Mga Talinhaga 22
22
1Mas marahay na pilion an malinig na ngaran ki sa dakul na kayamanan.
2An mayaman saka an dukha parehong linalang nin Kagurangnan.
3Nahihiling kan madonong an nagdadangadang na pag-alaman, asin minaingat siya; alagad dai iyan naririparo kan mangmang kaya nahuhulog siya sa kapahamakan.
4An balos sa kapakumbabaan asin pagkatakot sa Kagurangnan iyo an kayamanan, kaomawan, saka buhay.
5Mga tonok saka mga siod an nasa dalan kan tampalasan; an namomoot sa sadiri minalikay sa mga iyan.
6Tukdoan mo an aki kun paano siya mamuhay, asin dai niya iyan malilingawan sa bilog niyang buhay.
7An dukha oripon kan mayaman, asin an parautang oripon kan pinagkautangan.
8Kun nagtanom ka nin inhustisya mag-aani ka nin kapahamakan, asin matatapos an pang-aapi mo sa iba.
9Magin matinao ka asin hirasan mo an dukha kan saimong kakanon. Huli kaiyan bebendisyonan ka.
10Palayasa an mahambog, asin mahahale man an diriskutiran, iriwal, sagkod an baransagan.
11An tawong dalisay an puso saka magalang sa pagtaram magigin katood kan hade.
12Binabantayan nin Kagurangnan an katotoohan, alagad dai niya pinapangyari an mga tataramon kan mga putikon.
13An hugakon habong magluwas sa harong asin an idinadahelan iyo na tibaad gadanon siya sa luwas kan leon.
14Sarong siod an pakidorog sa bakong tunay na agom—dinadakop kaiyan an mga tawong ikinakaongis nin Kagurangnan.
15Natural sa aki an pagigin pilyo alagad sa paagi kan hampak makakanood siyang maggibo nin marahay.
16An nagreregalo sa mayaman, o an nag-aapi sa dukha tanganing magyaman magigin dukha man.
An Treyntang Kasabihan
17Paghinanyog asin tutukdoan taka kan mga tataramon kan mga madonong. Adalan mo an saindang mga katukdoan, 18asin maoogma ka kun magiromdoman mo saka masambit an mga iyan. 19Boot kong manarig ka sa Kagurangnan, kaya sasabihon ko iyan saimo ngunyan. 20Isinurat ko an treyntang kasabihan para saimo. An mga kasabihan na ini pano nin pakaaram saka marahay na hatol, 21asin magtutukdo saimo kan katotoohan. Dangan kun ika sugoon sa pagsiyasat kan katotoohan, igwa ka nin ikakasimbag sa pagbalik mo.
-1-
22Dai mo paghabonan an dukha huli ta siya dukha, o pag-apihon an mayong sukat sa atubang kan hukoman. 23Susurogon sinda nin Kagurangnan, asin hohomaan niya an buhay nin siisay man na naghohoma kan buhay ninda.
-2-
24Dai ka makipagkatood sa mga tawong mainit an payo. 25Tibaad manodan mo an saindang gawe asin masakit na para saimo an magbago.
-3-
26Dai ka manuga para sa utang nin iba. 27Kun dai ka makabayad, kukuahon ninda maski an saimong higdaan.
-4-
28Dai mo paghiroon an suanoy na muhon na ibinugtak kan saimong mga ginikanan.
-5-
29Itukdo mo sako an tawong marahay magtrabaho, asin itutukdo ko man saimo an tawong orog karahay sa gabos saka maninigo sa kaibahan kan mga hade.
Currently Selected:
Mga Talinhaga 22: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
