Danyeli 2
2
1Pamwaka waŵuiŵili uwaŵufumu bwakwe Nebukadinesa, lomba Nebukadinesa walilotele nefiloto; nemutima wakwe nekulemuka, netulo twakwe nekufuma kuli ye. 2Popele imfumu yaliŵaŵulile ati ŋgaŵaŵete awabwaŋga neŵalaye naŵamoŵa neŵaKalidaya, mukwiŵulisisya imfumu ifiloto fyaiyo. Fyopele'fyo ŵaliinjile nekwimakana pamenso amfumu. 3Imfumu yalilaŵile kuli ŵo ati, Nalota iciloto, lomba umutima wanji walemuka pakuti pakufwayo'kwisiŵa iciloto.
4Peŋka aŵaKalidaya kaŵalaŵila kumfumu mumulaka waŵaSilya ati, Mwemfumu, ŋgamukalukwikele nemweo insiku pee! Ŋgamutuŵule fweŵapyunjisi ŵenu ifyaciloto, eli twakumuŵulisisyeni.
5Imfumu yaliŵaasucile aŵaKalidaya ati, Ieintu ico cafuma-mo muli neŵo; kani tesi mumbule iciloto pamo nekuŵulisisya kwaciko, mukapinaikwa, nemananda enu kaŵili akaaluka mupili wesyala. 6Sombi kani mubwenesye iciloto nekuŵulisisya kwaciko, mukapoka kuli neŵo impese nefyakulambula neŵuleme uŵukulu; pakuti pali fyefyo mumbwenesye iciloto nekuŵulisisya kwaciko.
7Naŵo kaŵaasuka liŵili kaŵalaŵila ati, Imfumu ŋgaituwule fweŵapyunjisi ŵaiyo iciloto, eli twakubwenesya ukuŵulisisya.
8Sombi imfumu yaliasucile ati, Ndiisi icine ati mulukufwayo' kuŵika-po impindi, pakuti mwaŵona ati icintu cafuma kuli neŵo. 9Sombi kani mweŵo tekumbula iciloto, pali ifunde limo lukoso ilyakuli mweŵo; pakuti mwaansika amasiwi akuŵepa aŵipile akulaŵila pamenso anji, ili taiŋgaaluka impindi; pakuti pali fyefyo mumbule iciloto, eli nakwisiŵa ati muliisi ukumbwenesya ukuŵulisisya kwaciko.
10AŵaKalidaya naŵo nekwasuka pamenso amfumu ati, Tapali-po umuntu neli umo pacalo capansi uwisi ukubwenesya iceŵo camfumu; pakuti tapali imfumu neli nisikulu neli nimpemba iyaipwisye icakuŵe'fi kuwabwaŋga neli ŵalaye neli ŵaKalidaya ŵonse neli umo. 11Kaŵili imfumu ilukufwaya icintu iciponaile; lomba tapali-po umbi uwisi ukucibwenesya pamenso amfumu, apakuŵula ŵalesa aŵo ukwikala kwaŵo takuli pamo neŵamunefu.
12Pakuti pali fyefyo imfumu yalifitilwe nekukalipa ukwakuti nekuŵafunda ati ŋgaŵaŵepaye aŵamano ŵonse aŵakuBabiloni. 13Popele apo ifunde lyalitulicile ati ŵepaiwe aŵamano; lomba ŵalukumufwaya-fwaya Danyeli neŵaŵyakwe mukuŵepaya.
14Popele Danyeli, pakwalakanya, alimwasucile bwino Alyoci icilolo cafita ifyalukulama imfumu, wopele uwaile mukuŵepaya aŵamano aŵakuBabiloni; 15alimwasucile Alyoci, icilolo camfumu, ati, Mbanindo lyakwaŋgufye'fi ifunde ilyakufuma kumfumu? Popele Alyoci nekumuŵulisisya Danyeli iceŵo. 16Lomba Danyeli nekwinjila nekulomba kumfumu ati muŋgansicile impindi ielelwe, eli ŋkamubwenesyeni ukuŵulisisya.
17Popele Danyeli waliile kunanda yakwe nekuŵaŵule'ceŵo ico Yananaya naMisyaeli naAsaliya, aŵaŵyakwe; 18ati twakulukulomba kuli ŵaLesa ŵakwiulu iŋkumbu isyapacamfiso ico; ati Danyeli neŵaŵyakwe ŵeŋgesa-konalwa pamo naŵambi aŵamano aŵakuBabiloni.
