Mga Talinhaga 4
4
An mga Pakinabang nin Kadonongan
1Hinanyoga nindo, mga aki, an katukdoan kan saindong ama. Danay na maghinanyog kamo sainda tanganing magtalubo kamo sa pakasabot. 2An itinutukdo ko saindo marahay, kaya giromdoma nindo ini gabos. 3Bugtong na aking lalaki ako kan sakong mga magurang, asin kan ako aki pa, 4tinukdoan ako kan sakong ama. An sabi niya, “Magdanay logod sa saimong puso an sakong mga tataramon; kuyoga an sakong mga togon, asin mabubuhay ka. 5Dai mo paglingawan o pagtalikodan an sakong mga tataramon. Hanapon mo an kadonongan asin an pakaaram. 6Dai mo pagpabayaan an kadonongan asin iingatan ka niya; kamotan mo siya, asin babantayan ka niya. 7An pakakua nin kadonongan iyo an pinakamahalaga. Maski ano pa an makua mo, pakaaram an saimong kuahon. 8Pahalagahan#4:8 Pahalagahan; o kugoson. mo an kadonongan asin ilalangkaw ka niya; tatawan ka niya nin kaomawan kun kugoson mo siya. 9Samno nin kamurawayan an ibubugtak niya sa saimong payo; magayon na korona an itatao niya saimo.”
10Magdangog ka, aki ko, asin akoa an sakong mga tataramon, tanganing mabuhay ka sa halawig na panahon. 11Tinukdoan taka kan dalan nin kadonongan; pinangenotan taka sa mga agihan nin katanosan. 12Kun ika maglakaw, dai oolangon an saimong lakad; kun ika magdalagan, dai ka matutumba. 13Pugolan mo an katukdoan, asin dai mo pagbutasan; bantayan mo siya, huli ta siya an saimong buhay. 14Dai ka maglakaw sa dalan kan tampalasan, ni magtungtong sa inaagihan kan mga maraot na tawo. 15Likayan mo iyan! Dai ka mag-agi diyan! Magliklik ka asin magpadagos ka sa saimong paglakaw. 16Huli ta an mga tampalasan dai nangangatorog kun dai nakakagibo nin maraot, asin kun mayo sinda nin nakukulogan. 17Huli ta kinakakan ninda an tinapay nin karatan asin ininom an arak nin kadahasan.
18Alagad an dalan kan matanos arog kan liwanag nin kaagahon, na minaorog mantang nag-iitaas an aldaw. 19An dalan kan mga tampalasan madiklom siring sa banggi. Natutumba sinda alagad dai ninda nahihiling kun ano an saindang nasingkogan.
20Aki ko, himatea nin marahay an sakong itinataram. Dangoga an sakong mga tataramon. 21Dai mo pagpabayaan na mawara ini saimo; saraya ini sa saimong puso. 22Ini an nagtataong buhay asin marahay na hawak sa kiisay man na nakakasabot kaini. 23Ingatan mo an saimong kaisipan, huli ta minabulos hale diyan an mga burabod nin buhay. 24Halea sa ngoso mo an kaputikan; likayan mo an madayang tataramon. 25Ituruhok mo an saimong mga mata sa enotan; tanawa an saimong padudumanan. 26Isipa nin marahay an anoman na gigibohon mo, asin magigin magayon an bunga kaiyan. 27Likayan mo an karatan asin magpadagos ka sa matanos na paglakaw. Dai ka magliko sa wala o sa too.
Currently Selected:
Mga Talinhaga 4: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
