Popular Bible Verses from Mga Talinhaga 3

Share

Manarig ka sa KAGURANGNAN sa bilog mong puso, asin dai ka magsarig sa sadiri mong kadonongan. Giromdoma siya sa gabos mong gibo, asin an tamang dalan itutukdo niya saimo.

Dai mo ipaghambog an saimong kadonongan; matakot ka sa KAGURANGNAN, asin likayan mo an karatan.

Tawe nin kaomawan an KAGURANGNAN sa paagi nin pagdolot saiya kan pinakamarahay na bunga kan saimong daga. Dangan an mga harong-harong mo magkakaparano nin inani, asin an mga lalagan mo nin arak magsusupay.

Padanaya saimo an kaimbodan; ikulintas mo iyan sa saimong liog asin isurat sa saimong puso.

Aki ko, dai mo ipagsikwal an pagdisiplina saimo kan KAGURANGNAN, o mauyam sa saiyang pagsagwe. Huli ta dinidisiplina nin KAGURANGNAN an saiyang namomotan, arog kan pagdisiplina nin sarong ama sa saiyang aking nawiwilihan.

Aki ko, hare paglingawe an katukdoan ko, kundi tagoon mo iyan sa puso mo an mga pagboot ko. An katukdoan ko matao saimo nin halawig na buhay asin mauswag na pamumuhay.

Paladan an tawong nakakakua nin kadonongan asin an tawong nagkakamit nin pakasabot. Huli ta an pakinabang hale digdi orog pa ki sa pakinabang na hale sa plata; mas mahalaga iyan ki sa bulawan. An kadonongan mas mahalaga ki sa mga alahas, asin an ano man na saimong mawoton dai pwedeng ipantay diyan.

Dai mo ipagsayuma an karahayan sa tawong nangangaipo kaiyan, kun makakaya mong gibohon iyan.

Huli sa kadonongan, linalang nin Dios an daga; huli sa pakasabot, pinamugtak niya an langit.