19Popele icamfiso calibwenekele kuli Danyeli mukuŵona ukwapaŵusiku. Peŋka Danyeli kaacindika ŵaLesa ŵakwiulu. 20Naye Danyeli nekwasuka nekulaŵila ati, Isina lyaŵaLesa licindikwe insiku syonse isyamuyayaya; pakuti aŵo amano nemakosa: 21ŵo ŵalaalula nempindi nensiku; ŵo ŵalafumya nemfumu, nekulukusipyanika imfumu; kaŵili ŵalaŵapela aŵamano amano, nekuŵapela ukwisiŵisya aŵalukwisiŵa akalaŋgo; 22ŵalafifisulula ifintu ifyapatali nefyamfiso; ŵalafiisiŵa ifili mumfinsi: kaŵili ukutuŵa kulekala naŵo. 23Ndukumutoteni nekulukumucindikeni, mweŵaLesa ŵaŵawisifwe, mwemwampela amano nemakosa nekunjisiŵisya pano ico ici twalomba kuli mweŵo; pakuti mwatwisiŵisya iceŵo camfumu.
24Pakuti pali fyefyo Danyeli waliinjile nakuli Alyoci, wopele uyo imfumu yaansicile ati onale aŵamano aŵakuBabiloni; aliile nekulaŵile'fi kuli ye ati, Tekuŵonala aŵamano aŵakuBabiloni, munyinjisye neŵo pamenso amfumu, eli nakwibwenesya imfumu ukuŵulisisya.
25Peŋka Alyoci walipulilile ukumwinjisya Danyeli pamenso amfumu, nekulaŵile'fi kuli yo ati, Naŵona umuntu uwapaŵana ŵaŵukalume bwakuJuda, uŋgaisiwisya imfumu ukuŵulisisya. 26Popele imfumu yaliasucile nekulaŵila kuli Danyeli, isina lyakwe niBelitesyasa, ati, Kani uliisi ukunjisiŵisya iciloto ico nabwene nekuŵulisisya kwaciko?
27Naye Danyeli nekwasuka pamenso amfumu ati, Ieamfiso ico ici yafundile imfumu ati ŵacibwenesye, lomba taŵesi ukwibwenesya imfumu, neli ŵamano neli ŵalaye neli niŵamoŵa neli ŵayambo; 28sombi ekwali ŵaLesa kwiulu aŵafisulula ifyamfiso, lomba ŵo ŵabwenesya kumfumu Nebukadinesa ifyo ifikesa-po pansiku syakupela-ko. Iciloto cenu nefyakuŵona ifyamumutwi wenu ifyapaŵulo bwenu efifi: 29pakuti mweŵo mwemfumu, Ifyakulaŋguluka fyenu fyaliisile kuli mweŵo paŵulo bwenu, ifyafyefyo ifikacitwa pantanjile; lomba aŵo aŵafisulula ifyamfiso ŵamwisiŵisyeni ifyo ifikesa-po, 30Sombi neŵo icamfiso ici tacifisulucile kuli neŵo pakuti pamano andi nao apakucila napaŵalaŵi ŵambi ŵonse, tau, sombi ati ukuŵulisisya ŋgakwisiŵikwe kumfumu, nakaŵili ati mwisiŵe ifyakulaŋguluka ifyamumutima wenu.
31Mweŵo mwemfumu, mwalibwene, lomba nikuciŵumbwaŵumbwa icikulu. Iciŵumbwaŵumbwa ico, icali cikulu makosa, icali nekutula ukuweme, caliimakene pamenso enu; kaŵili ukuŵoneka kwaciko kwali kwakutinisya. 32Ifyaciŵumbwaŵumbwa ico, umutwi waciko wegolide iliswetelele, intiŵi nemaŵoko aciko esilifa, akapafu neluŵunda lwaciko lwaluŵemba, 33amolu aciko amfitwe, kaŵili amakasa aciko pambi amfitwe, pambi napo amutumba. 34Kaŵili mwalibwene ati ibwe lyalikumucile-ko ukwakuwula-minwe, lyopele elyacipamine iciŵumbwaŵumbwa kumakasa acico ayo amfitwe nemutumba, nekwasansala tunini tunini. 35Popele apo imfitwe nemutumba neluwemba nesilifa negolide nekusansaicila pamo, nekuŵa koti misuŋgu iyapamansa syakupumina-po ulusuŵa; necipupu nekufiululula; fyopele'fyo tapabwenekele neli mupunda wafiko. Peŋka nebwe ilyapamine iciŵumbwaŵumbwa nekuŵa Iupili ulukulu, nekukumana napacalo ponse. 36Ico eciloto; lomba twakuŵula ukuŵulisisya kwaciko pamenso amfumu.
