Mga Talinhaga 21
21
1An isip kan hade sarong sapa nin tubig sa kamot nin Kagurangnan; siya an nagboboot kan direksyon kaiyan.
2An paghona kan tawo tama an gabos niyang gibo, alagad an Kagurangnan an naghuhukom kan nasa saiyang puso.
3An paggibo kan matanos asin hustisya orog na nawiwilihan nin Kagurangnan ki sa mga sakripisyo.
4Pagkamoot sa sadiri asin kapaabaw-abawan—iyo an tanda kan maraot saka iyan kasalan.
5An mga plano kan mahigos nagbubunga sa kaginhawahan, alagad an naghihidali matatapos sa kadukhaan.
6An kayamanan na nakukua sa pandadaya sarong ambon na madaling mapara asin litag nin kagadanan.
7Napapahamak an mga tampalasan huli kan sadiri nindang kadahasan; isinisikwal ninda an paggibo kan matanos.
8Naglalakaw sa tikong dalan an tampalasan, alagad matanos an gawe kan mayong kasalan.
9Mas marahay pang mag-erok sa sarong gilid sa ibabaw kan bubong kan harong ki sa laog kaini na an kaibahan sarong maribok na babae.
10Danay na karatan na iniisip kan tampalasan; mayo siya nin pagkaherak sa kiisay man.
11Kun pinapadusahan an paraolog-olog, an mangmang nagigin madonong; kun tukdoan mo an madonong, minaorog an saiyang pakaaram.
12Aram kan banal na Dios an nangyayari sa laog kan harong kan mga maraot, asin dadarahon niya sinda sa kapahamakan.
13An dai nagdadangog sa inagrangay nin dukha, mag-aagrangay man, alagad mayo saiya nin mahinanyog.
14Hilom na regalohan mo an anggot saimo asin mahahale an saiyang kaanggotan.
15Kun nangyayari an hustisya, naoogma an matanos, alagad namomondo an mga tawong naggigibo nin maraot.
16An kagadanan naghahalat sa kiisay man na minaharayo sa dalan nin pakasabot.
17An tawong maluho magigin dukha; an mahilig sa arak asin sa masiram na kakanon dai nanggad mayaman.
18Minabalik sa tampalasan an kasakitan na saiyang pinaplano laban sa mga matanos.
19Mas marahay pang mamuhay sa desyerto ki sa makiiba sa babaeng maribok saka mareneklamo.
20Nagdadanay an mahalagang kayamanan sa laog kan harong kan madonong, alagad madali sanang mawara an kwarta kan lolong.
21An namumuhay na matanos saka maboot mahalawig an buhay asin oomawon.
22Masasakop kan madonong na heneral an syudad na may makokosog na bantay, asin magagaba niya an mga kudal na saindang sinasarigan.
23Kun boot mong makalikay sa ribok, mag-ingat ka sa pagtaram.
24Itukdo mo sako an mahambog na tawo asin itutukdo ko man saimo an tawong mapaabaw-abaw, mapalangkaw saka dai nag-iisip kan karahayan nin iba.
25Ginagadan nin tawong hugakon an saiyang sadiri huli ta habo niyang magtrabaho; 26mayo siya nin ginigibo kundi an mag-isip dapit sa mga bagay na boot niyang mapasaiya. Alagad an matanos maogmang nakakapagtao.
27Ikinakauyam nin Kagurangnan an sakripisyo kan tampalasan, orog na kun an katuyohan kaini maraot.
28An patotoo nin putikon dai pinapaniwalaan, alagad inaako an tataramon kan tataong maghiling kan katotoohan.
29Midbid kan matanos an saiyang sadiri, alagad an tampalasan kaipuhan pang magsagin-sagin.
30An kadonongan, pakasabot asin hatol nin tawo dai makakatabang kun an Kagurangnan laban saimo.
31Pwedeng iandam an mga kabayo para sa ralaban, alagad an Kagurangnan iyo an minatao nin kapangganahan.
Currently Selected:
Mga Talinhaga 21: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
