PUYAN LUHA’ 10
10
Melikat ngan lelen surat iaʹ iʹut
1Akeʹ taʹan pelaʹa kenai ca melikat iaʹ pali seʹ, iaʹ nai puno cen langit. Ca abun gelam me, ngan ca saʹung tau neliling ulu ue. Silung nge koʹ baʹan mata tau, ngan taket te koʹ baʹan keluluk luten. 2Un pe ca lelen surat iaʹ iʹut pe pebejo neng ujoʹ o. Taket te iaʹ tahaʹ taʹu cut banget, ngan taket te iaʹ tahaʹ kabing cut usun tanaʹ. 3Penco ho lemikaʹ bioʹ dau koʹ baʹan dau kahang lencau kadoʹ. Lepa ha lemikaʹ, un pe dau tujoʹ de gerem ngahang mipa ia. 4Dalau dau tujoʹ gerem ina pisiu, ubaʹ keʹ ke nyurat te. Belekaʹ keʹ kenahan dau isiu cen langit kuma ha: “Nyelem pedemun dau tiraʹ diaʹ tujoʹ gerem dina. Ayen nyurat te.”
5Penco heʹ taʹan melikat iaʹ nekejeng neng usun banget, ngan neng usun tanaʹ ina, mejung ujoʹ taʹu ue kaʹ langit. 6Mentung dau ue pesantet dalem ngadan Allah iaʹ mudip lemuto-uto, iaʹ lepa uyan langit ngan mung inu iaʹ dalem me; ia pe lepa uyan tanaʹ, ngan mung inu iaʹ dalem me, ngan ia pe iaʹ lepa uyan banget, ngan mung inu iaʹ dalem me. Kun dau melikat ina laʹa: “Abeʹ un inu iaʹ ke peduʹai ie laʹa. 7Un sepuʹo tegoʹ melikat iaʹ ketujoʹ ke mempo tekepip pe ʹo, tegoʹ ina le tiraʹ Allah, iaʹ suhuk cen kena are, kenai palup ʹo, pekuaʹ dau iaʹ Allah lepa badaʹ me pegawa diaʹ ulaʹ a are.”
8Penco dau iaʹ akeʹ ban kenahan pisiu cen langit ina, un dau ue neng akeʹ pelaʹa: “Tai ne ikoʹ, alaʹ lelen surat iaʹ pebejo ina, iaʹ un neng ujoʹ melikat iaʹ nekejeng neng usun banget, ngan neng usun tanaʹ ini.”
9Penco tai heʹ palaʹ melikat ina nyat lelen surat iaʹ iʹut ina. Kun dau ue neng akeʹ: “Alaʹ ne, uman ne. Naʹ pe batek koʹ ke paʹit kuʹun ne, un me tekaʹ a dalem paʹ koʹ ukoʹ baʹan nyioʹ layuk are.”
10Tai heʹ alaʹ lelen surat iaʹ iʹut ina cen ujoʹ melikat ina. Penco heʹ uman ne. Un tekaʹ a dalem paʹ keʹ me, koʹ baʹan tekaʹ nyioʹ layuk de. Un sepuʹo lepa heʹ nyeloʹ o, tai paʹit tekaʹ a dalem batek keʹ. 11Un dau ue neng akeʹ pelaʹa: “Ca liwai laʹa abeʹ koʹ are senteng ke badaʹ seluhan kimet Allah neng puyan naʹan naʹan gaham perinta, ngan lepoʹ de, ngan naʹan naʹan isiu kelunan, ngan diaʹ paren nte.”
Currently Selected:
PUYAN LUHA’ 10: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