37Mweŵo mwemfumu nimwemfumu syamafumu; kuli mweŵo ŵaLesa ŵakwiulu ŵalipele uŵufumu neŵukulu nemakosa neŵuleme; 38nakaŵili apo ponse apa aŵana ŵaŵantunsi ŵalukwikala, ŵalipele muminwe yenu inama syamumpaŋga nefyuni fyamwiulu, nekumuleŋgesyeni ati mufiikalike fyonse: mweŵo emwemutwi uyo uwegolide. 39Popele panuma penu pakaŵuka neŵufumu ŵumbi ubwakucepa napaŵukulu ŵoŵe; kaŵili neŵufumu ŵumbi ubwaŵuŵutatu ubwaluŵemba, uŵukekalika ponse pacalo capansi. 40Lomba uŵufumu bwaŵuŵune naŵo ŵukalukukosa koti nimfitwe, pakuti imfitwe ilasansala nekukomeka ifintu fyonse; popele fyopele'fyo ifi imfitwe ificisa ifi fyonse, koti nifyopele'fyo uŵo-ŵufumu ŵukasansala nekuficisa. 41Popele pakuti mwalibwene amakasa nefikumo, pambi fyamutumba waŵuŵumfi, pambi napo fyamfitwe, lomba ŵukalukuliwufumu ubwamupaka; sombi pakalukuli muli ŵo ifyamakosa amfitwe, pakuti mwalibwene imfitwe ikumbawilwe nemutumba wanoŋgo. 42Kaŵili fyopele'fyo ifikumo ifyapamakasa ifi fyali pambi fyamfitwe pambi fyamutumba, koti nifyopele'fyo neŵufumu, naŵo ŵukalukuli pambi pakosele pambi napo patoŵaicile. 43Nakaŵili pakuti mwalibwene imfitwe ikumbawilwe nemutumba wanoŋgo, lomba wakatukulisaŋkanya neŵana ŵaŵantu; sombi tesi ŵakalukwikatana, koti nifyefyo ifi imfitwe taisaŋkana bwino nemutumba. 44Popele pansiku syamfumu isyo, ŵaLesa ŵakwiulu ŵakemika uŵufumu, uŵutaŵukonalwa nensiku pee, koku; kaŵili uŵupyani bwaŵuko taŵukasilwa aŵantu ŵambi; sombi ŵukapalaisisya nekonala uwu-wufumu ŵonse; naŵo ubwine nekwiminina insiku syonse isyakulukuyayaya. 45Kaŵili pakuti mwalibwene ati ibwe lyalikumucile-ko kulupili ukwakuŵula-minwe, nekupalaya imfitwe neluŵemba nemutumba nesilifa negolide; ŵaLesa aŵakulu eŵaisiŵisya imfumu ifikacitwa pantanjile; lomba iciloto cacine, nekuŵulisisya kwaciko nako kwacinenene.
46Popele apo imfumu Nebukadinesa yaliwilile ubwifuneme, nekulukumucindika Danyeli, nekuŵafunda aŵantu ati ŵamuposele umulambu nefinuncile bwino. 47Nayo imfumu nekumwasucila Danyeli ati, Ieinenene ŵaLesa ŵenu eŵaLesa ŵaŵalesa ŵonse, niŵaSikulu ŵamfumu, eŵakufisulula ifyamfiso, pakuŵa mweŵo mwaisiŵa ukufisulula icamfiso ici. 48Popele apo imfumu yalimwalulwile Danyeli ati mukulu, nekumupela impese isinji isikulu, nekumwikalika pakalo konse akakuBabiloni, ati ekale cilolo cakutaŋga icapaŵamano ŵonse aŵakuBabiloni. 49Naye Danyeli walilombele kumfumu, lomba yo nekuŵekalika Syadilaci naMesyaci naAbedinego peulu pafyeŵo ifyapakalo kakuBabiloni; sombi Danyeli ye waliikele mumulyaŋgo wamfumu.
Currently Selected:
Danyeli 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
