Mga Talinhaga 23
23
-6-
1Kun magtukaw ka sa pagkakan kaiba an sarong dakulang tawo, hare paglingawe kun siisay an saimong kahampang.#23:1 hare paglingawe…kahampang; o hilinga nin marahay kun ano an nasa atubang mo. 2Kun paslo ka, pugolan mo an saimong sadiri. 3Dai ka magpakapaslo sa masiram na kakanon na inandam niya, huli ta tibaad boot ka sana niyang dayaon.
-7-
4Dai mo paggadanon an saimong sadiri sa pagpayaman; magin madonong ka tanganing malikayan mo iyan. 5Pwedeng bigla sanang mawara an saimong kwarta, na garo nagkaigwa ini nin mga pakpak saka luminayog paharayo arog kan agila.
-8-
6Dai ka makikakan sa tawong kuripot, o magmawot kan inandam niyang masiram na kakanon. 7Aalokon ka niyang magkakan, alagad bako iyan tudok sa boot niya. Kun ano siya iyo man an nasa saiyang isip. 8Isusuka mo an saimong kinakan, asin masasayang an magagayon mong tataramon.
-9-
9Dai ka makipag-olay sa lolong manongod sa kadonongan; dai niya iyan masasabotan.
-10-
10Dai mo nanggad paghiroon an suanoy na muhon na haloy nang ibinugtak, o pagsakopon an daga kan mga ilo. 11An Kagurangnan iyo an saindang makosog na parasurog, asin siya an malaban kan saindang kaso laban saimo.
-11-
12Pagdangog sa saimong paratukdo saka pag-adal nin marahay.
-12-
13Dai ka magduwa-duwa sa pagdisiplina nin aki. An tamang paghampak dai niya ikakagadan; 14sa katunayan, pwedeng iyan an magligtas kan saiyang buhay.
-13-
15Aki ko, maoogma ako kun ika magigin madonong. 16Mag-oorgulyo ako kun madangog ko na nagtataram ka nin mga tataramon na may kadonongan.
-14-
17Dai ka maori sa mga parakasala, kundi matakot ka sa Kagurangnan sagkod na ika nabubuhay. 18Kun gibohon mo iyan, may paglalaomon ka sa huring mga aldaw.
-15-
19Paghinanyog, aki ko. Magin madonong ka asin isipon mo nin marahay an saimong pamumuhay. 20Dai ka makiiba sa mga paraburat asin sa mga paslo. 21Huli ta an paraburat saka an paslo nagigin dukha, asin an nagpaparakatorog maggugubing nin trapo.
-16-
22Hinanyoga an saimong ama na nagtao saimo nin buhay, asin dai mo pagbasang-basangon an saimong ina sa saiyang paggurang.
23Bakong sayang maski bakalon mo an katotoohan, kadonongan, katukdoan saka pakasabot, alagad mahalaga ini nin marahay kaya dai dapat ipabakal.
24An ama nin matanos na tawo mapapano nin kaogmahan. Pwedeng ipag-orgulyo nin sarong ama an aking madonong.
25Gibohang ipag-orgulyo ka kan saimong mga magurang; tawan sa saimong ina an kaogmahan na iyan.
-17-
26Aki ko, paghinanyog nin marahay, asin gibohon mong arogan an sakong buhay. 27An maraot na babae garo litag na nakakagadan. 28Naghahalat siya arog sa mga mahabon, asin siya an dahelan kun tadaw ta kadakul na lalaki an bakong maimbod sa saindang agom.
-18-
29Siisay an may kamondoan asin an may pagbasol? Siisay an may kaiwal saka an may kahaditan? Siisay an may mga matang namumula? 30Siya an tawong paraburat, an tawong nagpaparaburat sa manlaen-laen na arak. 31Dai ka magpadagka sa arak maski iyan mamahalon, nagkikinang sa baso, saka masiram an namit. 32Huli ta pagkaaga mamamatean mong garo ka kinagat nin mararang halas. 33May mahihiling kang mga bagay na makangangalas asin dai ka makapag-isip nin marahay, ni makakataram nin malinaw. 34Mamatean mo na garo ka nasa tahaw kan dagat, nalulula, nagtatabyon sa itaas kan palo kan layag. 35Masabi ka, “Garo akong binaradulan, alagad dai ko nagigiromdoman. Tadaw ta dai ako nagigimata? Kaipuhan mag-inom giraray ako.”
Currently Selected:
Mga Talinhaga 23: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
