Mga Talinhaga 1
1
Halaga kan mga Talinhaga
1An mga talinhaga ni Solomon, na aking lalaki ni David asin hade nin Israel.
2Uya an mga talinhaga na makakatabang saindo sa pagmidbid kan kadonongan saka marahay na hatol, asin sa pagsabot kan mga kasabihan na may hararom na kahulogan. 3Tutukdoan kamo kaini kan matanos na paagi nin pamumuhay, pagigin onesto, matanos, asin mayong pagpapalaen sa kapwa. 4Ginigibo kaining madonong an mayong eksperyensya asin tinutukdoan kaini an mga hoben kun paano an pagdesisyon nin tama. 5An mga talinhagang ini makakadagdag sa naaaraman kan mga madonong asin makakagiya sa mga tawong may inadalan, 6tanganing masabotan ninda an mga natatagong kahulogan kan mga talinhaga asin mga problemang ipinapahayag kan madodonong.
Hatol sa mga Hoben na Lalaki
7An pagkatakot sa Kagurangnan iyo an kapinonan nin pakaaram; an kadonongan asin katukdoan mayo nin halaga para sa mga lolong.
8Aki ko, hinanyoga an hulit kan saimong ama, asin dai mo ipagsikwal an katukdoan kan saimong ina; 9huli ta iyan nakakaagid sa sarong magayon na korona sa saimong payo asin kulintas sa saimong liog.
10Aki ko, dai ka maghonod kun sugotan ka kan mga parakasala. 11Kun magsabi sinda, “Madya, maghipa kita nin tawong magagadan! Maski mayo nin dahelan, salakayon ta an tawong mayo nin kasalan. 12Pwedeng buhay asin mabaskog sinda kun makua ta sinda, alagad magigin gadan sinda, pakatapos ta sainda! 13Hanapon ta an gabos na klase nin kayamanan, dangan panoon ta nin sinamsaman an satong mga harong! 14Madya, umiba ka samo asin barangaon ta an satong hinabonan.”
15Aki ko, dai ka maglakaw sa kaibahan ninda; likayan mo sinda. 16An saindang mga bitis nagdadalagan sa paggibo nin karatan, naghihidali sinda sa panggagadan. 17Mayo nin mangyayari sa pagbiklad mo nin hikot kun an gamgam na boot mong dakopon nagmamasid. 18Alagad an mga tawong ini minabugtak nin litag para sa sadiri man sana ninda, litag na magagadanan ninda. 19Siring kaiyan an nangyayari sa kiisay man na nabubuhay sa kadahasan; an panghahabon iyo an magadan sa mahabon.
Nag-aapod an Kadonongan
20An kadonongan makosog na nag-aapod sa tinampo asin sa mga saodan; 21nagkukurahaw siya sa ibabaw kan mga kudal asin nagpapahayag sa trangkahan kan syudad:
22“O mga lolong, kontento na daw kamo sa saindong pagkalolong? Sagkod nuarin nindo pag-oolog-ologon an pakaaram? Dai pa nanggad kamo nakakanood? 23Kun hinanyogon nindo an sakong pagsagwe, itatao ko saindo an marahay na hatol asin ihihiras ko saindo an sakong naaaraman. 24Alagad huli ta habo kamong magdangog kan ako nag-apod asin mayo nin nagdolok kan iunat ko an sakong kamot; 25huli ta dai nindo pinahalagahan an sakong hatol asin dai nindo inako an sakong pagsagwe, 26ngingisihan ko kamo sa saindong kasakitan asin tutuyatuyaon ko kamo kun abotan kamo nin takot— 27kun ini mag-abot saindo siring sa bagyo, na may darang doros nin kasakitan, asin kun kamo nakukulogan saka nagmomondo. 28Dangan maapod kamo sako, alagad dai ako masimbag; hahanapon nindo ako, alagad dai nindo ako makukua. 29Huli ta naongis kamo sa pakaaram asin dai nindo pinili an pagkatakot sa Kagurangnan; 30huli ta dai nindo inako an sakong hatol asin isinikwal nindo an sakong pagsagwe, 31kakakanon nindo an bunga kan saindong gibo asin mababaldi kamo sa saindong mga plano. 32An pagtalikod sa kadonongan iyo an minagadan sa mayong eksperyensya, asin an dai pakilabot kan mga lolong iyo an minaraot sainda. 33Alagad an naghihinanyog sako mag-eerok sa katiwasayan asin mabubuhay sa katoninongan, na mayo nin natatakotan.”
Currently Selected:
Mga Talinhaga 1: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
