Mga Talinhaga 3
3
Hatol sa mga Hoben na Lalaki
1Aki ko, hare paglingawe an katukdoan ko, kundi tagoon mo iyan sa puso mo an mga pagboot ko. 2An katukdoan ko matao saimo nin halawig na buhay asin mauswag na pamumuhay. 3Padanaya saimo an kaimbodan; ikulintas mo iyan sa saimong liog asin isurat sa saimong puso. 4Kun gibohon mo iyan, mawiwili saimo an Dios asin magigin marahay an saimong ngaran sa mata nin tawo.
5Manarig ka sa Kagurangnan sa bilog mong puso, asin dai ka magsarig sa sadiri mong kadonongan. 6Giromdoma siya sa gabos mong gibo, asin an tamang dalan itutukdo niya saimo. 7Dai mo ipaghambog an saimong kadonongan; matakot ka sa Kagurangnan, asin likayan mo an karatan. 8Huli ta iyan magigin bolong kan saimong laman asin kaginhawahan kan saimong mga tolang. 9Tawe nin kaomawan an Kagurangnan sa paagi nin pagdolot saiya kan pinakamarahay na bunga kan saimong daga. 10Dangan an mga harong-harong mo magkakaparano nin inani, asin an mga lalagan mo nin arak magsusupay.
11Aki ko, dai mo ipagsikwal an pagdisiplina saimo kan Kagurangnan, o mauyam sa saiyang pagsagwe. 12Huli ta dinidisiplina nin Kagurangnan an saiyang namomotan, arog kan pagdisiplina nin sarong ama sa saiyang aking nawiwilihan. 13Paladan an tawong nakakakua nin kadonongan asin an tawong nagkakamit nin pakasabot. 14Huli ta an pakinabang hale digdi orog pa ki sa pakinabang na hale sa plata; mas mahalaga iyan ki sa bulawan. 15An kadonongan mas mahalaga ki sa mga alahas, asin an ano man na saimong mawoton dai pwedeng ipantay diyan. 16Idinodolot nin kadonongan an halawig na buhay, na may kaibang kayamanan asin kaomawan. 17Magayagayang buhay an itinatao nin kadonongan asin matoninong ka niyang gigiyahan. 18An kadonongan sarong kahoy nin buhay para sa mga namumugol saiya; an mga namumugol saiya nin maigot inaapod na paladan.
19Huli sa kadonongan, linalang nin Dios an daga; huli sa pakasabot, pinamugtak niya an langit.
20Huli kan saiyang pakaaram, nagbubulos an mga salog,
asin nagtatao nin uran sa daga an mga panganoron.
21Aki ko, mamugol ka sa saimong kadonongan asin pakaaram. Dai mo pagpabayaan na mawara sinda saimo. 22Tatawan ka ninda nin buhay—sarong magayagaya saka maogmang buhay. 23Dangan maglalakaw ka nin matiwasay asin dai ka nanggad masisingkog. 24Kun ika maghigda, dai ka matatakot; matoninong kang matotorog kun banggi. 25An mga kasakitan na biglang minaabot dai mo dapat ikahandal, na arog sa bagyong minaabot sa tampalasan. 26Huli ta an Kagurangnan iyo an mag-iingat saimo. Dai niya itutugot na mahulog ka sa sarong siod.
27Dai mo ipagsayuma an karahayan sa tawong nangangaipo kaiyan, kun makakaya mong gibohon iyan. 28Dai ka nanggad magsabi sa saimong kapwa na maghalat sagkod sa sunod na aldaw, kun makakaya mong tabangan siya ngunyan. 29Dai ka magplano nin maraot laban sa saimong kapwa, na nag-eerok sa kataed mo asin nananarig saimo. 30Dai ka makiiwal sa sarong tawo na mayo man nin dahelan, kun mayo man siya nin ginibo saimong karatan. 31Dai ka maori sa madahas na tawo o mag-isip na arogon an saiyang gibo. 32Huli ta ikinakaongis nin Kagurangnan an tawong naggigibo nin karatan, alagad an mga tawong matanos saiyang inaataman. 33An maldisyon nin Kagurangnan yaon sa harong kan maraot, alagad benebendisyonan niya an erokan kan matanos. 34An mga mapaabaw-abaw dai pinapahalagahan nin Kagurangnan, alagad an mga mapakumbaba saiyang naheherakan. 35An madonong magmamana nin kaomawan, alagad kasosopgan an makukua kan mga lolong.
Currently Selected:
Mga Talinhaga 3: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
