Mga Talinhaga 2
2
An mga Bunga nin Kadonongan
1Aki ko, akoon mo an gabos na itinukdo ko asin ingatan mo an mga pagboot ko. 2Paghinanyog sa kadonongan asin hingowahon mong masabotan iyan. 3Kun maghagad ka nin pakaaram asin makimaherak nin pakasabot, 4kun hanapon mo ini arog kan paghanap nin tawo sa plata asin hanapon iyan siring sa paghanap sa natatagong kayamanan— 5dangan masasabotan mo kun ano an pagkatakot sa Kagurangnan, asin maaaraman mo an kahulogan kan pakamidbid sa Dios. 6Huli ta an Kagurangnan iyo an nagtatao nin kadonongan; siya an nagtutukdo nin pakaaram asin pakasabot. 7Siya an nagtatabang asin nag-iingat sa mga matanos saka onestong mga tawo. 8Iniingatan niya an mga tawong marahay an pagtratar sa iba, asin binabantayan niya an mga maimbod saiya.
9Kun maghinanyog ka sako, maaaraman mo kun ano an tama, matanos, saka dai nagpapalaen sa kapwa. Maaaraman mo kun ano an saimong gigibohon. 10Magigin madonong ka, asin an saimong pakaaram iyo an matao saimo nin kaogmahan. 11An pakaaram iyo an mag-iingat saimo; an pakasabot iyo an mabantay saimo. 12Ililigtas ka niya sa maraot na gawe, sa mga tawong nagpaparibok huli kan saindang itinataram— 13mga tawong nagbabaya kan matanos na pamumuhay tanganing mamuhay sa kadikloman nin kasalan, 14mga tawong naoogma sa paggibo nin maraot asin naggagayagaya sa bikong gibo, 15mga tawong dai mapapaniwalaan asin mapapanarigan.
16Makakalikay ka sa maraot na babae na madagka saimo huli kan saiyang mahamis na mga tataramon, 17na bakong maimbod sa sadiri niyang agom, asin nakakalingaw kan saiyang banal na panuga. 18Kun magduman ka sa saiyang harong, maglalakaw ka sa dalan pasiring sa kagadanan. An pagduman sa saiyang harong nangangahulogan nin pagharani sa kinaban kan mga gadan. 19An minaduman saiya dai na nakakapuli; dai na nakakabalik sa dalan nin buhay. 20Kaya maglakaw ka sa dalan kan mga marahay na tawo, asin magdanay ka sa mga agihan kan mga matanos. 21Huli ta an mga matanos iyo an mag-eerok sa dagang ini asin an mga tawong mayo nin digta an mabubuhay diyan. 22Alagad an mga tampalasan mawawara sa daga asin an mga madaya magagabot arog sa mga tinanom diyan.
Currently Selected:
Mga Talinhaga 2: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
