PUYAN LUHA’ 11
11
Dua usa iaʹ badaʹ tugen neng puyan Tuhan
1Kun ne naʹ ca kayu kuaʹ makeʹ, koʹ baʹan seʹ lutang sekut are. Kun dau ue: “Beteʹ ne ikoʹ, nguaʹ umaʹ palan Allah ngan padung pencai ie, ngan pecap kudaʹ kadoʹ diaʹ lemameʹ kidi. 2Mahung ne use tahaʹ juma umaʹ palan ina. Ayen tai nguaʹ a, uban lepa ne ilu naʹ a me kelunan diaʹ abeʹ un ngelan. Ida ke menyek Lepoʹ Buheʹ ina pat puloʹ dua bulan majan ne. 3Akeʹ ke cuk dua usa tugen nceʹ kenai, peging gelam guneʹ de, ketai badaʹ tiraʹ Allah ca ibu dua ato nem puloʹ tau pengemajan ne.
4Un dua usa iaʹ tugen ina ilu pekata neng dua re inan buaʹ ampang, pekina pe dua teken peritaʹ diaʹ tedeng kata juma Tuhan iaʹ un tanaʹ ini. 5Buk aheʹ kelunan iaʹ ubaʹ ten ke ngejaʹat ida dua, ke kenai luten cen paʹ de dua, sulo ke nasaʹ diaʹ bunoʹ de. Pekina lete buk aheʹ iaʹ ten ke ngejaʹat ida dua, atek kelunan ina ke matai lete. 6Un penyukat de dua ke mulen langit kenaʹ ujan, apan ujan abeʹ un nai ngajan nte dua penco tiraʹ Allah. Un penyukat pe ida dua neng lubang tebut sungai, senteng cuk sungai ngaliu dahaʹ. Un penyukat pe ida dua sukat pelaboʹ mung naʹan layu neng usun tanaʹ ini, mele kudaʹ liwai pengubaʹ de dua.
7Tegoʹ lepa ne gayeng nte dua penco tiraʹ Allah, kenai pun iaʹ jaʹat cen lubang ntem ina ke pepatai ngan nte dua. Nai ie ke nyupeʹ ida dua, ngan lematai ida dua. 8Un patai re dua ʹo peterai kaʹ usun janan lepoʹ bioʹ ina. Kaʹ lepoʹ ina lete dulu lepa napek Tuhan nte neng kayu tecek are. Ilu alaʹ kata lepoʹ ina cen lepoʹ Sudum ngan lepoʹ Masir. 9Kenai kelunan cen singket naʹan gaham perinta, ngan singket naʹan puhoʹ, ngan singket naʹan isiu, pekina pe cen singket naʹan lepoʹ, kenai re naʹat patai re dua dalem telu tau pa beluaʹ pengemajan ne. Abeʹ de buhaʹ diaʹ ca tai nanem ida dua. 10Saheʹ seʹ dulu nuʹo. Kun nte keliwa pencai kahang ida semaheʹ, moʹ dua usa pegawa dina ban ngkin kadoʹ naʹan iaʹ petuyen kelunan kusun tanaʹ ne. 11Uʹo lepa telu tau pa beluaʹ ina, kenai ca laset cen Allah iaʹ naʹ udip mida dua, penco re dua nai beteʹ, nai nekejeng. Mung kelunan diaʹ taʹan puyan ina, tai takut laleʹ ne tekaʹ de. 12Tegoʹ ina ne pegawa dua dina kenahan dau ca lengap pisiu ida dua cen langit: “Nai ne kempau.” Penco tai re dua pejung kaʹ langit tugung abun, ngajan diaʹ bunoʹ de naʹat ida dua. 13Tegoʹ ina, tekaʹ kenai liung tanaʹ iaʹ sarem, pa ketai mapeʹ ca tulat puloʹ lepoʹ ina. Tujoʹ ibu kelunan matai kuʹun liung tanaʹ ina. Mung kelunan diaʹ laʹa tai takut, penco re pempau seʹ pengebioʹ puyan Allah surga.
14Penaru iaʹ kedua ina lepa lapa. Belekaʹ laho kenai penaru iaʹ ketelu pelaʹa.
Tekepip iaʹ ketujoʹ o
15Kun melikat iaʹ ketujoʹ ina mempo tekepip pe, penco heʹ kenahan dau kudaʹ isiu iaʹ bioʹ kaʹ langit iaʹ kuma: “Penyukat iaʹ ke ngaren usun tanaʹ lepa anun Tuhan le ngan anun Keristus e naʹkini. Ia ke ngkang perinta pa majan uʹo.” 16Kun diaʹ lataʹ, dua puloʹ pat usa dina, diaʹ madung neng usun padung pengaren nte iaʹ nyeripa Allah ina, penco re pengkup ngan nyelama palaʹ Allah. 17Kun dau re:
“O Tuhan Allah iaʹ Atek Bioʹ Penyukat, iaʹ un
naʹkini, ngan iaʹ lepa ban un:
Ameʹ nyuaʹ tiga saheʹ palaʹ ikoʹ uban ncoʹ lepa
peluhaʹ penyukat coʹ iaʹ bioʹ,
uban ncoʹ nading ke mejo pengaren ncoʹ.
18Mung lepoʹ dulu diaʹ abeʹ un ngelan lepa buseʹ,
uban ini ne jakaʹ kenca hoʹ nai abeʹ.
Dalau ini pe ikoʹ ke pebetep ukum neng kelunan matai.
Dalau ini pe ikoʹ kenaʹ bang me mung pegawa diaʹ pegayeng mikoʹ,
ngan me mung kelunan diaʹ anun ncoʹ, diaʹ lataʹ pekuaʹ ngan diaʹ dumit.
ina ne toʹ kelunan diaʹ takut ikoʹ.
Uban ini ne jakaʹ koʹ ke nasaʹ kelunan diaʹ nasaʹ tanaʹ ini.”
19Kenai umaʹ palan Allah iaʹ kaʹ surga ina pesik, penco heʹ taʹan buhan tugen petuket luhaʹ dalem umaʹ palan ina. Belekaʹ kenai bekilet, ngan dau tuyau langit, ngan dau gerem, ngan tekaʹ liung tanaʹ, ngan ujan batu iaʹ kasa.
Currently Selected:
PUYAN LUHA’ 11: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
