweŵo mulukucite' ndo? 36Pampindi iyo yopele akalaŋgo kanji kalibwelele muli neŵo; kaŵili, pakuti pakucindikwa kwawufumu bwanji, uŵuleme nekutoŵolwa kwanji kwalibwelele kuli neŵo; popele impemba syanji nemfumu syanji syalukumfwaisya; lomba kaŋkosa namuŵufumu bwanji, neŵukulu uŵuweme naŵo nekulundwa-po pali neŵo.
37Lomba ŵukumo neŵo neNebukadinesa ndukutota nekulemya nekucindika imfumu yakwiulu, pakuti imilimo yaiyo yonse eyacine, insila syaiyo sililuŋgeme; kaŵili aŵo aŵenda nekulukulitota, iliisi ukuŵacefya ŵo.
Currently Selected:
Danyeli 4: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
