PUYAN LUHA’ 12
12
Leto ngan Bali Sungai
1Lepa ina nai ca tedanaʹ bulen iaʹ bioʹ luhaʹ kaʹ langit. Un ca usa leto iaʹ un gelam ukoʹ diseʹ mata tau, ngan un bulan nten taket te. Neng ulu ue un tapung paren iaʹ un puloʹ dua betuʹen kidi. 2Leto ina nyeng ke nganak, ngan tuyen tekaʹ a sakit ke mempet anak ke, ina iaʹ ukoʹ o nange.
3Nai pelaʹa ca tedanaʹ bulen luhaʹ kaʹ langit. Ca bali sungai iaʹ bala, iaʹ bioʹ le. Un ulu ue tujoʹ de. Un uhung nge puloʹ de. Un tapung laja singket ulu ue. 4Man iko ho ia lemeta ca tulat telu betuʹen kaʹ langit, pelaboʹ o kaʹ usun tanaʹ. Belekaʹ kenai bali sungai ina nekejeng nyeripa leto iaʹ ke nganak ina, uban ne ubaʹ ke uman anak ina selaho kenai ie pempet uʹo. 5Kun leto ini nganak ca anak laki iaʹ ke ngaren mung puhoʹ kelunan man petung malat te ʹo. Un sepuʹo anak ini tai kayang palaʹ Allah, ngan palaʹ ukoʹ padung pengaren ne. 6Sulo ketai leto ina kelap kaʹ tanaʹ lenga. Kina Allah ban petenup ukoʹ o, ngan kina dulu ke petubo ia ca ibu dua ato nem puloʹ tau pengemajan ne.
7Uʹo ina tai pekayau ne melikat kaʹ surga. Mikal ngan mung melikat te ti ngan bali sungai ina peging ngan mung diaʹ melikat te. 8Un bali sungai ina ngan mung diaʹ ngan ne supeʹ de. Abeʹ de senteng ke ngelineʹ kaʹ surga laʹa. 9Kun nte pet bali sungai bioʹ ina. Ia lete ncung ulai iaʹ cen naʹaʹ are, iaʹ dulu pisiu Bali Jaʹat, ngan Bali Sitan, iaʹ pelingu dulu mung kusun tanaʹ. Cen surga ida pet ia kaʹ usun tanaʹ peging ngan melikat te.
10Lepa ina pelaʹa akeʹ kenahan ca isiu bioʹ dau cen langit kuma ha: “Naʹkini lepa abeʹ ne puyan Allah ke pudip ilu, ngan Allah peluhaʹ nyingan ne kuaʹ ca paren bioʹ. Naʹkini lete luhaʹ seʹ ban penyukat Keristus. Moʹ lepa ida pet ne bali iaʹ pesalaʹ cenganak le, iaʹ pesalaʹ ida nyeripa Allah utung tau utung alem ne, ida pet ia tahaʹ awang neng surga. 11Mung diaʹ cenganak le dina lepa tai un usun neng ia moʹ kuʹun dahaʹ Anak Dumba ina, ngan kuʹun katuk telit iaʹ ida penco. Abeʹ cenganak le dina mawaʹ neng udip de, inu pia pa matai. 12Ina ukoʹ bangen ne lepoʹ surga ngan mung ngkem diaʹ ngelineʹ kidi. Un sepuʹo siʹau pe usun tanaʹ ngan banget, moʹ Bali Jaʹat ina lepa nai laboʹ palaʹ ikem. Buseʹ laleʹ le Bali Jaʹat ina, moʹ o tisen abeʹ un awang nge ke majan laʹa.”
13Tegoʹ bali sungai ina tisen ia ban nepet kaʹ usun tanaʹ, sulo ketai ie pabat leto iaʹ lepa nganak anak laki ina. 14Kun Allah naʹ dua kapit me leto ina, koʹ baʹan kapit atung bioʹ le, man ne ke madang tai kukoʹ o kaʹ tanaʹ lenga te, iaʹ ina ukoʹ de ke petubo ia telu uman pa beluaʹ pengemajan ne laʹa, ngan ngelidung ia kukoʹ ncung ulai ina abeʹ senteng ke nyakit ia. 15Sulo ncung ulai ina nekepu sungai cen paʹ a bayaʹ ketai leto ina, apan sungai ina ke pelempam ngan pematung ia. 16Un sepuʹo tanaʹ iaʹ mepo leto ina; kun tanaʹ ina mekaʹ paʹ a nyeloʹ sungai iaʹ bali sungai ina nekepu idai. 17Buseʹ aleʹ ne bali sungai ina neng leto ina, sulo ketai ie pepatai ngan mung mela leto ina, mela ha diaʹ ca, iaʹ ina mung kelunan diaʹ semamet bayaʹ dau katuk ukum Allah, diaʹ salet ngkang katuk telit iaʹ Yesus ban badaʹ mida. 18Ketai bali sungai ina nekejeng kaʹ sada bahi banget.
Currently Selected:
PUYAN LUHA’ 12: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
